Ɔdiya nɛ a cika ō le tutu a? Ōcē amāŋ unwalu ku ɔkpiye nōo lɔfu ya kéē bi ɔcɛ gā inɛci lɔfu ya eko nɛ ɔcɛ i kóō leyice ŋ. Ohigbu ɔɔma, gbɔbu ɛɛ ku ɔdā acigili kóō géē ya ceyitikwu ku a bi aɔdā ɛyɛɛyɛyi nōo yɔ a le yuklɔ, o ya ɛɛ ku a miyɛ ɛcí olɔhi fiyɛ duu eko duuma nɛ a gbɔɔ ō doōcē amāŋ lɛ unwalu ku ɔkpiye. Ɔdaŋ ku a le ya lɛ a, ó géē mafu ka oyeeyi he uwɔ ɔtu, ku a klla le ojilima ce íne ku Ujehofa lɛyikwu oyi.—Ācot. 15:28, 29.

Ɔdi nɛ a géē ya ku a le tutu a?

• Lɛ ɔkɔ gba klla le eko taajɛ lɔɔlɔhi ku a lɛ abɔ ta ɔkpá ku durable power of attorney (DPA). a Ācɛ o tɔɔna ɛlɔɔwɔico nōo lɛ ubatisim ya ɛɛ lɔfu miyɛ ukard ku DPA a ŋma ɛgiyi ɔcɛ nōo gē leyikwu aɔkpá ipu ujɔ a lɛ iyi uwa, é klla lɔfu miyɛ u Identity Card (ic) lɛ ayipɛ nɛ̄ŋcɛ́ ku ɔlɛ uwa duu

• Ɔdaŋ ku a yɔ ipu, le da anyakwɔcɛ ku ujɔ ku uwɔ kéē lɛ u Information for Expectant Mothers (S-401) je gā uwɔ. Ɔkpá nyā géē ta uwɔ abɔ ku a ya ōmiya olɔhi lɛyikwu ōcē amāŋ unwalu duuma nōo lɔfu wa eko nɛ a yɔ ipu mla eko nɛ a klla gáā ma ɔyi

• Ɔdaŋ ku a cɛgbá ō ya ōmiya ku ɛcí ō miyɛ nōo lɔfu lɛ ō ya mla oyi amāŋ ō yɔ ipu inɛci, le da anyakwɔcɛ ku ujɔ ku uwɔ taajɛ ku a klla le da ācɛ inɛci a ka ɔnyakwɔcɛ ku ujɔ ku Ācɛ Ocijali Ku Ujehofa géē wa gā má anuɔ

Ɛgɛnyá nɛ anyakwɔcɛ ku ujɔ gáā ta abɔ a? É lɔfu ma ɔwɛ fu gā uwɔ ɛgɛ nɛ a géē ta ɔdā ɛyɛɛyɛyi ta ipu ukard ku uwɔ nōo lé ka u DPA a. Naana kpɔ a, anyakwɔcɛ ku ujɔ a i gáā da uwɔ ɛdɔ ku ɛcí nɛ a cika ō miyɛ a ŋ. É klla gáā da uwɔ ɛgɛ nɛ ɔtu gē ya uwa lɛ ipu ɔdā nɛ ɔnyɔɔnyɛ cika ō miya abɔyinu ŋ duu. (Uróm 14:12; Ugal. 6:5) Ɔdaŋ ku a le da anyakwɔcɛ ku ujɔ ku uwɔ lɛyikwu āhɔ̄ ku ɛcí ō miyɛ nōo lɔfu lɛ ō ya mla oyi ō miyɛ, é gáā kpo eko bonu ō le da u Hospital Liaison Committee (HLC) kwɛyi uwɔ ŋ.

Ɛgɛnyá nɛ HLC lɔfu ta abɔ a? É lɛ ayinɛ nōo yɔ ipu igwú ku HLC a tutu, o ya ɛɛ kéē je otabɔ lɛ ācɛ nōo yɔ aya ku ɛcí mla aya ku ɛpɔ ō ka kéē jé ɔdā nɛ̄ ɛ̄gbā ō gba ku alɔ je ō ya lɛyikwu oyi ō miyɛ a. É géē kɛla mla ɔcɛ nōo yɔ i je ɛcí gā uwɔ a, lɛyikwu ɔwɛ nɛ a lɔfu miyɛ ɛcí nɛ a gáā miyɛ oyi ŋ. Ɔdaŋ kóō cɛgbá, é géē tu uwɔ abɔ dɔka idɔkitɔ nōo géē cɛtɔha mla uwɔ abɔ á ge miyɛ oyi ŋ ma.

LƐ UVIDIO NYĀ MAFU NŌO KAHINII: ƐGƐ NƐ A GÉĒ YA ŌMIYA KU ƐCÍ Ō MIYƐ NŌO LƐ Ō YA MLA OYI, CƐƐ AA LƐ ƆKA NŌO BA NYĀ CILA:

• Ɔdi nɛ a nwu ŋma ipu uvidio nyā nōo géē ta uwɔ abɔ ku a le tutu babanya lɛyikwu ōcē amāŋ unwalu ku ɔkpiye nōo lɔfu ya acigili nōo lɛ ō ya mla oyi ō miyɛ a?

  Your answer