Ujisɔsi kwū ohigbu alɔ nōo wɛ ācɛ ō ya oyabiya a. (Uróm 5:8) Ó lɛ aafu ŋ, ɛgɛnɛ Ujisɔsi mafu ka ó yihɔtu alɔ, oŋma lɛ ɛgɛnɛ ó wa i kwū ohigbu alɔ a, jɛ ɔnyɔɔnyɛ ku alɔ eyī nɛhi. Amáŋ, ekoohi, alɔ cika ō bēē bla tu iyi alɔ ka Ukraist kwū ohigbu ayinɛ alɔ duu. Ɛgɛnyá nɛ alɔ géē mafu ɛdɔ ihɔtu nɛ Ukraist lɛ, lɛ ayinɛ alɔ nōo jila iyē ŋ bɛɛka alɔ a? Ó lɛ ɔwɛ ɛta nɛ alɔ lɔfu ya ɛnyā gla. Aflɛyi, alɔ i cika ō bēē ya ɔkpa mla ācɛ nɛ alɔ mla uwa ŋma ɛga ekponu amāŋ nōo wɛ ɛgɔ alɔ foofunu ŋ. (Uróm 15:7; 2Ukɔ́ 6:​12, 13) Ɔmpa, alɔ cika ō lɛ ɛlá kwu iyi alɔ, o ya ɛɛ ku alɔ kóō hii ya odee amāŋ ka ɔdā duuma nōo géē lɔfu ya ɔcɛ ɔhá cɔnu ŋ. (Uróm 14:​13-15) Amoomɛ ku nu wɛ ka, ɔdaŋ ku ɔcɛ lɛ ɔdobɔbi ya alɔ, alɔ lɔfu wɛ ācɛ nōo gē je yɛhi fiya. (Ulú 17:​3, 4; 23:34) Ɔdaŋ ku alɔ gē ceyitikwu, o ya ɛɛ ku alɔ gbla Ujisɔsi ya ɔwɛ nōo banya, ɔhā nɛ Ujehofa géē hɛ ce ujɔ a wɛ ka, ɛbɔ mla opiyatɔha géē yɔ ipu ujɔ a.

AA MÁ UVIDIO NYĀ NŌO KA KAHINII KWU PIYA ƆCƐ NŌO LƐ OHILIPU OLƆHI! ƆDAŊ KU AA LƐ Ɔ MÁ MƐ, AA CILA AƆKA NŌO BANYA:

• Ɛgɛnyá nɛ Umiki má ujɔ ku nu eko aflɛyi a?

• Ɛgɛnyá nɛ ó gbɔɔ ō má ɔ lɛ igbihaajɛ a?

• Ɛgɛnyá nɛ ocabɔ ku Ujisɔsi ta Umiki abɔ, o ya ɛɛ kóō lɛ ɔwɛ ɛgɛ nɛ ó gē gbɛla a piyabɔ a? (Umák 14:38)

• Ɛgɛnyá nɛ ɔkpá ku Aíita 19:11 lɔfu ta alɔ abɔ, o ya ɛɛ ku alɔ kóō bēē má ayinɛ alɔ ɔwɛ olɔhi a?