NDỊ NA-ETO ETO NA-AJỤ, SỊ
Gịnị Mere Papa M na Mama M Anaghị Ekwe M Kporie Ndụ?
Ndị enyi gị kpọrọ gị ka unu gaa oriri na nkwari ná ngwụcha izu a. Gị ajụọ papa gị na mama gị ma ì nwere ike ịga, ha asị gị “Mba.” Ihe a ha zara gị ejughị gị anya maka na ọ bụ ihe ha zakwara gị n’oge gara aga.
Ihe ndị e kwuru n’isiokwu a
Gịnị mere papa m na mama m anaghị ekwekarị m mee ihe m chọrọ ime?
Ọ bụrụ na ọ dị gị ka papa gị na mama gị anaghị ekwe gị mee ihe ị chọro ime, i nwere ike ịna-eche na ha achọghị ka ị na-ekpori ndụ.
Otu nwa agbọghọ dị afọ iri na-asaa aha ya bụ Marie nọ na-eche otú ahụ mgbe a zụtaara ya ekwentị ọhụrụ. Ọ sịrị: “Papa m nyere m ọtụtụ iwu. Ọ gwara m ihe ndị m ga-etinye n’ekwentị m, ndị mụ na ha ga-eji ya na-akparịta, nakwa awa ole mụ na ha ga na-akparịta. Ma, ndị enyi m nwere ike iji ekwentị nke ha eme ihe ọ bụla dị ha mma.”
Ihe ị ga-echebara echiche: Ọ̀ bụ eziokwu na papa Marie achọghị ka o kporie ndụ? Olee ihe ndị nwere ike ịbụ ihe ndị na-echegbu ya?
Ihe a na-edewe n’ụzọ iji gosi kilomita ndị na-agba n’ụzọ na-agaghị agbafe nwere ike igbochi mmadụ ife ọsọ otú ọ chọrọ, ma o nwere ike ime ka mmadụ ghara inwe ihe mberede; otú ahụ ka iwu nne na nna na-enye dị, ha nwere ike igbochi mmadụ ime ihe ụfọdụ, ma ha na-eme ka mmadụ ghara ịba ná nsogbu
Megodị ihe a: Weregodị ya na ị bụ nne ma ọ bụ nna nakwa na nwa gị na-eto eto ka nwetara ekwentị ọhụrụ. Gịnị ga na-echegbu gị? Olee iwu ndị ị ga-enye ya ka o wee ghara ịbanye ná nsogbu? Gịnị ka ị ga-ekwu ma nwa gị kwuo na ị chọghị ka ọ kporie ndụ?
“Papa m na-agwakarị m, sị, ‘Were ya na ị bụ nne ma ọ bụ nna.’ Ime ihe a nyeere m aka ịghọta uru iwu ndị ọ na-enye m bara nakwa ihe mere o ji enye ha. M mụta ụmụ, m ga-achọ ka ha debe iwu ndị ahụ papa m chọrọ ka mụnwa debe.”—Tanya.
Olee ihe m ga-eme ka ha kweta ka m mee ihe m chọrọ ime?
“O nweghị uru ịbawa mba bara, ọ ga-emekwa ka ike gwụ ma gịnwa ma ndị mụrụ gị. Ị rụwa ụka, ndị mụrụ gị ga-ewere ya na ị ka bụ nwata, ha ga-echekwa na i rubeghị ka ha hapụ gị ka ị na-apụ apụ.”—Richard.
“A na-enwerịrị ezigbo ihe mere papa m na mama m ji enye m iwu. Ha anaghị enye m iwu iji gbochie m ikpori ndụ, kama, ha chọrọ ka m kporie ndụ otú kacha mma, ya bụ, mkpori ndụ na-agaghị akpatara m nsogbu.”—Ivy.
Ihe Baịbụl kwuru: “Onye nzuzu na-ewe iwe ruo n’isi, ma onye ma ihe na-ejide onwe ya.”—Ilu 29:11.
“M na-ezoro ezoro mee ihe ndị papa m gwara m ejila ekwentị m eme. M na-ezigara ndị enyi m ozi n’ime abalị, na-etinyekwa ihe ndị papa gwara m etinyela n’ekwentị m. Ma e mechaa, ọ na-amata ihe m mere, ya enyekwuo m ọtụtụ iwu ọzọ maka na ọ tụkwasịzịghị m obi. Mmadụ izoro ezoro na-eme ihe a gwara ya emela abaghị uru.”—Marie.
“Nwee ndidi. O nwere ike iwetụ oge tupu papa gị na mama gị agbanwetụ iwu ha nyere gị, ma ọ bụrụ na ha hụ na ị na-edebe iwu ha nyere gị, ha nwere ike ịhapụ gị ka ị na-eme ihe ụfọdụ ị chọrọ ime.”—Melinda.
Ihe Baịbụl kwuru: ‘Na-erubere ndị mụrụ gị isi n’ihe niile.’—Ndị Kọlọsi 3:20.
“Isi ọnwụ agaghị abara gị uru, ọ gaghịkwa eme ka i nweta ihe ị chọrọ.”—Natalie.
“Nne na nna ọ bụla chọrọ ka nwa ha na-eche echiche ọfụma. N’ihi ya, m gwawa papa m na mama m okwu, m na-agbalị ịgwa ha ihe mere m ji chọọ ime ihe ahụ kama ikwuwe otú obi ga-adị m ma m mee ya. Oge ụfọdụ m mere ihe a, ha na-ekwe m mee ihe ahụ m chọrọ.”—Joseph.
Ihe Baịbụl kwuru: “Sọpụrụ nne gị na nna gị.”—Ndị Efesọs 6:2.
Isiokwu A Nwekwara Ike Ịmasị Gị
NDỊ NA-ETO ETO NA-AJỤ, SỊ
Olee Otú M Ga-esi Agwa Ndị Mụrụ M Okwu Gbasara Iwu Ndị Ha Nyere M?
Mụta otú i nwere ike isi jiri nwayọọ gwa ndị mụrụ gị okwu. Uru ọ ga-abara gị nwere ike iju gị anya.
AKWỤKWỌ Ị GA-EJI EDETU IHE
Chebara Iwu E Nyere Gị Echiche
Chebara iwu na-esiri gị ike idebe echiche.
KATUUN E SERE NA BỌỌDỤ
Gịnị Ka M Ga-eme Ka A Hapụ M Ịna-ekpebi Ihe M Ga-eme?
Ọ dị gị ka ì ruola ka e were gị ka onye torola eto, mana ndị mụrụ gị echeghị otú ahụ. Olee ihe ndị ị ga-eme ka ha nwee ike ịtụkwasị gị obi?
IHE NDỊ NA-ETO ETO IBE GỊ KWURU
Olee Otú M Ga-esi Eme Ka Mụ na Mpa M na Mma M Na-ekwurịta Okwu?
Ị ga-achọpụta na ọ bara ezigbo uru.
