ƐGƐ NƐ ĀCƐ O YƐCE UKRAIST GĒ LĀ OYEEYI
Ō Tɔɔna mla O Nwu Ācɛ Ɛlā Cɛgbá Nɛhi Ɔdaŋ Ku Alɔ Dɔka O Lɛ Ācɛ Piya Ayikpo Ku Ukraist
Ujisɔsi je ɔ́da lɛ ayikpo ku nu kéē nyɔ gáā lɛ ācɛ piya ayikpo ku nu. (Umt 28:19) Ō yuklɔ nyā kē lɛ o ya mla o nyɔ i tɔɔna ɛlā Ɔwɔico mla ō nwu ācɛ ɛlā. Ɛjɛɛji alɔ cika o bēē da iyi alɔ ɔka nyā eko doodu kahinii, ‘Ɛgɛnyá nɛ um gáā ya ka n ya lɔhi fiyɛ ipu uklɔ o lɛ ācɛ piya ayikpo ku Ukarist nōo cɛgbá nɛhi a?’
Ō TƆƆNA
Ikɔkɔ o yɔ i gbeyi ku ācɛ kóō wa i ta alɔ a, alɔ cika o ceyitikwu gā ɛcɛ gáā tɔɔna o ya ɛɛ ku alɔ dɔka “ɛ́nɛ́nɛ̄” ācɛ nōo géē jahɔ tu alɔ. (Umt 10:11) Eko duuma nɛ alɔ gē yuklɔ ku ɔna o ta a, alɔ gē leyi taajɛ o ya ɛɛ ku alɔ kɛla Ɔwɔico lɛ ācɛ nōo ‘hɛdeele i yɛ abɔɔ a’? (Acot 17:17) Upɔlu kɛla Ɔwɔico jaa gbeeko nōó kwu Ulidiya u piya ɔcɛ o yɛce Ukraist.—Acot 16:13-15.
“Nyi īkpɔ́dɛ̄hɔ̄ kú uwɔ eko dóódu” (Ɔ̄co 11:6)
AA MÁ AUVIDIO NŌO KA KAHINII A “HABƆ” O TƆƆNA KU ƆKOOLƆHI A TA Ŋ” —EKO NƐ A TUTU O TƆƆNA Ŋ MLA O ŊMA ƆLƐ GĀ ƆLƐ, ƆDAŊ KU AA LƐ Ɔ MÁ MƐ, AA CILA AƆKA NŌO BANYA:
-
Ɛgɛnyá nɛ Usamuwɛlu ceyitikwu mafu ɛ̄cī doodu ka ó dɔka nyi ikpo ku ɔkwɛyi ipu ɔtu ku ācɛ a?
-
Ɔdiya nɛ alɔ cika o yɔ i ceyitikwu yuklɔ lɔɔlɔhi ipu ɛjɛɛji aya ku uklɔ ku ɔna o ta a?
-
Abɔ a gē yuklɔ ku uwɔ ɛ̄cī doodu a, ɔnyɛ nɛ a lɔfu kɛla Ɔwɔico lɛ ɔ a?
Ō NWU ƐLĀ
Ō lɛ ācɛ piya ayikpo ku Ukarist fiyɛ o je ɔkpá ku alɔ lɛ ācɛ anca kéē jé. Ó cɛgbá ku alɔ cigbihi kpɔ nyɔ i má ācɛ nɛ alɔ kɛla Ɔwɔico lɛ uwa a klla gbɔɔ oklɔcɛ ku Ubáyíbu tɔha mla uwa o ya ɛɛ kéē jɛ gɔbu ipu ɛ̄gbā ō gba ku Ujehofa. (1Ukɔ́ 3:6-9) Amáŋ, ɔdaŋ ku alɔ ceyitikwu yɔ i nwu ɔcɛ ɔkwɛyi lɛyikwu Ajɔɔcɛ ku Ɔwɔico nōó kē lɛbɛɛka ku ɛlā i gē gā ipu ɔtu ku nu ŋ bɛ? (Umt 13:19-22) Alɔ cika o ceyitikwu bēē dɔka ācɛ nɛ ɔtu ku uwa lɛbɛɛka “ajɛ olɔhi” a kpɔ.—Umt 13:23; Acot 13:48.
“Úklɔ́ kú um ipú aá lɛbɛ̄ɛka ɔ̄cɛ nōo nyi ikpɔ̄dɛ̄hɔ̄ ā. Úklɔ́ kú Apólɔsi lɛbɛ̄ɛka ɔ̄cɛ nōo gē kpó éŋkpɔ̄ tū īkpɔ̄dɛ̄hɔ̄ ā. Amáŋ Ɔwɔicō yá ɛ́ɛ́ nɛ̄ īkpɔ̄dɛ̄hɔ̄ ā gē jɛ̄ á.” (1Ukɔ́ 3:6)
AA MÁ AUVIDIO NŌO KA KAHINII A “HABƆ” O TƆƆNA KU ƆKOOLƆHI A TA Ŋ” —ƆGBƆ KU OJILA MLA O LƐ ĀCƐ PIYA AYIKPO KU UKRAIST, ƆDAŊ KU AA LƐ Ɔ MÁ MƐ, AA CILA AƆKA NŌO BANYA:
-
Ɛgɛnyá nɛ Usolo mla Umeri kpo eŋkpɔ tu ikpo ku ɛlā ɔkwɛyi nōo yɔ ipu ɔtu ku Isikɛlu mla Abigɛlu a?
-
Ɔdi nɛ alɔ cika o bi ɔtu ɔdaŋ ku alɔ yɔ i tɔɔna lɛ ɔgbɔ ku ojila mla ipu aya doodu ku uklɔ ku ɔna o ta a?
-
Ɛgɛnyá nɛ alɔ géē mafu ku ō nwu ācɛ ɛlā ɔkwɛyi a wɛ ɔdā nōo cɛgbá nɛhi o ya a?
