Ujehofa gē má okonu ō ce ku ɔba mla ɔnyā kóō wɛ odee ku ija ŋ. Ó ka ɔba mla ɔnyā kéē ba tɔha mla iyi uwa piii. (Umát. 19:5, 6) Ó lɛ ocabɔ olɔhi alɛwa kōō ba tɔha ku ɔba mla ɔnyā ɔtahɛ ku ācɛ ō gba Ujehofa ɛ̄gbā. Naana a, ó lɛ ō ba tɔha ku ɔba mla ɔnyā duuma nōo le joojila ŋ. Unwalu gē yɔ. Alɔ i cika ō cɛtɔha mla ɛlá ō gbo nōo kpɔ icɛ, nōo ka ɔdaŋ ka ɔba mla ɔnyā lɛ unwalu lɛ ɔtahɛ iyi uwa, é lɔfu ta iyi uwa amāŋ kwu kɔ hɛ iyi uwa ta o ya ɛɛ ku unwalu a kóō mɛ ŋ. Ɛgɛnyá nɛ ɔba mla ɔnyā nōo wɛ Ācɛ O Yɛce Ukraist géē gbo o ba tɔha ku uwa tu a?

Leyi yɛ ɔwɛ ɛhɔ nōo cɛgbá nyā.

1. Gbo ɔtu ku uwɔ ŋma lɛ ō habɔ aodee bɛɛka ɔkɔ ō ta tu ɔcɛ ɔhá mla ɔnyɛ ō jé nōó kpaakpa ŋ ma ta, ó gē ya ka ō ba tɔha ku ɔba mla ɔnyā kóō lɔfu iyē gɛ ŋ.—Umát. 5:28; 2 Upít. 2:14.

2. Lɔfu tu ɛma ku uwɔ mla Ɔwɔico iyē, ku a klla ceyitikwu ya kóō ŋmo uwɔ unwu ō ya ɔdā nōo he Ujehofa ɔtu ipu ō ba tɔha ku uwɔ.—Aíjē 97:10.

3. Ceyitikwu ku a yɔ i lɛ auce ɛyipɛ a wiiye, ku a klla yɔ i ya aɔdā ogbonɛnɛ ɔwɛ ō ligii duuma nōo tɔɔtɛ gla, ɛnyā géē cɛ lɛ oyeeyi tɔɔtɛ lɛ ɔba amāŋ ɔnyā uwɔ.—Ukól. 3:8-10, 12-14.

4. Ceyitikwu ku aa yɔ i ka ɛnɛɛnɛ ɔka mla iyi aa ɔwɛ ojilima.—Ukól. 4:6.

5. Ɔba mla ɔnyā cika ō ya ukpɛ ku ɔdā néē cika ō ya lɛ iyi uwa ipu ihɔtu ɔkwɛyi.—1 Ukɔ́r. 7:3, 4; 10:24.

Eko nɛ Ācɛ O Yɛce Ukraist lɛ ojilima ce ō ba tɔha ku uwa, é yɔ i lɛ ojilima ce ɔcɛ nōo wɛ Ohutu kōō ba tɔha ku ɔba mla ɔnyā nōo wɛ Ujehofa a.

LƐ UVIDIO NYĀ MAFU NŌO KAHINII: ALƆ CIKA O “KWINYA MLA ƆTOOLE”—YƐCE INE KU INYA O KWU, CƐƐ AA LƐ ƆKA NŌO BA NYĀ CILA:

• Naana nɛ ō ba tɔha ku ɔba mla ɔnyā lɔfu gbɔɔ ɔwɛ olɔhi a, ɔdi lɔfu wɛ unwalu ōhī nōo gē bɛɛcɛ igbihaajɛ a?

• Ɛgɛnyá nɛ aukɔ́ ku Ubáyíbu lɔfu ta ɔcɛ nōo gbɛla ka ihɔtu i yɔ ipu ō ba tɔha ku uwa ŋ ma abɔ a?

• Aíne ɛyɛɛyɛyi nyá nɛ Ujehofa le kwaajɛ ka ō ba tɔha ku ɔba mla ɔnyā a?

• O ya ɛɛ ka ō ba tɔha ku ɔba mla ɔnyā kóō yɔ i nyɔ mɛɛlɛ a, ɔdi nɛ uwa ɛplɛɛpa cika ō ya a?