Ŋma ihayi ku 2018 a, umagajin néē gē ya wɛɛcɛ a gē kɛla lɛyikwu ikpɛyi ɛlā ekponu. Ɛjɛɛji aumagajin nyā wɛ ipu Aɔdā Nɛ Alɔ Gē Bi Le Ya Oklɔcɛ Mla Ācɛ A. Ohigbu ɛnyā, alɔ lɔfu bi uwa le yuklɔ ipu uklɔ ku ɔna ō ta. Alɔ lɔfu bi aumagajin ōhī yɛce iyi alɔ eko duuma nɛ alɔ yɔ i gā iyawu amāŋ eko nɛ alɔ yɔ i nyɔ gā lá odee ŋma olihi. Alɔ i gē bi aumagajin nyā le ya oklɔcɛ mla ācɛ ŋ, amáŋ alɔ gē bi uwa le ta ācɛ abɔ kéē wa i jé odee lɛyikwu Ɔwɔico.

Igbihi nɛ a gbɔɔ ɔka ō ka mla ɔcɛ a, lɛ Ubáyíbu éyi jé mla ɔcɛ a ku a klla kɛla lɛyikwu ikpɛyi ɛlā éyi ŋma ipu umagajin nōo géē he ɔ ɔtu. Ocabɔ mafu, ɔdaŋ kóō wɛ ɔcɛ nōo lɛ apɔlɛ amāŋ yɔ i nya mɛmla unwalu éyi, a lɔfu kɛla ɔwɛ ɛgɛnyā kahinii: “O lɛ ɛnɛɛnɛ ikpɛyi ɛlā éyi nɛ um jé lɛyikwu ɛlā nyā nōó gboji ɛ ŋ. N ma ɔ fu gā uwɔ gla a?” Ɔdaŋ ka ɔkwɛyi a he ɔcɛ ɔɔma ɔtu, a lɔfu je umagajin éyi lɛ ɔcɛ a amāŋ tu umagajin a ɛhɔ fu ɔcɛ a o bu ipu ukɔmputa, naana nōó kóō wɛ eko aflɛyi nɛ aa yɔ i kɔka a. Ó wɛ umagajin ō je lɛ ācɛ wɛ ɔdā okpɔcii nɛ alɔ gē ya a ŋ, amáŋ umagajin a gē ta alɔ abɔ má ācɛ nōo dɔka ō yuklɔ mla ɔdā néē yɔ i nwu a.—Ācot. 13:48.