ƐGƐ NƐ ĀCƐ O YƐCE UKRAIST GĒ LĀ OYEEYI
Ɛgɛ Nɛ A Géē Tabɔ Igbihi Nɛ Amiya Le Ya
Amiya nōo gē ya abɔyinu yɔ i nwune icɛ tōōtɔ̄ɔ̄. Eko nɛ amiya le ya, ō yɔ i je otabɔ wɛ ɔdā nōo cika ō yɔ i nyɔ mɛɛlɛ néē klla géē yɔ i leyi kwu ōmiya ku nu lɔɔlɔhi. Ohigbu ɛnyā, Ígwu Nōo Gē Leyi Kwu Ɔwa Ku Alɔ a lɛ Disaster Relief Department kwaajɛ ipu abɔ ku ɛga ō yuklɔ ku alɔ doodu.
Eko nɛ ayinɛ nōo gē yuklɔ aya nyā le jé lɛyikwu amiya doodu, é gē da anyakwɔcɛ ku ujɔ ku abɔɔ a ɔka boobu ku aɔdā nɛ ācɛ ō tɔɔna ɛlā Ɔwɔico a cɛgbá a. Ɔdaŋ ku aɔdā nōo biya a le gbɛ fiyɛ aɔdā nɛ ācɛ ō tɔɔna ɛlā Ɔwɔico a géē ya abɔyi uwa gla, abɔ ku ɛga ō yuklɔ ku alɔ gē fu ayinɛ nōo géē nyɔ i je otabɔ. Ayinɛ a lɔfu dɔka ācɛ nōo géē fu iyi uwa tɛɛcɛ ō je otabɔ amāŋ ō bi aɔdā ōhī le je ɛhi amāŋ é lɔfu lá aɔdā ōhī néē cɛgbá a, cɛɛ é kwu ɔ u kpo kɔ.
Ó lɛ ɔdā olɔhi alɛwa nōo gē bɛɛcɛ ŋma ō ya odee ɔwɛ ɛgɛnyā. Ó gē ya ku ayinɛ kéē yuklɔ iciici ŋ, kéē hii gbaji ŋ, kéē klla kpo ije mla aɔdā ɔhá bonu ohigbu ku ɔnyɔɔnyɛ yɔ i ya odee ɔwɛ ku abɔyinu ŋ.
Ayinɛ nɛ abɔ ku ɛga ō yuklɔ fu a gáā ya ōmiya ku ije néē cɛgbá mla aluka ku ācɛ nōo fu iyi uwa tɛɛcɛ ō je otabɔ a. É klla lɔfu piyatɔha mla ācɛ nōo yɔ ɛga nɛ amiya ya a, ohigbu ku ɛnyā lɔfu ya ku uklɔ néē wa gáā ya a kóō mɛ fiya fiya. Ɔcɛ duu kóō hii lɛ abɔ ta iyi nu ɔtu nyɔ i miyɛ ije ŋma ɛgiyi ayinɛ, ta odee ɛhɔ amāŋ nyɔ gā ɛga nɛ amiya ya ɔdaŋ kéē da ɔ kóō ya lɛ a ŋ.
Amáŋ, eko duuma nɛ amiya le ya, alɔ gē dɔka ō je otabɔ. (Uhíb. 13:16) Alɔ yihɔtu ayinɛ alɔ! Ɔdi nɛ alɔ lɔfu ya gla a? Ɛ̄nɛ̄ ō cɛgbá fiyɛ duu a wɛ ku alɔ lɔfu gbɔɔkɔ lɛyikwu ācɛ nɛ amiya ya da uwa a mla ayinɛ nōo yɔ i je otabɔ lɛ uwa a. Alɔ klla lɔfu je ɛhi ŋma lɛ ō lɛ ije ta ipu ikpati ku worldwide work. Oŋma lɛ íkwu nɛ abɔ ku ɛga ō yuklɔ ku alɔ gē miyɛ ŋma ɛgiyi Ígwu Nōo Gē Leyi Kwu Ɔwa Ku Alɔ a, uwa gē ya ōmiya olɔhi fiyɛ duu ku ɛga néē lɔfu bi ije nyā le yuklɔ a. Ɔdaŋ ku alɔ kē dɔka ō je iyi alɔ tɛɛcɛ ō je otabɔ, alɔ lɔfu lɛ abɔ ta ɔkpá ku Local Design/Construction Volunteer Application (DC-50).
LƐ UVIDIO NYĀ MAFU NŌO KAHINII: EŊKPƆ OCEENYI NŌO BIYA ƆDĀ ALƐWA IPU ÉWO KU BRAZIL, CƐƐ AA LƐ ƆKA NYĀ CILA:
Ɔdi he uwɔ ɔtu lɛyikwu ɔwɛ nɛ Ācɛ Ocijali Ku Ujehofa je otabɔ igbihi nɛ eŋkpɔ oceenyi ya ipu éwo ku Brazil ihayi ku 2020 a?
