Ahɔ̄ ō pi igbalɛwa lɛ ō ya mla ukɔ́ mla ɛlā néē gē nwu ɔcɛ, amáŋ ó kē lɛ ō ya mɛmla ō nā ɔcɛ ta ɔwɛ mla itala duu. Ujehofa gē pi alɔ ahɔ̄ amāŋ ya alɔ itala o ya ɛɛ ku alɔ gba ɔ ɛ̄gbā ɔwɛ nōo he ɔ ɔtu a. (Uróm 12:1; Uhíb. 12:10, 11) Ekoohi, ahɔ̄ ō pi amāŋ itala gē kwu ɔcɛ iyē, amáŋ ó gē gwa īkpō olɔhi klla i bi ɔhā wa. (Aíit. 10:7) Ɔdi nɛ ācɛ nōo yɔ i pi ɔcɛ ahɔ̄ amāŋ ya ɔcɛ itala a cika ō bi ipu ɔtu a? Ɔdi nɛ ɔcɛ néē yɔ i pi ɔ ahɔ̄ amāŋ ya ɔ itala a cika ō bi ɔtu a?

Ɔcɛ nōo yɔ i pi ɔcɛ ahɔ̄ amāŋ ya ɔcɛ itala a. Anyakwɔcɛ ku ujɔ, adā mla ɛ́nɛ́ mla ɛjɛɛji ācɛ ohile kéē ceyitikwu pi ɔcɛ ahɔ̄ amāŋ ya ɔcɛ itala ɔwɛ ogbonɛnɛ mla ihɔtu ɛgɛ nɛ Ujehofa gē ya a. (Ujɛr. 46:28) É cika ō pi ɔcɛ ahɔ̄ amāŋ ya ɔcɛ itala ɛgɛ nōo cika lɛ ɔdā nɛ ó ya a, é kē cika ō ya ɛnyā ipu ihɔtu.—Utáy. 1:13.

Ɔcɛ nōo yɔ i miyɛ ahɔ̄ ō pi amāŋ itala a. Ɔwɛ duuma néē bi le pi alɔ ahɔ̄ amāŋ ya alɔ itala a, alɔ kóō hii ta ŋ, alɔ bi ɔ le yuklɔ boobu. (Aíit. 3:11, 12) Abɔɔ alɔ wɛ alɛɛcɛ nɛ ó jila iyē ŋ ma a, alɔ cɛgbá itala nōo gē wa ɔwɛ ɛyɛɛyɛyi a. Alɔ lɔfu miyɛ ahɔ̄ ō pi ŋma ipu aɛlā nɛ alɔ gē jé ŋma Ubáyíbu a amāŋ aɛlā nɛ alɔ gē po ipu ōjila ku ujɔ ku alɔ a. Amāŋ ekoohi alɔ lɔfu miyɛ itala ŋma ɛgiyi ígwu ku anyakwɔcɛ nōo gē kɛpɔ (judicial committee) a. Ɔdaŋ ku alɔ miyɛ ahɔ̄ ō pi amāŋ itala klla bi ɔ le yuklɔ ipu oyeeyi ku alɔ, alɔ géē lɛ ɛnɛɛnɛ oyeeyi klla géē yɔ piyoo.—Aíit. 10:17.

LƐ UVIDIO NYĀ MAFU NŌO KAHINII: “UJEHOFA GĒ YA ƆCƐ NƐ ƆTU NU HE Ɔ A ITALA,” CƐƐ AA LƐ ƆKA NŌO BA NYĀ CILA:

• Ɛgɛnyá nɛ oyeeyi ku Canon gbɔɔ lɛ a, ɛgɛnyá nɛ ó kē piyabɔ a?

• Ɛnɛɛnɛ ahɔ̄ ō pi amāŋ itala nyá nɛ ó miyɛ ŋma ɛgiyi Ujehofa a?

• Aɛlā ō nwu nyá nɛ ocabɔ ku nu nyā nwu alɔ a?