Gbɛla ku a lā ipu Ugalili eko ku Ujisɔsi a. A nyɔ gā Ujerusalɛm o gáā lé ucɛ ku aaklɔkpɛ a. Igeli a le mu mla ācɛ o gba Ɔwɔico ɛ̄bgā nōo ŋma éwo oligbo ɛyɛɛyɛyi. A kē dɔka o gwɛɛya lɛ Ujehofa. Anu nɛ a bi ɛwu yɔ i nya o bu ipu ɛwa nɛhi ō ya ɛɛ ku a nyɔ gā agblihɔ a. Abɔ a le fu ajɛ a, a má ku agbilhɔ a le mu mla ācɛ nōo wa gáā gwɛɛya duu. Ɔga yoo, ɔgba gáā ce uwɔ ō je ɛwu ku uwɔ lɛ ɔcogwɛɛya ɛ. Boobu ɔɔma, a gáā blakwu ɔyinɛ uwɔ éyi nɛ a bi ɛlā mla ɔ nōo kē lɔfu yɔ ipu ɛwa a amāŋ ipu igeli a. Ujisɔsi mafu ɔdā nɛ a cika o ya a. (Jé Umátiyu 5:24.) Ɛgɛnyá nɛ awɔ mla ɔyinɛ uwɔ nɛ a bi ɛlā mla ɔ a gáā ya ɛbɔ ɛgɛ nɛ Ujisɔsi ka a? Ipu ɛlā nōo yɔ ɛhaajɛ nyā a, lɛ ɔgba pi ɛ̄nɛ̄ o kpaakpa o ya a.

A CIKA O . . .

• kɛla mla ɔyinɛ uwɔ foofunu, ɔdaŋ ku a gbɛla kóō cika o cɔnu mla uwɔ ɔkwɔɔkwɛyi

• lɛ ɛlá o gbo ku ɔyinɛ uwɔ piyabɔ, ɔdaŋ ku a gbɛla kóō yɔ i je ɛlā a fiyɛ ɔfu amāŋ kóō lɛ abɔ ipu unwalu a duu

• jahɔ tu ɔyinɛ uwɔ lɔɔlɔhi abɔ o yɔ i kɛla nōo yɔ ipu ɔtu ku nu a, ɔdaŋ ka kóō jé ɛyi ɛlā a lɔhi ŋ naana, ta ɔ ŋŋma ŋma ɔtu ku uwɔ ohigbu ɔtu nōo biya lɛ ɔ a amāŋ ohigbu ɔdā nɛ á kweyigede ya ŋ ma

ƆYINƐ UWƆ CIKA O . . .

• da ayinɛ alɔ nōo yɔ ipu ujɔ lɛyikwu ɛgɛ nɛ a biya ɔ ɔtu lɛ a o ya ɛɛ kéē cɛtra ɔ

• kɛla gā uwɔ ipu anya, kɛla lɛyikwu ɛjɛɛji ɔdā nɛ a ya ɔ nōo biya ɔ ɔtu a, klla dɔka ku a cɛ piii ka awɔ ya bɔbi a

• má ɛgɛ nɛ a ta iyi uwɔ waajɛ klla lɛ ɔtu o gáā ya ɛbɔ mla ɔ, cɛɛ kóō kwu ya uwɔ ɛhi ŋma ɔtu

Naana nɛ ɛ̄gbā o gba ku alɔ babanya i lɛ o ya mla ɛbɛ o le gwɛɛya ŋ ma, ɔdi nɛ Ujisɔsi yɔ i nwu alɔ lɛyikwu o ya ɛbɔ mla ayinɛ alɔ mɛmla ɛ̄gbā nɛ Ɔwɔico gē miyɛ a?