Ó lɛ eko ɛyɛɛyɛyi eko igble, nɛ aigbomina ɛyɛɛyɛyi ta ācɛ ō gbā Ujehofa ɛ̄gbā abɔ ɛ. (Ɛ́sra 6:1-12; Ɛ́sta 8:10-13) Ɛpleeko ku alɔ nyā duu, alɔ má ku “ajɛ” a kwɛyi ku aya ku ɛcɛ nyā nōo gē dēe má ɛlā ɔwɛ okpaakpa ekoohi a. “Ajɛ” a kwu “éŋkpɔ̄” nōo ŋma okonu ku “ɛbɛ́ obɔ̄bí” a i mlɛ. Ɛbɛ́ obɔbi a kwɛyi Ebilii, eŋkpɔ a kē kwɛyi ku oyaŋmo nɛ ācɛ ō gbā Ɔwɔico ɛ̄gbā gē má ŋma ɛgiyi Ebilii a. (Mafú 12:16) Ekoohi, Ujehofa nōo wɛ “Óndú kú alɔ nōo gē hɛ́ alɔ tá” a, lɔfu lɛ abɔ kwu aɔcɛ́ ku ɛcɛ nyā ɔtu kéē lɛ ohɛta je lɛ ācɛ ɔlɛ nu.—Aíjē 68:20; Aíit. 21:1.

Ɔdaŋ ka é lɛ uwɔ tu agbá ohigbu ɛ̄gbā nɛ a yɔ i gbā Ujehofa a bɛɛ? A hii jama gbɛla ku Ujehofa je mlanyi uwɔ ŋ. Le jé kpɔcii ka Ujehofa yɔ i leyi kwu uwɔ. (Ohút. 39:21-23; Aíjē 105:17-20) Abɔ a bi ɔtu okpoce ku uwɔ lɔfu a, Ujehofa géē hɔha ku nu ce uwɔ. Ɛgɛ nɛ a mahayi ipu ɛ̄gbā ō gbā Ujehofa a, gē je ɔtu ō tu kwu ɔtu lɛ ayinɛ ohile nōo yɔ ipu oduudu ɛcɛ a.—Ufíl. 1:12-14; Mafú. 2:10.

AA LƐ UVIDIO NYĀ MÁ NŌO KAHINII, AYINƐ ALƆ NƆNYILƆ KU KOREA NÉĒ HƐTA ŊMA AGBÁ A, CƐƐ, AA LƐ AƆKA NŌO YƆ ƐHAAJƐ A CILA:

• Ɔdiya néē kpo ayinɛ alɔ nɔnyilɔ alɛwa tu agbá ipu South Korea ihayi ōhī nōo gā yɛ nóō gboji ŋ ma?

• Ɛpɔ ō hɛ nyá ya kéē hɛ ayinɛ alɔ nɔnyilɔ ta ŋma agbá teeko a?

• Ɛgɛnyá nɛ alɔ lɔfu ta ayinɛ alɔ abɔ nōo yɔ ipu agbá ipu oduudu ɛcɛ, ohigbu ɔtu okpoce ku uwa a?

• Ɔdaŋ ku ācɛ duuma i junwalu lɛ alɔ babanya ŋ, ɛgɛnyá nɛ alɔ lɔfu bi ɛga nyā le yuklɔ a?

• Ɔnyɛ gē ya ɔ tɔɔtɛ ku alɔ yale ipu ɛpɔ ɛyɛɛyɛyi nɛ alɔ yale a?