Ɛpleeko nɛ Ujisɔsi yɔ i tɔɔna a, ó bi aɔdā nōo yɔ i ya ɔwɛ ɛga nɛ ó yɔ a le nwu ɛlā. (Ulúk. 13:1-5) A lɔfu bi aɔdā nōo yɔ i ya ɔwɛ ɛga nɛ a lā a le ya ku ɛlā ku Ajɔɔcɛ a kóō he ācɛ ɔtu. Igbihi nɛ a lɛ ɛlā ka lɛyikwu unwalu ku ije, amiya ɛyɛɛyɛyi, unwalu nōo yɔ i ya ɔwɛ ɛga nɛ a lā, ɛcí ō gwa ɔwɛ nōó lɔhi ŋ amāŋ aɔdā ɔhá ɛgɔɔma, lɛ ɔka nōo gē cɛ lɛ ɔcɛ gbɛla lipu lipu da ondu ɔlɛ a. A lɔfu da ɔka kahinii: “A gbɛla ku alɔ géē má oŋmɛyi ku . . . ?” amāŋ “Ɔdi nɛ a gbɛla kóō géē ya ku . . . kóō mɛ a?” Cɛɛ, a lɛ ɛga ku Ubáyíbu nōo tɛɛma kwu ikpɛyi ɛlā ɔɔma jé lɛ ɔcɛ a. Ɔdaŋ ka ɔcɛ a mafu ku ɛlā a he ɔ ɔtu, da ɔcɛ a lɛyikwu uvidio amāŋ ɔkpá éyi ŋma ipu Aɔdā Nɛ Alɔ Gē Bi Le Ya Oklɔcɛ Mla Ācɛ a. Abɔ alɔ kē yɔ i ceyitikwu ku alɔ le yɛ fu ɔtu ku ācɛ nōo yɔ ɔwɛ ɛga nɛ alɔ gē tɔɔna a, alɔ yɔ i “yá odúúdú ɛ̄nyā o yá ɛ́ɛ́ kú ɔ̄kōōlɔhi ā kóō le nyīla ga ɛga dóódu.”—1 Ukɔ́r. 9:22, 23.

Aikpɛyi ɛlā nyá gē he ācɛ ɔtu ɔwɛ ɛga nɛ a gē tɔɔna a?