Alɔ lā ipu ɛcɛ nɛ ācɛ yɔ i ceyitikwu yɔ i hi ɔdobɔbi ka ɔdā olɔhi klla yɔ i hi ɔdā olɔhi ka ɔdobɔbi. (Ayis. 5:20) Ó klla wɛ ɔdā okwiye ka ācɛ ōhī gē ya ɔdā nōo gē wu Ujehofa ɔtu, bɛɛka acɛnyilɔ nōo gē cikpo acɛnyilɔ mla ācɛnya nōo gē cikpo acɛnya. Ayipɛ inɔkpa amāŋ ācɛ ɔhá géē lɔfu yɔ i ceyitikwu kéē kwu ayipɛ ɔlɛ alɔ kéē yɛce ɔwɛ néē gē lā oyeeyi a. Ɛgɛnyá nɛ alɔ gáā tu ayipɛ ɔlɛ alɔ tu kéē ya ojama ɛgɛnyā mla ojama ɔhá lé mɛɛlɛ a?

Nwu ayipɛ ɔlɛ uwɔ ɔwɛ nɛ Ujehofa tine kéē lā oyeeyi a. (Ulīf. 18:3) Ɛmɛɛma da uwa ɔdā nɛ Ujehofa ka lɛyikwu ɔcɛnyilɔ mla ɔcɛnya nōo cika ō gwuta mla iyi uwa. Ɛlā nɛ a kēe gáā da uwa cika ō cɛtɔha mla ihayi ku uwa mla ɛlā néē jɛyi nu gla a. (Obla. 6:7) Da iyi uwɔ kahinii: ‘N le nwu ayipɛ ɔlɛ um ɔwɛ néē géē mafu ihɔtu ɔwɛ olɔhi, itene kóō bi ili nōo le kpaakpa mla ɔdā nōo ya nɛ ācɛ cika ō lɛ ojilima ce uwa eko néē dɔka ō yɔ foofu uwa a? Ayipɛ ɔlɛ um géē jé ɔdā ō ka amāŋ ɔdā ō ya eko duuma nɛ ɔcɛ dɔka ō ma ifoto ku ɔcɛ ō ta ohɛɛwa fu lɛ uwa amāŋ da uwa kéē ya ɔdā nɛ Ujehofa kéē hii ya ŋ?’ Ō jé ɔdā nɛ Ujehofa tine kéē ya a géē hɛ uwa ta ŋma unwalu alɛwa. (Aíit. 27:12; Ɔ̄cok. 7:12) Ɔdaŋ ka alɔ gē nwu ɔyipɛ ɔlɛ alɔ ɛlā ku Ujehofa, alɔ yɔ i mafu ku ɔhā nɛ Ondu a hɛ ce alɔ a jɛ alɔ eyī nɛhi.—Aíjē 127:3.

LƐ UVIDIO NYĀ MAFU NŌO KAHINII: LƐ APƆLƐ OLƆFU KWAAJƐ—GBO AYIPƐ ƆLƐ UWƆ ŊMA ƐGIYI “ƆDOBƆBI,” CƐƐ AA LƐ ƆKA NŌO BA NYĀ CILA:

• Ɔdiya nɛ ācɛ ōhī i gē dɔka ō nwu ayipɛ ɔlɛ uwa lɛyikwu ɔcɛnyilɔ mla ɔcɛnya nōo cika ō gwuta mla iyi uwa ŋ ma a?

• Ɔdiya nɛ adā mla ɛ́nɛ́ cika ō nwu ayipɛ ɔlɛ uwa klla ‘bi uwa jɛ ɔwɛ ku Ujehofa a’?—Āfi. 6:4

• Ɔdi nɛ ɔwa ku Ujehofa je lɛ adā mla ɛ́nɛ́ kóō ta uwa abɔ nwu ayipɛ ɔlɛ uwa ɔdā nɛ ɔcɛnyilɔ mla ɔcɛnya ō gwuta mla iyi uwa wɛ a?—w19.05 12, ikpati

• Ɔdiya nɛ a cika ō yɔ i kɔka mla ayipɛ ɔlɛ uwɔ ojigogo gbɔbu ɛɛ kéē má unwalu a?