“Agwala m unu ihe ndị a ka unu wee nwee udo n’ihi m. N’ụwa, a ga-akpagbu unu, ma nweenụ obi ike. Emeriela m ụwa.”​—Jọn 16:​33, Baịbụl Nsọ nke Nsụgharị Ụwa Ọhụrụ.

 “Agwala m ụnụ ihe ndị a, ka ụnụ wee nwee udo n’ime m. N’ụwa ụnụ ga-enwe mkpagbu. Ma nweenụ anụrị, mụ onwe m emeriela ụwa!”​—Jọn 16:33, Baịbụl Nsọ: Nhazi Katọlik.

 Jizọs kwuru ihe a iji mesie ndị na-eso ụzọ ya obi ike na ha ga-emeli ihe dị Chineke mma n’agbanyeghị ụdị nsogbu ha nọ na ya nakwa otú e si na-akpagbu ha.

 “Agwala m unu ihe ndị a ka unu wee nwee udo n’ihi m.” a Ihe ndị ọzọ e kwuru n’amaokwu a gosiri na udo a na-ekwu gbasara ya ebe a apụtaghị na nsogbu agaghị abịara mmadụ. Kama ihe a na-ekwu gbasara ya bụ udo nke obi. Anyị ga-enweli udo a ‘n’ihi Jizọs.’ O kwere nkwa na ya ga-ezitere ndị na-eso ụzọ ya mmụọ nsọ. Mmụọ nsọ a, bụ́ “ihe inyeaka” dị ike, ga-enyere ndị na-eso ụzọ Jizọs aka imeri nsogbu ọ bụla bịaara ha.​—Jọn 14:​16, 26, 27.

 “N’ụwa, a ga-akpagbu unu, ma nweenụ obi ike.” Jizọs tara ụkwa jaara ndị na-eso ụzọ ya ezé na ikpe n’ezighị ezi na mkpagbu bụ ụfọdụ n’ime nsogbu ga-abịara ha. (Matiu 24:9; 2 Timoti 3:12) Ma e nwere ezigbo ihe mere ha ga-eji ‘enwe obi ike,’ ma ọ bụ ‘enwe anụrị.’​—Jọn 16:33, Baịbụl Nsọ: Nhazi Katọlik.

 “Emeriela m ụwa.” “Ụwa” a na-ekwu okwu ya ebe a bụ ndị ajọ omume ha na Chineke na-adịghị ná mma. b 1 Jọn 5:19 kwuru, sị: “Ụwa niile dị n’aka ajọ onye ahụ,” ma ọ bụ Setan. Ọ bụ ya mere ọtụtụ ndị ‘n’ụwa a’ ji eche echiche, na-emekwa ihe na-adịghị Chineke mma.​—1 Jọn 2:​15-17.

 Setan na ụwa ya gbara mbọ ka Jizọs ghara imezu uche Chineke, ya bụ, ịkụziri ndị mmadụ gbasara Chineke nakwa iji ndụ ya zuru okè chụọ àjà iji gbapụta ha. (Matiu 20:28; Luk 4:13; Jọn 18:37) Ma, Jizọs ekweghị ka ha gbanwee otú o si eche echiche, o kweghịkwa ka ha mee ka ọ ghara ime ihe dị Chineke mma. O rubeere Chineke isi ruo ọnwụ. Ọ bụ ya mere o ji kwuo na ya emeriela ụwa, kwuokwa na Setan, “onye na-achị ụwa,” ‘enweghị ike n’ebe ọ nọ.’​—Jọn 14:30.

 Ihe ndị Jizọs mere kụziiri ndị na-eso ụzọ ya na ha ga-erubeliri Chineke isi, ọ bụrụgodi na a nwaa ha inupụrụ ya isi. Anyị nwere ike ikwu na ihe Jizọs na-ekwu bụ: “Ọ bụrụ na m meriri ụwa, ununwa ga-emerilikwa ya.”

 Jizọs kwuru ihe e dere n’amaokwu a n’abali bọtara ụbọchị ọ nwụrụ. Ebe ọ ma na ya na-aga ịnwụ n’oge na-adịghị anya, o ji ohere ahụ nye ndị na-eso ụzọ ya kwesịrị ntụkwasị obi ndụmọdụ ikpeazụ. E nwere ihe ndị ọ gwara ha ha kwesịrị ichebara echiche. Ụfọdụ n’ime ha bụ na ha agaghịzi ahụ ya ọzọ nakwa na a ga-akpagbu ma ọ bụdị gbuo ha. (Jọn 15:20; 16:​2, 10) Ebe Jzọs ma na ihe a nwere ike ime ka egwu jide ndịozi ya, o kwuziri ihe e dere na Jọn 16:33 iji mee ka obi sie ha ike.

 Ihe ndị Jizọs kwuru na ihe ndị o mere nwekwara ike ime ka obi sie ndị na-eso ụzọ ya ike taa. Ndị Kraịst nwere ike irubere Chineke isi ọ bụrụgodị na a na-akpagbu ha.