Alɔ gē bi ɔfu ku alɔ le yuklɔ ɔwɛ ijeeyi eko duuma nɛ alɔ ceyitikwu ku alɔ ya nwune fiyɛ ipu ɛ̄gbā ō gba ku Ujehofa. (1 Ukɔ́r. 9:26) Eko nɛ alɔ lɛ gbɔbu ku ɛcɛ nyā kóō wa oŋmɛyi a i nwune gɛ ŋ, ohigbu ɔɔma ō miya ɔdā nɛ alɔ géē ya ipu ɛ̄gbā ō gba ku Ujehofa géē ta alɔ abɔ bi eko ku alɔ le yuklɔ ɔwɛ ijeeyi. (Āfi. 5:15, 16) Ɛpleeko ku ɛ̄gbā ō gba ku apɔlɛ ku uwɔ, a lɔfu kɛla lɛyikwu aɔdā nɛ a géē miya ō ya ipu ihayi ku uklɔ ku ɔna ō ta ɔhá. O ya ɛɛ kóō tɔɔtɛ ga uwɔ a, ɔkpá ku ōjila nyā lɛ aikpɛyi ɛlā ɛyɛɛyɛyi lɛyikwu aɔdā nɛ a géē miya ō ya gla nɛ a lɔfu gbɛla klla gbɔɔkɔ lɛyikwu uwa.—Ujɛ́m. 1:5.

Ocabɔ, ɛjɛɛji apɔlɛ a lɔfu cɛtɔha kéē je otabɔ lɛ ɔcɛ éyi amāŋ fiyɛ ipu apɔlɛ a kóō kwu piya ɔcɛ ō gbɔbu ɔna ō ta eko doodu. Ɔdaŋ ku á jé kpɔcii ɔdaŋ ku a géē ya awa ku uwɔ jila gla ŋ, kɛla lɛ ācɛ ō gbɔbu ɔna ō ta ōhī nōo yɔ ipu ɛdɔ āhɔ̄ ekponu bɛɛka aku uwɔ a. (Aíit. 15:22) Á jé ŋ, a lɔfu da ɔcɛ ō gbɔbu ɔna ō ta éyi ɔka ɛpleeko ku ɛ̄gbā ō gba ku apɔlɛ ku uwɔ. Cɛɛ a lɛ ōmiya ɛyɛɛyɛyi nɛ a lɛ a ta taajɛ. Ɔdaŋ ku a wɛ ɔcɛ ō gbɔbu ɔna ō ta ikee gbɔbu ɛ, gbɛla tu ɔ ɔdaŋ ku āhɔ̄ ku uwɔ géē jɛga gā uwɔ babanya ō kwu piya ɔcɛ ō gbɔbu ɔna ō ta kpɔ.

Ācɛ ōhī ipu apɔlɛ ku uwɔ lɔfu je piya ɔcɛ ō gbɔbu ɔna ō ta ŋma eko ta eko ipu ɔya éyi amāŋ aɔya ōhī gla a? Ɔdaŋ ku á lɔfu iyē ŋ, a lɔfu je piya ɔcɛ ō gbɔbu ɔna ō ta ŋma eko ta eko ŋma lɛ ō bi eko ligii ɛ̄cī doodu le yuklɔ ku ɔna ō ta. Ɔdaŋ ku á lɛ eko nwune ō nyɔ gā tɔɔna ɔtahɛ ku alaadi ŋ ohigbu ku a gē yuklɔ eko doodu amāŋ a yɔ inɔkpa, a lɔfu miya ō je piya ɔcɛ ō gbɔbu ɔna ō ta ŋma eko ta eko ipu ɔya nɛ a lɛ omlɛnyɔ amāŋ ɔya nōo lɛ oŋmɛyi ku alaadi ɛhɔ. Lɛ eko nɛ a miya ō wɛ ɔcɛ ō gbɔbu ɔna ō ta ŋma eko ta eko a ta taajɛ ipu ukalenda, ku a klla lɛ ōmiya ta taajɛ duu.—Aíit. 21:5.

LƐ UVIDIO NYĀ MAFU NŌO KAHINII: LƐ ƆTU LƐ! UPAYƆNIYA, CƐƐ AA LƐ ƆKA NŌO BA NYĀ CILA:

• Ɔdi nɛ ocabɔ ku ɔyinɛ alɔ nɔnya Aamand nwu alɔ lɛyikwu ɛgɛ nɛ Ujehofa yihɔtu klla gē leyi kwu ācɛ nōo leyi gwu odee bonu o ya ɛɛ kéē gbɔbu ɔna ō ta a?