Oŋma ihayi nyā gɔbu, alɔ géē bēē lɛ eko nwune fiyɛ ō bi le ya otutu ku Oblatu Ku Ikwū Ku Ujisɔsi. Ɔdaŋ ku ɛ̄cī ku oblatu a gáā ta ɛ̄cī duuma ŋma ɛ̄cī Aflɛyi gā ɛ̄cī Ajuma ipu alaadi nɛɛ, ōjila ku Oyeeyi mla Uklɔ ku Alɔ i gáā yɔ ipu alaadi ɔɔma ŋ. Ɔdaŋ ka ó kē gáā tu ɛ̄cī Usati amāŋ ɛ̄cī Alaadi nɛɛ, ōjila néē i ya ɛlā ō ka tɛɛcɛ ŋma ipu Ubáyíbu mla oklɔcɛ ku Watchtower i gáā yɔ ipu alaadi ɔɔma ŋ. A géē bi eko néē le ce ɔ ɛyi nyā le yuklɔ lɔɔlɔhi? Bɛɛka ācɛ ku eko aflɛyi a, é cika ō lɛ aɔdā ōhī tutu gbɔbu lɛ ɛ̄cī ku ɛnɛɛnɛ ōjila ɔɔma. (Ulú 22:7-13; km 3/15 1) Amáŋ, ó lɛ aɔdā ɔhá nɛ alɔ cika ō ya, o ya ɛɛ ku alɔ lɛ itene ŋma ɛnɛɛnɛ ōjila nyā. Ɔdi wɛ aɔdā nɛ alɔ cika ō ya a?

• Gbɛla lɛyikwu ɔdā nōo ya ɛɛ nōó cɛgbá ku a wa oblatu a.—1Ukɔ́ 11:23-26

• Gbɔɔkɔ ku a klla gbɛla lɛyikwu ɛma nɛ a lɛ mla Ujehofa a.—1Ukɔ́ 11:27-29; 2Co 13:5

• Jé ku a klla gbɛla tu aɔkpá mla aɔdā ɔhá ku alɔ nōo kɛla lɛyikwu ɔdā nōo wɛ ɛyi ku Oblatu a.—Ujɔ́ 3:16; 15:13

Ayinɛ alɔ ōhī gē jé ɛga ku Ubáyíbu lɛyikwu oblatu a, ɛ̄nɛ̄ é gē ta ipu ɔkpá néē i hi ka Examining the Scriptures Daily a, ɔdaŋ kē lɛ ɔ jé, cɛɛ é lɛ ɛlá gbo tu ɔ lɔɔlɔhi. Ācɛ ōhī kē i jé aɛga ku Ubáyíbu nōo yɔ ipu upeji 4 mla 5 ku Ɔkpá Uklɔ ku alɔ nyā. Ācɛ ōhī klla gē jé u Watchtower ɛyɛɛyɛyi nōo kɛla lɛyikwu oblatu ku ikwū ku Ujisɔsi mla ɛdɔ ihɔtu nɛ Ujehofa mla Ujisɔsi mafu lɛ alɔ a. Ɛgɛ duuma nɛ a gē ya aku uwɔ lɛ naana, alɔ gbɔɔkɔ kóō ya ku a pi bla Ujehofa mla Ɔyi nu fiyɛ.