Baịbụl kwuru na n’ime ihe niile Chineke kere dị n’ụwa, ọ bụ naanị mmadụ ole na ole ga-aga eluigwe. (Mkpughe 14:​1, 3) Ihe mere ha ji aga eluigwe bụ ka ha soro Jizọs chịa dị ka eze na ndị nchụàjà. (Luk 22:​28-30; Mkpughe 5:​9, 10) A ga-akpọlite imirikiti ụmụ mmadụ ndị ọzọ ka ha biri na paradaịs n’ụwa a.​—Abụ Ọma 37:​11, 29.

 O nweghị ebe ọ bụla na Baịbụl e kwuru okwu eluigwe ebe nkịta ma ọ bụ anụmanụ ndị ọzọ ndị mmadụ ji mere enyi na-aga ma ha nwụọ. E nwekwara ezigbo ihe mere na Baịbụl ekwughị ụdị ihe ahụ. Ụmụ anụmanụ agaghị emeli ihe ndị ga-eme ka ha ruo eruo ịbụ “ndị a kpọrọ òkù ịga eluigwe.” (Ndị Hibru 3:1) Ihe ndị so n’ihe mmadụ ga-eme ka o ruo eruo ịga eluigwe bụ ịmata Chineke na Jizọs nke ọma, inwe okwukwe, na irubere Chineke isi. (Matiu 19:17; Jọn 3:16; 17:3) Ọ bụ naanị ụmụ mmadụ ka Chineke kere ka ha nwee olileanya ịdị ndụ ebighị ebi.​—Jenesis 2:​16, 17; 3:​22, 23.

 Tupu ihe ọ bụla e kere n’ụwa enwee ike ịga eluigwe, a ga-akpọliterịrị ya n’ọnwụ. (1 Ndị Kọrịnt 15:42) Baịbụl kọrọ otú e si kpọlite ọtụtụ ndị n’ọnwụ. (1 Ndị Eze 17:​17-24; 2 Ndị Eze 4:​32-37; 13:​20, 21; Luk 7:​11-15; 8:​41, 42, 49-56; Jọn 11:​38-44; Ọrụ Ndịozi 9:​36-42; 20:​7-12) Ma e nweghị nke n’ime ha bụ anụmanụ, ha niile bụcha mmadụ.

•  Ụmụ anụmanụ hà nwere mkpụrụ obi?

•  Mkpụrụ obi ọ̀ na-anwụ anwụ?

•  Ụmụ anụmanụ hà na-eme mmehie?

•  Ọ̀ dị mma ịrụsa ụmụ anụmanụ arụrụala?

 Mba. Baịbụl kwuru na ụmụ mmadụ nakwa ụmụ anụmanụ bụ mkpụrụ obi. (Ọnụ Ọgụgụ 31:28) Mgbe e kere nwoke mbụ bụ́ Adam, e nyeghị ya mkpụrụ obi kama ọ ‘ghọrọ mkpụrụ obi dị ndụ.’ (Jenesis 2:7) Ihe abụọ Chineke ji kee mkpụrụ obi bụ: “ájá si n’ala” na “ume ndụ.”

 Ee, Baịbụl kwuru na mkpụrụ obi na-anwụ anwụ. (Levitikọs 21:11; Ezikiel 18:20) Ma ụmụ mmadụ ma ụmụ anụmanụ nwụọ, ha na-alaghachi n’ájá. (Ekliziastis 3:​19, 20) N’ikwu ya n’ụzọ ọzọ, ha adịghịzi ndụ. a

 Mba. Ime mmehie pụtara mmadụ ịda iwu Chineke n’otú o si chee echiche, lee ihe anya, ma ọ bụ mee ihe. Tupu ihe e kere eke emee mmehie, ọ ga-enwerịrị ike ikpebi ime ihe dị mma ma ọ bụ ihe dị njọ, ma ụmụ anụmanụ agaghị emeli ụdị ihe a. Ha anaghị eche echiche, kama ha na-eme ihe ọ bụla batara ha n’obi n’obere oge ha na-adịru ndụ. (2 Pita 2:12) Oge ahụ gwụ, ha anwụọ n’agbanyeghị na ha emeghị mmehie.

 Mba. Chineke nyere ụmụ mmadụ ike ịchị na ilekọta ụmụ anụmanụ ma ọ bụghị ịrụsa ha arụrụala. (Jenesis 1:28; Abụ Ọma 8:​6-8) Chineke ji ndụ anụmanụ ọ bụla kpọrọ ihe, ma nke obere ụmụ nnụnụ. (Jona 4:11; Matiu 10:29) Ọ gwara ndị na-efe ya ka ha na-elekọta ụmụ anụmanụ.​—Ọpụpụ 23:12; Diuterọnọmi 25:4; Ilu 12:10.