Gbɔbu ɛɛ ku alɔ je ɔdā ō ya, ɛgɛ duuma nōó nyɛ amāŋ nwune lɛ, alɔ gē da iyi alɔ ɔka ka, ‘Ɔdi Nɛ Ujehofa Gáā Gbɛla A’ a? Naana nɛ alɔ i jé oduudu odee lɛyikwu ɛgɛ nɛ Ujehofa gē gbɛla gla ŋ ma, ɛnɛ alɔ cɛgbá o jé a, ó lɛ ɔ ta alɔ eyī peee ipu Ɛlā ku nu o ya ɛɛ ku alɔ le tutu ō ya “úklɔ́ olɔhi dóódu.” (2 Utím. 3:16, 17; Uróm 11:33, 34) Ó teyi peee ka Ujisɔsi lɛ ɔtu kwu ɔdā nɛ Ujehofa dɔka a, ó kē kwu ɔ u piya ɔdā nōo cɛgbá fiyɛ duu ipu oyeeyi ku nu. (Ujɔ́n. 4:34) Alɔ gbla Ujisɔsi ya, ku ɔdā duuma nɛ alɔ je o ya a kóō, wɛ ɔdā nōo géē he Ujehofa ɔtu.—Ujɔ́n. 8:28, 29; Āfi. 5:15-17.

LƐ UVIDIO NYĀ MAFU NŌO KAHINII: BĒĒ LƐ ƆTU KWU ƆDĀ NƐ UJEHOFA DƆKA A (ULĪF. 19:18), CƐƐ, AA LƐ AƆKA NŌO BA ƐHAAJƐ A CILA:

• Ɔdiya nōó cɛgbá ku alɔ bi aukɔ́ ku Ubáyíbu le yuklɔ ipu oyeeyi ku alɔ a?

• Ukɔ́ ku Ubáyíbu nyá lɔfu ta alɔ abɔ lɛyikwu ɛdɔ ijé nɛ alɔ gē po a?

• Ukɔ́ ku Ubáyíbu nyá lɔfu ta alɔ abɔ lɛyikwu ɛgɛ nɛ alɔ gē gbo mla ɛdɔ ili nɛ alɔ gē le wu iyē a?

• Ipu aya ku oyeeyi ɔhá nyá nɛ alɔ cɛgbá o bi aukɔ́ ku Ubáyíbu le yuklɔ a?

• Ɛgɛnyá nɛ alɔ gáā ya lɔhi fiyɛ lɛyikwu ō jé aɔdā nɛ Ujehofa géē dɔka ku alɔ ya a?