“Chineke wee sị: ‘Ka anyị kee mmadụ n’oyiyi anyị, ka ha dị ka anyị. Ka azụ̀ ndị juru n’oké osimiri na anụ ndị na-efegharị n’eluigwe na anụ ụlọ na anụ niile na-arị arị nọrọ n’okpuru ha, ka ha na-elekọtakwa ụwa niile.’”​—Jenesis 1:26, Baịbụl Nsọ nke Nsụgharị Ụwa Ọhụrụ.

 “Chineke wee sị, ‘Ka anyị kpua mmadụ n’onyinyo anyị, dị ka oyiyi anyị si dị; ka ha nweekwa ike n’ahụ́ azụ̀ nke oké osimiri, na n’ahụ́ anụ ufe nke eluigwe, na n’ahụ́ anụ ụlọ, na n’ahụ́ ụwa niile, na n’ahụ́ ihe niile ọ bụla na-akpụ akpụ nke na-akpụ akpụ n’elu ụwa.’”​—Jenesis 1:26, Bible Nsọ nke Union Version.

 E kere mmadụ n’oyiyi Chineke, nke pụtara na mmadụ nwere ike inwe ụdị àgwà ndị Chineke nwere, na-akpakwa àgwà ndị ahụ, dị ka ịhụnanya, obi ebere, na ikpe ikpe ziri ezi. Ọ bụ ya mere na ụmụ mmadụ ga-eṅomili àgwà ndị Chineke nwere.

 “Chineke wee sị: ‘Ka anyị kee mmadụ n’oyiyi anyị.’” Tupu Jehova Chineke a ekee onye ọ bụla ma ọ bụ ihe ọ bụla ọzọ, o bu ụzọ kee otu mmụọ ozi siri ike, onye e mechara kpọwa Jizọs. O si n’aka Jizọs, “kee ihe ndị ọzọ niile dị ma n’eluigwe ma n’ụwa.” (Ndị Kọlọsi 1:16) Jizọs na-akpa àgwà ka Jehova. Ọ bụ ya mere Baịbụl ji kwuo na Jizọs “yiri Chineke, onye a na-enweghị ike ịhụ anya.” (Ndị Kọlọsi 1:15) Ọ bụ ya mere o ji daba adaba na Chineke gwara Jizọs, sị: “Ka anyị kee mmadụ n’oyiyi anyị.”

 “Ka . . . anụ ụlọ . . . nọrọ n’okpuru ha, ka ha na-elekọtakwa ụwa niile.” E keghị ụmụ anụmanụ n’oyiyi Chineke. E keghị ha ka ha na-akpa àgwà e ji mara mmadụ dị ka ịhụnanya, e keghịkwa ha ka ha nwee akọnuche. Ma, Chineke na-elekọta ụmụ anụmanụ ndị a o kere. Ọ bụ ya mere o ji kwuo na ụmụ anụmanụ ga-anọ “n’okpuru” mmadụ. Ụzọ ndị ọzọ e nwere ike isi sụgharịa ịnọ n’okpuru mmadụ bụ, ‘mmadụ ga-enwe ike n’ahụ́ ha’ (Bible Nsọ nke Union Version) ma ọ bụkwanụ ka mmadụ ‘nwee ike ọchịchị n’ebe ha nọ’ (Baịbụl Nsọ: Nhazi Katọlik). Jehova si otú ahụ nye ụmụ mmadụ ọrụ ilekọta ụmụ anụmanụ. (Abụ Ọma 8:6-8; Ilu 12:10) Jehova chọrọ ka ụmụ mmadụ lekọta ụwa na ihe ndị dị ndụ dị na ya nke ọma.

 Jenesis isi nke mbụ na nke abụọ kọwara otú e si kee eluigwe na ụwa, nakwa otú ndụ si malite n’ụwa. Ihe niile Jehova kere dị ịtụnanya, ma, ọ bụ ụmụ mmadụ kacha pụọ iche n’ihe niile e kere eke n’ụwa. Mgbe Chineke kechara ihe, o “lere ihe niile o kere wee hụ na ha dị nnọọ mma.”​—Jenesis 1:31.

 Lee obere vidio a ka ị matakwuo banyere ihe e kwuru n’akwụkwọ Jenesis gbasara otú e si kee ihe.

 Lee obere vidio a ka ị hụ ihe akwụkwọ Jenesis na-ekwu.