Ujisɔsi ‘tɔɔna ku ɔkoolɔhi ku Ajɔɔcɛ ku Ɔwɔico.’ (Ulúk. 4:43) Ó klla nwu ācɛ kéē gbɔɔkɔ lɛyikwu Ajɔɔcɛ ɔɔma duu. (Umát. 6:9, 10) Ipu Ɔya Ɔmigwoleyi a, alɔ géē ya ɛnɛɛnɛ uklɔ ku ɔna ō ta lɛyikwu Ajɔɔcɛ ku Ɔwɔico ɔɔma. (Umát. 24:14) Lɛ ōmiya ku uwɔ tutu o ya ɛɛ ku a géē wɛ ipu ɛnɛɛnɛ uklɔ ku ɔna ō ta nyā lɔɔlɔhi. Ɛjɛɛji ācɛ nōo wɛ ɔcɛ ō gbɔbu ɔna ō ta ŋma eko ta eko a lɔfu miya ō yuklɔ awa 30 amāŋ 50 ipu ɔya nyā.

Mafu ɛga ku Ubáyíbu nōo kɛla lɛyikwu Ajɔɔcɛ ku Ɔwɔico lɛ ācɛ alɛwa ɛga nɛ a gē tɔɔna a. Eko nɛ a yɔ i dɔka ɛga ku Ubáyíbu nɛ a gáā jé lɛ ācɛ ɔwɛ ɛga nɛ a gē tɔɔna a, bi aɔdā néē kpɔtuce ɔ a ipu ɔtu. Ɔdaŋ ka ɔcɛ mafu ka Ɛlā Ɔwɔico nɛ a ka lɛ ɔ eko aflɛyi a he ɔ ɔtu, kwu public edition ku Watchtower No. 2 2020 a u lɛ ɔ. Ɔdaŋ kóō tɔɔtɛ, a hii kpo eko bonu ōcigbihi nyɔ ŋ, cɛɛ ku a ceyitikwu bi ɔkpá éyi ŋma Aɔdā Nɛ Alɔ Gē Bi Le Ya Oklɔcɛ Mla Ācɛ A le gbɔɔ oklɔcɛ mla ɔcɛ a. Ó gáā gboji gɛ ŋ, Ajɔɔcɛ ku Ɔwɔico géē ca ɛjɛɛji aigɔmɛnti nōo gē nuunu ta ɔ a taajɛ. (Udán. 2:44; 1 Ukɔ́r. 15:24, 25) Ohigbu ɛnyā, alɔ bi ɛnɛɛnɛ ɛga nōo yɔ nyā le mafu ku Ujehofa mɛmla Ajɔɔcɛ ku nu he alɔ ɔtu a!