Udefidi lɛ Ugoliyati yale ohigbu kóō gbolo ce Ujehofa. (1 Usám. 17:45) Ujehofa dɔka ō mafu ɔfu ku nu kwɛyi oduudu ācɛ nōo gē gba ɔ ɛ̄gbā a. (2 Úklɔ́ 16:9) Ɛgɛnyá nɛ alɔ lɔfu gbolo ce otabɔ nɛ Ujehofa gē je lɛ alɔ a, ikɔkɔ ō gbolo ce ɔdā nɛ alɔ má ɛ mla ɔdā ō jé ku alɔ a? Ó lɛ ɔwɛ ɛta nɛ alɔ ya ɛnyā gla:

• Gbɔɔkɔ ojigogo. A hii gbɔɔkɔ ku ō je yɛhi ku inyileyi nɛ a gē ya a ofoofunu ŋ, amáŋ gbɔɔkɔ ku ɔfu iyē ɔɔma nōo géē ta uwɔ abɔ eko duuma nɛ a yɔ i má ojama ō ya ɔdobɔbi. (Umát. 6:12, 13) A hii gbɔɔkɔ ku Ujehofa kóō hɔha ce ōmiya nɛ a le ya gbɔbu ɛ ofoofunu ŋ, amáŋ gbɔɔkɔ lɛyikwu ukɔ́ mla ijeeyi ku nu gbɔbu ɛɛ ku a ya ōmiya duuma.—Ujɛ́m. 1:5

• Lɛ ōmiya ku Ubáyíbu ō jé mla oklɔcɛ ō ya lɛ taajɛ. Jé Ubáyíbu ɛ̄cī doodu. (Aíjē 1:2) Lɛ eko taajɛ ku a gbɛla lɛyikwu aocabɔ ku Ubáyíbu, ku a bi aɛlā nɛ a nwu a le yuklɔ. (Ujɛ́m. 1:23-25) Bēē ya otutu ku uklɔ ku ɔna ō ta ikɔkɔ ō gbolo ce ɔdā nɛ a ya ŋma igbihi gbɔbu ɛɛ ma. Lɛ itene ŋma ōjila ku ujɔ lɔɔlɔhi ŋma lɛ ō ya otutu ku ōjila doodu

• Yɛce ōmiya ku ɔwa ku Ujehofa. Ceyitikwu ku a jé lɛyikwu ōmiya ɛpɛpɛ nōo yɔ i wa ŋma ɛgiyi ɔwa a, cɛɛ ku a kē le tutu ō yɛce ɔ fiya fiya. (Áluk. 9:17) Jahɔ tu anyakwɔcɛ ku ujɔ eko duuma néē ta uwɔ ukɔ́ klla da uwɔ ɔdā nɛ a géē ya.—Uhíb. 13:17

LƐ UVIDIO NYĀ MAFU NŌO KAHINII: Ó LƐ ƆDĀ DUUMA NŌO YA NƐ A CIKA Ō YUUFI Ō YA ŊMO Ŋ, CƐƐ AA LƐ ƆKA NŌO BA NYĀ CILA:

• Ɔdi ta ayinɛ nɔnyilɔ mla ayinɛ nɔnya a ufi a?

• Ɔdi kē ta uwɔ abɔ kéē lé ɔtu ku ufi ku uwa a?