Ujehofa dɔka ku alɔ gba ɔ ɛ̄gbā ohigbu ku alɔ yihɔtu nu. (Umát. 22:37, 38) Ihɔtu nɛ ācɛ nɛ alɔ gē klɔcɛ ku Ubáyíbu mla uwa a lɛ lɛ Ɔwɔico a gáā je ɔfu iyē lɛ uwa ō ya opiyabɔ néē cɛgbá ō ya a klla hayi kpaakpa ipu ojama duuma néē yɔ i má a. (1 Ujɔ́n. 5:3) Ihɔtu néē lɛ lɛ Ɔwɔico a gáā je ɔtu ɔɔma lɛ uwa ō ya ubatisim a.

Ta ācɛ nɛ a gē klɔcɛ ku Ubáyíbu mla uwa a abɔ kéē má ka Ɔwɔico yihɔtu uwa. Da uwa aɔka bɛɛka aɛnyā nōo kahinii: “Ɔdi nɛ ɛnyā nwu uwɔ lɛyikwu Ujehofa a?” amāŋ “Ɛgɛnyá nɛ ɛnyā ma ihɔtu ku Ɔwɔico fu gā uwɔ a?” Ta uwa abɔ kéē má ɛgɛ nɛ Ujehofa yɔ i ta eyeeye ku uwa abɔ a. (2 Úklɔ́ 16:9) Da uwa lɛyikwu ocabɔ ku ɛgɛ nɛ Ujehofa cila ɔkɔ ō gba ku uwɔ ɛ, ku a klla ta uwa ɔtu kwu kéē leyi taajɛ ku ɛgɛ nɛ Ujehofa yɔ i cila ɔkɔ ō gba ku uwa duu a. Alɔ gē gweeye nɛhi eko duuma nɛ ɔtu ya ācɛ nɛ alɔ gē klɔcɛ ku Ubáyíbu mla uwa a ka Ujehofa yihɔtu uwa, nɛ uwa abɔyi uwa klla mafu kéē yihɔtu Ujehofa klla dɔka ō wɛ ɔya ku nu.

LƐ UVIDIO NYĀ MAFU NŌO KAHINII: TA ĀCƐ NƐ A GĒ KLƆCƐ MLA UWA A ABƆ LƐ ƐMA KU ABƆYI UWA MLA UJEHOFA, CƐƐ AA LƐ ƆKA NŌO BA NYĀ CILA:

• Unwalu nyá nɛ Ɛbɛhi má a?

• Ɛgɛnyá nɛ Ɛnɛ je otabɔ lɛ Ɛbɛhi a?

• Ɛgɛnyá nōó tɔɔtɛ lɛ Ɛbɛhi ō le behe unwalu a?