Ɔdiya nɛ alɔ cika ō lɛ eko taajɛ ku alɔ yɔ mla ācɛ nōo yihɔtu ku Ujehofa a? Ohigbu ka ācɛ nɛ alɔ gē lɛ eko taajɛ gē yɔ mla uwa a lɔfu ya ku alɔ ya ɔdā olɔhi amāŋ ɔdā obɔbi. (Aíit. 13:20) Ocabɔ mafu, Ɔcɛ́ néē hi ka Ujɛhowasi a ya “ɔdā nōo lɔhi ipeyi ku Ujehofa” abɔ ó lɛ eko taajɛ yɔ mla Otrɛyi ku Acogwɛɛya Ujehoyada a. (2 Úklɔ́ 24:2, NW ) Abɔ Ujehoyada gekwū a, Ujɛhowasi habɔ Ujehofa ta ohigbu aoklobiya obɔbi.—2 Úklɔ́ 24:17-19.

Eko ku Ācɛ O Yɛce Ukraist aflɛyi a, Upɔlu lɛ ujɔ a gbla “ɔlɛ́ [ku] ɔ̄cɛ o lɛ agbénú,” ka ācɛ ku ujɔ a kē lɛbɛɛka “ógo mɛ́mla ocííbú ɛyɛ́ɛ́yí” a. Alɔ géē “lɛbɛ̄ɛka aógo nēé gē kpó wɛ̄ɛcɛ eko kú ugbɔga ōjīlīmā” a, ɔdaŋ ku alɔ ta o piyatɔha mla ɔcɛ doodu nōo gē ya ɔdā nɛ Ujehofa i dɔka ŋ ma, naana nɛ ó lɔfu ŋma ipu ujɔ amāŋ apɔlɛ ku alɔ a. (2 Utím. 2:20, 21) Ohigbu ɛnyā, ku alɔ ceyitikwu ya aoklobiya mla ancɛnya mla ācɛ nōo yihɔtu Ujehofa a mla ācɛ nōo gē ta alɔ ɔtu kwu ɔtu ku alɔ gba ɔ ɛ̄gbā.

AA MÁ UVIDIO NYĀ NŌO KAHINII: NWU ƐGƐ NƐ A GÉĒ TA AOKLOBIYA MLA ANCƐNYA OBƆBI A, CƐƐ, AA LƐ AƆKA NŌO YƆ ƐHAAJƐ A CILA:

• Ɔwɛ ɛyɛɛyɛyi nyá nɛ alɔ lɔfu gbɔɔ o piyatɔha mla ācɛ obɔbi a?

• Ipu uvidio a, ɔdi ta ayinɛ alɔ ɛta abɔ kéē lɛ abɔ ci o piyatɔha mla ācɛ o bɔbi a?

• Ukɔ́ ku Ubáyíbu nyá lɔfu ta uwɔ abɔ ku a bi ijeeyi le je ācɛ nɛ a gē piyatɔha mla uwa a?