Ojama lɔfu ya ku abɔ kóō hɛ alɔ iyē, ofiyɛ duu ɔdaŋ kóō le gboji ajɛ. Udefidi jé ka ɛ̄cī éyi lé ka ɛ̄cī éyi ojama nɛ ō yɔ i má ŋma ɛgiyi Usɔlu a géē wa oŋmɛyi. Ó klla jé ka anuɔ géē je piya ɔcɛ́ ɛgɛ nɛ Ujehofa cokonu a. (1 Usám. 16:13) Ɔtu okpoce ku Udefidi ta ɔ abɔ kóō gbeyicii lɛ Ujehofa kóō lɛ āhɔ̄ ku nu piyabɔ.

Ɔdaŋ ku alɔ yɔ ipu ojama, alɔ lɔfu bi ijeeyi, ɔdā ō jé amāŋ ɛlá ō gbo le piya āhɔ̄ ku alɔ abɔ gla. (1 Usám. 21:12-14; Aíit. 1:4) Naana kpɔ a, ó lɛ āhɔ̄ olɔnɔ ōhī nōo gē yɔ i gɔbu kpɔ ɔdaŋ ka alɔ kóō lɛ ɛjɛɛji ɔdā duuma nɛ alɔ lɔfu ya nōo cɛtɔha mla ukɔ́ ku Ubáyíbu a kpo ya kpɛmm. Ipu āhɔ̄ ɛgɛnyā, alɔ géē gbeyicii lɛ Ujehofa. Ó gáā gboji gɛ ŋ, ó géē ya ka owe kóō mɛ klla “nya ɛjɛ̄ɛ̄ji agīje” ŋma ikpeyi ku alɔ. (Mafú. 21:4) Ɔdaŋ ka otabɔ ku alɔ wa ŋma ɛgiyi Ujehofa amāŋ ohigbu ɔdā duuma ɔhá, odee nɛ alɔ jé kpɔcii a wɛ kahinii: Ɛjɛɛji ojama lɛ ɛ̄cī nōó géē wa oŋmɛyi. Ɛnyā gē ya ka alɔ lɛ ɔtu ō tule.

LƐ UVIDIO NYĀ MAFU NŌO KAHINII: ĀCƐ NŌO PIYATƆHA IPU ƐCƐ NƐ ĀCƐ LE KƆ IGWIIGWU, CƐƐ AA LƐ ƆKA NŌO BA NYĀ CILA:

• Unwalu ōhī nyá nɛ Ācɛ O Yɛce Ukraist nōo yɔ aya ku ɛhaajɛ ku United States má a?

• Ɛgɛnyá néē mafu ihɔtu mla ō gbeyicii a?

• Ɛgɛnyá néē gɔbu yɔ i leyi ku uwa kwu “ɔdā nōo lɔhi fíyɛ́ dúú ā”?—Ufíl. 1:10