Ɔdiya nɛ alɔ gē jɔɔnyɛ ojileyi nɛhi ku ihayi doodu lɔɔlɔhi a? Lɛbɛɛka ācɛ Isrɛlu ku ikee a, aojileyi nɛhi ku alɔ gē jɛga lɛ alɔ ō gba Ujehofa ɛ̄gbā tɔha mla ayinɛ alɛwa. Alɔ gē jɔɔnyɛ aɛlā nɛ alɔ gē nwu nōo gē ta alɔ abɔ tubla Ujehofa ajaajɛ a. Alɔ klla gē jɔɔnyɛ ɛnɛɛnɛ eko nɛ alɔ gē lɛ ō yɔ tɔha mla aɔkpa mla ācɛ apɔlɛ ku alɔ a. Ohigbu ɛgɛ nɛ ojileyi a jɛ alɔ eyī lɛ a, alɔ gē dɔka ō jɔɔnyɛ ɛ̄cī ɛta ku ojileyi nɛhi a.

Eko duuma nɛ alɔ lɛ ɛga ō jila tɔha lɛ a, alɔ i cika ō gbɛla lɛyikwu ɛgɛ nɛ alɔ géē lɛ itene lɛ iyi alɔ foofunu ŋ, amáŋ ɛgɛ nɛ alɔ géē mafu ihɔtu lɛ ācɛ ɔhá duu. (Ugal. 6:10; Uhíb. 10:24, 25) Eko duuma nɛ alɔ lɛ abɔ bi ɔwɛ ku ayinɛ alɔ kéē gáā yɛ amāŋ lɛ ɛga ku ɔcí nɛ alɔ cɛgbá nu foofunu a kwu taajɛ, alɔ yɔ i mafu ku alɔ bi ācɛ ɔhá ipu ɔtu duu. (Ufíl. 2:3, 4) Aojieyi nɛhi gē jɛga lɛ alɔ ō lɛ aɔkpa ɛyipɛ. Gbɔbu ɛɛ ku ōmiya ku ojileyi a kóō gbɔɔ amāŋ igbihi nōó le ŋmɛyi amāŋ ɛpleeko nɛ alɔ yɔ i mlɛnyɔ ku ɔlɛɛnɔ a, alɔ lɔfu le miya ō kɛla mla ɔcɛ nɛ alɔ i jé jeeje ɛ ŋ klla kwu piya ɔkpa ku nu. (2 Ukɔ́r. 6:13) Ɛma nɛ alɔ gbɔɔ mla ɔcɛ a ipu ojileyi nɛhi a lɔfu yɔ piyoo! Ofiyɛ duu a, eko nɛ ācɛ nōo yɔ ɛcɛ a má ɛgɛ nɛ alɔ yɔ i mafu ihɔtu ɔkwɛyi a, é lɔfu le miya ō gáā gbɔɔ ō gba Ujehofa ɛ̄gbā mla alɔ duu.—Ujɔ́n. 13:35.

LƐ UVIDIO NYĀ MAFU NŌO KAHINII: “IHƆTŪ Í GĒ MƐ GBÓÓGBÓŌ Ŋ́”! OJILEYI NƐHI KU ĀCƐ ŊMA ÉWO ƐYƐƐYƐYI, CƐƐ AA LƐ ƆKA NŌO BA NYĀ CILA:

• Ojileyi nɛhi ku ācɛ ŋma éwo ɛyɛɛyɛyi néē ya ipu ihayi ku 2019 a, ɛgɛnyá néē mafu ihɔtu lɛ ayinɛ nōo wa ŋma éwo ɔhá a?

• Ɔdiya nɛ opiyatɔha mla ihɔtu nōo yɔ ɔtahɛ ku ācɛ o gba Ujehofa ɛ̄gbā a teyi peee a?

• Aya nyá ku ihɔtu nɛ Ācɛ O Yɛce Ukraist gē mafu nɛ Ígwu Nōo Gē Leyi Kwu Ɔwa Ku Alɔ a kɛla lɛyikwu ɔ a?

• Ɛgɛnyá nɛ ihɔtu ku Ācɛ O Yɛce Ukraist ya ku ayinɛ alɔ kéē piyatɔha ipu éwo ku Germany mla South Korea a?

• Ɔdi nɛ alɔ cika ō miya ō ya babanya a?