Ihayi doodu, ācɛ ɔlɛ Ujehofa gē leyice ɛ̄cī néē géē ya oblatu ku ikwū ku Ujisɔsi tɔha. Alaadi gbɔbu lɛ eko ku oblatu mla igbihi ku oblatu a, alɔ gē bi ɛnɛɛnɛ ɛga nɛ alɔ lɛ a le ta Ujehofa ahinya ohigbu ɔyi nu nɛ ó je gwɛɛya ohigbu alɔ a. (Āfi. 1:3, 7) Ocabɔ mafu, alɔ gē ceyitikwu lɔɔlɔhi ō hi ācɛ ɔhá igwú wa oblatu a. Ācɛ ōhī lɔfu ta ōmiya ku uwa ya o ya ɛɛ kéē lɛ ɛga ō wɛ ɔcɛ ō gbɔbu ɔna ō ta ŋma eko ta eko ipu Ɔya Ɔmɛta mla Ɔya Ɔmɛnɛ. Ipu ɔya ɛpa nyā, é lɔfu miya ō bi awa ofu ce igwo (30) amāŋ awa ofu ɛpa ce igwo (50) le yuklɔ gla. A géē dɔka ō bi eko nwune fiyɛ le yuklɔ ipu uklɔ ku ɔna o ta ɛpleeko ku oblatu a? Ɔdi gáā tu uwɔ abɔ ō ya ɛnyā a?

Igbalɛwa, alɔ gē ya nwune fiyɛ ɔdaŋ ku alɔ lɛ ōmiya a ya taajɛ. (Aíit. 21:5) Abɔ eko ku oblatu a i gboji gɛ ŋ ma, babanya wɛ eko nɛ alɔ lɔfu gbɔɔ ō ya ōmiya a. Gbɛla tu ɛgɛ nɛ a géē ya lɔhi fiyɛ ipu uklɔ ku ɔna ō ta eko ku oblatu a, klla ya ɔdā nɛ a ya gla a o ya ɛɛ ku a lɛ ɔdā nɛ a miya ya kwɛyi. Cɛɛ a gbɔɔkɔ lɛ Ujehofa kóō hɔha ce ō ceyitikwu ku uwɔ.—1 Ujɔ́n. 5:14, 15.

A gbɛla tu aɔwɛ nɛ a lɔfu nyila uklɔ ku ɔna ō ta ku uwɔ ɛpleeko ku oblatu a?