Ipu Ɔya Ɔmahaanɛ, alɔ géē yuklɔ lɔfu lɔfu o ya ɛɛ ku alɔ da ondu ɔlɛ doodu lɛyikwu oklɔcɛ ku Ubáyíbu ŋma lɛ ō bi ubrociɔ ku Jɔɔnyɛ Oyeeyi Nōó Gáā Mɛ Gboogboo Ŋ! ma le yuklɔ. Ayinɛ lɔfu ya omiya ō je piya ācɛ ō gbɔbu ɔna ō ta ŋma eko ta eko ipu ɔya ɔɔma. É kē géē ya awa 30 foofunu. Ɛgɛnyá nɛ alɔ gáā ya ɛnɛɛnɛ uklɔ ku ɔna ō ta nyā a?

• Eko Aflɛyi A: Bi igbihi ku ubrociɔ a le ya ku ɛlā a kóō he ɔcɛ a ɔtu, ku a klla ceyitikwu ya ocabɔ ku oklɔcɛ. Blakwu ācɛ nōo mafu ku ɛlā a he uwa ɔtu gbɔbu ɛ ma mla ācɛ nɛ a gē cigbihi nyɔ gā ɛgiyi uwa. Ɔdaŋ néē ka ō ta ō klɔcɛ ŋma igbihi, ɔwɛ oklɔcɛ mla ubrociɔ ɛyipɛ nyā lɔfu he uwa ɔtu. Alɔ hii lɛ ubrociɔ a ta ɔlɛ nɛ ācɛ i yɔ ŋ amāŋ ō lɛ ɔ wu ipu uleta le tɛhɔ fu ācɛ nōó mafu gbɔbu ku ɛlā a he uwa ɔtu ŋ. Ígwu Nōo Gē Leyi Kwu Uklɔ O Ya Ipu Ujɔ a lɔfu ya ōmiya ku aɛ̄cī nōó wɛ ipu ɛ̄cī nɛ ujɔ a gē tɔɔna gbɔbu ŋ ma kéē yuklɔ ku ɔna ō ta ɛ̄cī ɔɔma gla duu.

• Ɛga Ɛyɛɛyɛyi Ɔhá: Ɔdaŋ ka ujɔ ku uwɔ gē bi ukati le yuklɔ, lɛ ubrociɔ ku Jɔɔnyɛ Oyeeyi Nōó Gáā Mɛ Gboogboo Ŋ! kpo tu ɔ. Le da ācɛ nɛ ɛlā a he uwa ɔtu a ka ɔdaŋ kéē miyɛ ubrociɔ a, é kē lɔfu klɔcɛ ku Ubáyíbu mla uwa iyɛhi duu. Ya ocabɔ ku oklɔcɛ a ɔkwɔɔkwu ɔɔma amāŋ lɛ ōmiya ya ku a ya oklɔcɛ a igbihaajɛ. Ɔcɛ ō leyi kwu uklɔ ku ɔna ō ta lɔfu lɛ ōmiya ya ku ācɛ ō tɔɔna ɛlā Ɔwɔico nōo cika jɛ kéē nyɔ gā ɛga néē gē ta ɔhi, kē da ācɛ lɛyikwu oklɔcɛ ku Ubáyíbu. A lɔfu da ācɛ nɛ a gē yuklɔ tɔha mla uwa amāŋ ācɛ nɛ a yɔ i tɔɔna lɛ uwa eko nɛ á tutu ō tɔɔna ŋ lɛyikwu oklɔcɛ ku Ubáyíbu duu.

Ujisɔsi jé ɔ́da lɛ alɔ ku alɔ lɛ ācɛ “pīya ayíkpó” klla “nwū uwā” ɛlā. (Umát. 28:19, 20) Ɛnɛɛnɛ uklɔ ku ɔna ō ta nyā kóō ta alɔ abɔ ku alɔ lɛ ɔdā okpɔcii a ya kwɛyi, ō bi u Jɔɔnyɛ Oyeeyi Nōó Gáā Mɛ Gboogboo Ŋ! ma le yuklɔ.