ƆDIYA NŌÓ CƐGBÁ A: Ujehofa nōo wɛ ɔcɛ ō nwu ɛlā fiyɛ duu a gē nwu alɔ ɛlā nōo lɔhi fiyɛ duu á. Ó gē nwu alɔ ɛgɛ nɛ alɔ géē ya ku oyeeyi ku alɔ kóō lɔhi fiyɛ, ó klla gē lɛ alɔ tutu lɛyikwu ɛcɔbu olɔhi. Alɔ i kē i gba ije lɛ ɔ ku ɛjɛɛji ɔdā nyā nōó i nwu alɔ a ŋ! (Ayi 11:6-9; 30:20, 21; Mafú 22:17) Ujehofa gē bi ɛlā nɛ ó gē nwu alɔ a, le ta alɔ tu lɔɔlɔhi, o ya ɛɛ ku alɔ lɔfu nyɔ i da ācɛ ɔhá ɛlā ku nu nōo lɔfu nya oyeeyi ku uwa ta.—2Ukɔ́ 3:5.

ƐGƐ NƐ A GÉĒ YƆ A:

• Ceyitikwu ku a ya ku a wɛ ɔcɛ ō ta iyi uwɔ waajɛ mla ɔcɛ ō ya uce okpaakpa.—Aíjē 25:8, 9

• Bi ɛjɛɛji ɛga nɛ Ujehofa gē bi le nwu uwɔ ɛlā le yuklɔ babanya, bɛɛka ō cɛ ō yuklɔ ɛyi ede, ɔdaŋ kē lɛ uklɔ a je gā uwɔ ku a ya ipu ōjila ku ɔtahɛ a

• Gbɛla lɛyikwu ɔwɛ ɛyɛɛyɛyi nɛ a lɔfu gba Ujehofa ɛ̄gbā lɔhi fiyɛ, ku a klla ya otutu nōo géē ta uwɔ abɔ ku a lɛ ɔdā nɛ a miya a ya jila.—Ufíl 3:13

• Le tutu ō leyi gwo aɔdā ōhī bonu o ya ɛɛ ku a lɔfu cika lɛ ɔdā duuma néē gáā nwu uwɔ ɛcɔbu a.—Ufíl 3:8

LƐ UVIDIO NYĀ MAFU NŌO KAHINII: ƐLĀ NƐ UJEHOFA GĒ NWU A TIILE NƐHI, ƆDAŊ KU AA LƐ Ɔ MÁ MƐ, AA CILA AƆKA NŌO BANYA:

• Ɔdi wɛ unwalu ōhī nɛ ayinɛ alɔ yale gbɔbu ɛɛ kéē lɔfu gā inɔkpa ku SKE a?

• Ɔdi nɛ inɔkpa a gē nwu ācɛ a?

• Ɛgɛnyá nɛ ayinɛ alɔ ipu ujɔ je otabɔ lɛ ayinɛ alɔ nōo ya mɛ ŋma inɔkpa nyā nōo gē tɔɔna ipu éwo ku uwa a?

• Ɔdi mla ɔdi nɛ ɔcɛ cika ō ya gbɔbu ɛɛ kóō lɔfu gā inɔkpa ku SKE a? (kr 189)

• Ŋma ipu inɔkpa ɛyɛɛyɛyi nɛ ɔwa ku Ujehofa gē bi le nwu alɔ ɛlā a, ɛnyá ɔhá nɛ a dɔka ō ceyitikwu ku a nyɔ a?