Ɔdaŋ ku a wɛ Ɔ̄cɛ O Yɛce Ukraist nɛ ó ya ubatisim ɛ ŋ amāŋ a wɛ ɔ̄cɛ néē yɔ i klɔcɛ ku Ubáyíbu mla uwɔ, a bi ipu ɔtu ō ya ubatisim ɛ̄cī éyi? Ɔdiya nɛ a géē dɔka ō ya ubatisim a? Ogwɛɛya mla ubatisim ku uwɔ gē ya ɔ tɔɔtɛ ku a lɛ ɛnɛɛnɛ ɛma olɔhi mla Ujehofa. (Aíjē 91:1) É klla lɔfu hɛ alɔ ta duu. (1 Upít. 3:21) Ɛgɛnyá nɛ a gáā jɛ gɔbu ku aɛga nyā kóō tɔɔtɛ gā uwɔ a?

Le mafu lɛ iyi uwɔ peee ka ɔkwɛyi a yɔ a. Eko duuma nɛ aɔka gā ipu ɔtu ku uwɔ, jila aɛlā má abɔyi uwɔ ku a dɔka ohi ku aɔka a. (Uróm 12:2) Dɔka ɔwɛ nɛ a géē ya opiyabɔ, opiyabɔ nɛ a kē yɔ i ya kóō wɛ ku a dɔka ō ya ɔdā nōo géē he Ujehofa ɔtu a ya a. (Aíit. 27:11; Āfi. 4:23, 24) Gbɔɔkɔ lɛ Ujehofa eko doodu kóō ta uwɔ abɔ. Le jé peee ka Ujehofa géē lɔfu ta uwɔ iyē klla géē ta uwɔ abɔ mla alelekwu ihɔ olɔfu ku nu. (1 Upít. 5:10, 11) Ō ceyitikwu duuma nɛ a ya a cika jɛ. Ō gba Ujehofa ɛ̄gbā wɛ ɔwɛ olɔhi fiyɛ duu ipu oyeeyi a!—Aíjē 16:11.

LƐ UVIDIO NYĀ MAFU NŌO KAHINII: ƆWƐ NŌO I BI ƆCƐ GĀ UBATISIM, CƐƐ AA LƐ ƆKA NŌO BA NYĀ CILA:

• Ojama nyá nɛ ācɛ ōhī behe nu o ya ɛɛ kéē lɛ ubatisim ya a?

• Ɛgɛnyá nɛ a gáā lɛ ɔtu okpoce nōo cɛgbá o ya ɛɛ ku a lɛ iyi uwɔ gwɛɛya lɛ Ujehofa a?

• Ɔdi je ɔfu tu ācɛ ōhī iyē kéē ya ɔdā néē cɛgbá ō ya o ya ɛɛ kóō tɔɔtɛ lɛ uwa ō lɛ ubatisim ya a?

• Ɛgɛnyá nɛ Ujehofa gē hɔha cɛ ācɛ nōo le miya ō gba ɔ ɛ̄gbā a?

• Ɔdi wɛ ɛyi ku ogwɛɛya mla ubatisim a?