Ācɛ nōo lɛ iyi uwa ya tiihɔ foofunu gáā jɔɔnyɛ ɛnɛɛnɛ ɛma olɔhi mla Ujehofa gla a. (1 Upít. 1:14-16) Abɔ ācɛ nɛ a gē klɔcɛ ku Ubáyíbu mla uwa a yɔ i habɔ uce ō ya nōó lɔhi ŋ ma ta a, é géē má itene ku nu ipu apɔlɛ ku uwa, ipu ɔkpiye ku uwa. Uwa klla géē jé ō bi ije le yuklɔ ɔwɛ ku ijeeyi.

Lɛ aíne ku Ujehofa ta uwa eyī peee, ɔdā nōo ya ɛɛ nɛ Ujehofa lɛ aíne a kwaajɛ a mla ɔdā nōo ya nōó lɔhi ō yɛce ɔdā nɛ Ujehofa ka a. Lɛ ɔtu ku uwɔ kwu ō ta ācɛ nɛ a gē klɔcɛ ku Ubáyíbu mla uwa abɔ kéē lɛ ɔwɛ néē gē gbɛla a piyabɔ. Cɛɛ, ó géē tɔɔtɛ lɛ uwa ō ya ɔdā nɛ Ujehofa dɔka kéē ya a. (Āfi. 4:22-24) Ta uwa ɔtu kwu ɔtu kéē lɔfu lɛ abɔ ci ɔdobɔbi duuma néē humayi ya gboji ɛ ma gla, mla otabɔ ku Ujehofa. (Ufíl. 4:13) Nwu uwa kéē gbɔɔkɔ lɛ Ujehofa eko duuma néē yɔ i má ojama kéē nyɔ i biya íne. Ta uwa abɔ kéē jé āhɔ̄ ōhī nōo géē wɛ ojama lɛ uwa mla ɛgɛ néē géē ceyitikwu ya kéē hii yɔ ipu āhɔ̄ nōo géē ya kóō lɔnɔ tu uwa ō ya ɔdā ō kpaakpa ŋ. Ta uwa ɔtu kwu ɔtu kéē ya aɔdā nōo géē lɛ abɔ kwu uwa iyē ɔwɛ olɔhi, ikɔkɔ ō ya ɔdobɔbi a. A géē gweeye ɔdaŋ ku a má ācɛ nɛ a gē klɔcɛ ku Ubáyíbu mla uwa a yɔ i ya lɔhi ipu opiyabɔ néē yɔ i ya mla otabɔ ku Ujehofa a.

LƐ UVIDIO NYĀ MAFU NŌO KAHINII: TA ĀCƐ NƐ A GĒ KLƆCƐ MLA UWA A ABƆ KÉĒ HABƆ UCE Ō YA NŌO BƆBI TA, CƐƐ AA LƐ ƆKA NŌO BA NYĀ CILA:

• Ɛgɛnyá nɛ anyakwɔcɛ ku ujɔ a mla Ɛnɛ mafu kéē lɛ ɔtu ce Ɛbɛhi a?

• Ɛgɛnyá nɛ Ɛnɛ je otabɔ lɛ Ɛbɛhi gɔbu a?

• Ɛgɛnyá nɛ Ɛbɛhi tine otabɔ ŋma ɛgiyi Ujehofa a?