Jehova bụ Eze kachanụ n’eluigwe na ụwa. Kemgbe ụwa, ihe o kwuru na-eme, ọ ga na-emekwa ruo mgbe ebighị ebi. Dị ka ihe atụ, ọ napụtara Jeremaya mgbe a chọrọ igbu ya. Ọ napụtakwara Shedrak, Mishak na Abednego mgbe a tụbara ha n’ọkụ, napụtakwa Daniel n’olulu ọdụm. Jehova chebekwara Esta ka o nwee ike isi n’aka ya napụta ndị obodo ya. Ọ gaghị ekwe ka ihe ọjọọ dịgide ruo mgbe ebighị ebi. Ihe ndị e kwuru na Baịbụl gbasara otu nnukwu ihe a kpụrụ akpụ na otu nnukwu osisi Nebukadneza rọrọ ná nrọ gosiri na Alaeze Chineke ga-eme ka ihe ọjọọ niile kwụsị n’oge na-adịghị anya ma chịwa ụwa niile.