Naana nɛ Ujehofa i jé íne duuma kwaajɛ lɛyikwu ō gba aɔwɔ ɔhá ɛ̄gbā eko ɔɔma ɛ ŋ ma, Ujekɔpu jé ka Ujehofa foofunu néē cika ō gba ɔ ɛ̄gbā á. (Oyɛb. 20:3-5) Ohigbu ɛnyā, abɔ Ujehofa le da ɔ kóō le cigbii gā Ubɛtɛlu a, Ujekɔpu lɛ ukɔ́ tu ɛjɛɛji ācɛ nōo yɔ mla anu a kéē lɛ aojibo ku uwa kpo bonu. Anɔɔ Ujekɔpu miyɛ ɛjɛɛji aojibo a kwu uwa u kpo bonu a, kwu ɔdā ō le playi ahɔ̄ néē gē bi, o ya kóō gbo uwa a. (Ohút. 35:1-4) Ó lɛ aafu ŋ, ɔdā nɛ Ujekɔpu ya a he Ujehofa ɔtu nɛhi.

Ɛgɛnyá nɛ alɔ gáā gba Ujehofa foofunu ɛ̄gbā icɛ duu a? Ɔdā ō cɛgbá éyi nɛ alɔ cika ō ya a, wɛ ō lɛ abɔ ci ɔdā duuma nōo lɛ ō ya mla ō gba ɔwɔ ɔhá ɛ̄gbā amāŋ imabɔ o ya. Ɛnyā kē lɛ ō ya mla ō lɛ aɔdā duuma nōo lɛ ō ya mla ogboni kpo bonu mla ō leyi yɛ aɔdā nɛ alɔ gē bi le jɔɔnyɛ iyi alɔ a lɔɔlɔhi. Ocabɔ mafu, da iyi uwɔ ɔka nyā: ‘N gē jɔɔnyɛ ō jé aɔkpá amāŋ má aufilm nōo tɛɛma kwu ɔhɛ ō ya amāŋ ɔka ku aokwu nōo gē bɛɛcɛ ŋma unoji otu gáā gwa oyi ku alɛɛcɛ? Aɔdā nɛ um gē je ō le jɔɔnyɛ iyi um a gē mafu ka ɛba ō gwo, imabɔ o ya, amāŋ okonu o ta bɛɛka ó wɛ ɔdā o bɔbi ŋ ma?’ Alɔ cika ō lɛ iyi alɔ tu gɛɛcɛ ligbo ligbo ŋma ɛgiyi ɔdā duuma nōo gē wu Ujehofa ɔtu.—Aíjē 97:10.

AA LƐ UVIDIO NYĀ MÁ NŌO KAHINII: “AÁ TÁ ƐLĀ KÚ EBILÍI,” CƐƐ, AA LƐ AƆKA NŌO YƆ ƐHAAJƐ A CILA.

• Ɛdɔ unwalu nyá gbɔɔ o ya ipu oyeeyi ku ɔcɛ éyi nōo gē klɔcɛ ku Ubáyíbu nɛ iye nu lé ka Upolina a?

• Ɔdaŋ ka awɔ, ɔcɛ nɛ a jé amāŋ gē klɔcɛ mla ɔ, yɔ i lɛ unwalu nōo lɛ ō ya mla imabɔ, ɔdiya nōó géē wɛ ɔdā ijeeyi o dɔka otabɔ ŋma ɛgiyi anyakwɔcɛ ku ujɔ a?

• Ɔdaŋ ku alɔ dɔka ku Ujehofa kóō gbo alɔ, ɔdi mla ɔdi nɛ alɔ cɛgbá ō je kpo bonu a?

• Ɔdi nɛ Upolina miya ō ya boobu a?

• Ɔdaŋ ku alɔ i dɔka ku aalelekwu obɔbi kéē lɛ abɔ kwu alɔ iyi ɔwɛ duuma ŋ, ɔdi nɛ alɔ cika ō ya ɛga nɛ alɔ lā a?