Alɔ lɛ uvidio ku oklɔcɛ ku Ubáyíbu ɛnɛ nɛ alɔ gē le yuklɔ eko nɛ alɔ yɔ i tɔɔna. Ɔdiya néē ya eyeeye ku uwa a?

• É ya uvidio ku Ɔdi Ya Naa Cika O Y’oklɔcɛ ku Ubáyíbu?—Aya Ō Likpo Ku Nu o ya ɛɛ kóō ta ācɛ nōo ŋma ɔwɛ ō gba ɛ̄gbā ɛyɛɛyɛyi abɔ ku Ubáyíbu kóō ŋmo uwa unwu. Uvidio a gē ta ācɛ nōo má ɔ a ɔtu kwu ɔtu kéē jila Ubáyíbu má kéē má ohi ku aɔka ō cɛgbá lɛyikwu oyeeyi klla je ocabɔ ku ijeeyi lɛyikwu ohi néē má a. Ó klla da alɔ ɔdā nɛ alɔ géē ya ɔdaŋ ku alɔ dɔka kéē klɔcɛ ku Ubáyíbu mla alɔ.

• Uvidio ku Ɔdi Ya Naa Cika O Y’oklɔcɛ ku Ubáyíbu? (aya ō kpii ku nu) a lɛbɛɛka aku aya ō likpo ku nu a, amáŋ uminiti a le kpii a. Ɛnyā gē yuklɔ lɔɔlɔhi fiyɛ ɛga nɛ ācɛ i gē lɛ eko nwune ku alɔ tɔɔna lɛ uwa ŋ.

• É ya uvidio ku Ɔdi Ge Ya Eko N’alɔ Ge Y’oklɔcɛ K’ubayibu? a o ya ɛɛ kóō cɛ lɛ Ubáyíbu nɛ alɔ gē klɔcɛ mla ācɛ iyɛhi a kóō ŋmo uwa unwu. Ó klla cila ohi ku aɔka ōhī nɛ ācɛ lɔfu da mla ɔdā nɛ alɔ géē ya ɔdaŋ ku alɔ dɔka kéē klɔcɛ ku Ubáyíbu mla alɔ.

• É ya uvidio ku Ahinya Ō Wa Aya Ku Ubáyíbu Oklɔcɛ Ku Uwɔ, ku alɔ mafu lɛ ācɛ nɛ alɔ gē klɔcɛ ku Ubáyíbu mla uwa. Naana nɛ uvidio nyā yɔ upeji ɔmpa ku ɔkpá ku Jɔɔnyɛ Oyeeyi Nōó Gáā Mɛ Gboogboo Ŋ! ma, a lɔfu mafu uvidio nyā eko nɛ aa yɔ i klɔcɛ ku ubrociɔ ku Jɔɔnyɛ Oyeeyi Nōó Gáā Mɛ Gboogboo Ŋ! ma. Uvidio a kɛla lɛyikwu ɔdā nōo yɔ ipu ɔkpá a mla ɔdā nɛ ɔcɛ nɛ a gē klɔcɛ mla ɔ a lɔfu leyice ipu oklɔcɛ a.

Naana nōó lɛ ɔdā nōo ya néē ya eyeeye ku auvidio a, alɔ lɔfu mafu uvidio amāŋ ta ɔ ɛhɔ fu ācɛ eko nōo cika. Alɔ yɔ i ta eyeeye ku Ācɛ Ō Tɔɔna Ɛlā Ɔwɔico ɔtu kwu ɔtu kéē lɛ auvidio a jé lɔɔlɔhi klla bi ɔ le yuklɔ ɔwɛ olɔhi ipu uklɔ ku ɔna ō ta.