Ó lɛ aɔkpá mla auvidio nōo yɔ ɛga ogbɔɔ ŋma ku uwɛbsait ku alɔ néē le tutu kóō lɛ abɔ kwu ācɛ ɔkwɛyi nōó wɛ Ācɛ Ocijali Ku Ujehofa ŋ ma ɔtu. (Ācot. 13:48) Igbalɛwa, ó gē kɛla lɛyikwu aikpɛyi ɛlā nōo gē bɛɛcɛ ipu ɔ̄kā amāŋ ɔdā nɛ ācɛ yɔ i gbɛla klla yɔ i kɛla lɛyikwu ɔ.

Ɛgɛnyá nɛ a lɔfu bi ɛga ogbɔɔ ŋma ku jw.org a le yuklɔ ipu uklɔ ku ɔna ō ta ku uwɔ a?

• Jila uwɛbsait a má ojigogo. Leyi bi aɔdā nōo gē bɛɛcɛ ɛhaajɛ ku aya ku aɔdā nɛ alɔ lɛ ipu ɛga ogbɔɔ ŋma a, ku a leyi yɛ ɛgɛ nɛ a lɔfu bi ɔ le je otabɔ lɛ ɔcɛ nɛ ɛlā a he ɔ ɔtu a. Ō jé aɔdā nōo gē bɛɛcɛ ipu uwɛbsait a ojigogo géē ta uwɔ abɔ jé aɔdā ɛpɛpɛ ō bi yuklɔ ipu uklɔ ku ɔna ō ta ku uwɔ.

• Bi aikpɛyi ɛlā mla auvidio nōo yɔ ɛga ogbɔɔ ŋma a le gbɔɔ ɔka ō ka mla ɔcɛ. Aɛlā nyā lɔfu ta alɔ abɔ jé ɔdā nɛ ācɛ nōo lā ɔwɛ ɛga alɔ gē tɔɔna a lɔfu yɔ i gbɛla lɛyikwu ɔ a.

• Mafu ɛga ogbɔɔ ŋma a lɛ ācɛ. Mafu aikpɛyi ɛlā ōhī lɛ ɔcɛ a, ku a klla mafu lɛ ɔcɛ ɔɔma ɛgɛ nɛ ó géē má aɛlā ɛyɛɛyɛyi nōo yɔ uwɛbsait a.

• Lɛ u link tɛhɔ. Ó lɛ ācɛ ōhī nōó gē dɔka ō kɔka mla alɔ eyī caa ŋ, amáŋ é gē dɔka ō nyɔ i jila uwɛbsait ku alɔ má. Ó lɛ a, a hii pi ɔkwu ajɛ ō ta u link ku ɛga ogbɔɔ ŋma amāŋ ikpɛyi ɛlā amāŋ uvidio éyi ɛhɔ fu ɔcɛ nōo dɔka anu ŋ.