Ɔcɛ nōo wɛ ɔkpa ku uwɔ wɛ “ɔcɛ nɛ aa yihɔtu iyi aa amāŋ ɔcɛ nɛ aa lɛ ojilima ce iyi aa nɛhi.” Ocabɔ, Ujonatan mla Udefidi kwu piya oklobiya nɛhi igbihi nɛ Udefidi kwu Ugoliyati i ŋmo a. (1 Usám. 18:1) Eyeeye ku uwa mafu uce ō ya nōo ya ku uwa ɛplɛɛpa kéē dɔka ō kwu piya oklobiya ku iyi uwa. Ɛnyā mafu ka oklobiya mla ɔncɛnya olɔfu gē wa ŋma lɛ ɛlā nɛ ācɛ jé lɛyikwu iyi uwa. Ō jé ɔcɛ lɔɔlɔhi gē je eko mla ō ceyitikwu. Amáŋ, ipu ɛga kɔka ku ipu intanɛti, ācɛ lɔfu je piya “ɔkpa” ŋma lɛ ō lɛ abɔ da ukɔmputa amāŋ ɔdā ō gwo uwaya ku uwa ofoofunu. Ohigbu ku ācɛ nōo yɔ ipu intanɛti a gē miya ɔdā néē gē dɔka ō ka klla gē lɛ ɛji tu lɛyikwu ɛgɛ nɛ ācɛ lɔfu jé uwa a, ó gē tɔɔtɛ lɛ uwa ō je ɔcɛ néē wɛ ɔkwɔɔkwɛyi a tayinu. Ohigbu ɛnyā a, ó cɛgbá ku a leyi kwɛɛcɛ lɔɔlɔhi ku ɛdɔ ācɛ nɛ a géē miyɛ kéē wɛ ɔkpa ku uwɔ ipu intanɛti a. Ɔdaŋ ku ɔcɛ nɛ á jé lɔɔlɔhi ŋ dɔka ō wɛ ɔkpa ku uwɔ ipu intanɛti, a hii yuufi ō ta amāŋ leyi gwu umeseji ɔɔma bonu ohigbu ku a gbɛla ku a géē biya ɔcɛ ɔɔma ɔtu ŋ. Ohigbu ɛdɔ unwalu ɛyɛɛyɛyi nōo gē bɛɛcɛ ŋma ɛga ō kɔka ipu intanɛti a, ācɛ ōhī le miya kéē gáā bi ɔ le yuklɔ ŋ duudu. Naana kpɔ a, ɔdaŋ ku a kē le miya ō bi ɛga ō kɔka ku ipu intanɛti le yuklɔ, ɔdi nɛ a cika ō bi ipu ɔtu a?

LƐ UVIDIO NYĀ MAFU NŌO KAHINII: LƐ ƐLÁ KWU ƐGƐ NƐ A GĒ YUKLƆ IPU ƐGA NÉĒ I YA ƆKPA IPU INTANƐTI, CƐƐ AA LƐ ƆKA NŌO BA NYĀ CILA:

• Ɔdi nɛ a cika ō leyi yɛ ɔ ɛɛ ku á géē ta ɔdā duuma amāŋ lɛ ifoto ta ɛga ō kɔka ku ipu intanɛti a?

• Ɔdiya nɛ a cika ō leyi kwɛɛcɛ lɔɔlɔhi eko duuma nɛ a yɔ i fu ācɛ nōo géē wɛ ɔkpa ku uwɔ ipu intanɛti a?

• Ɔdiya nɛ a cika ō lɛ ɛji ku eko nɛ a gē bi yuklɔ ipu ɛga ō kɔka ku ipu intanɛti a?—Āfi. 5:15, 16