Ị pụrụ ịmụta banyere Jehova site n’ịgụ Bible. Ogologo oge gara aga Chineke họọrọ ụfọdụ ụmụ mmadụ idetu echiche ya. A na-akpọ ihe ndị ahụ e deturu Bible. Taa anyị na-amụta banyere Chineke site n’ịgụ Bible. Ebe ọ bụ na ihe ndị Jehova kwuru, ma ọ bụ ozi ya, dị n’ime Bible, a na-akpọkwa ya Okwu Chineke. Anyị pụrụ ikwere ihe Bible na-ekwu n’ihi na Jehova adịghị agha ụgha. ‘Chineke apụghị ikwu okwu ụgha.’ (Ndị Hibru 6:18) Eziokwu ahụ dị n’ime Okwu Chineke.—Jọn 17:17.

Bible bụ otu n’ime onyinye ndị kachasị oké ọnụ ahịa Chineke nyere anyị. O yiri akwụkwọ ozi nke nna na-ahụ n’anya degaara ụmụ ya. Ọ na-agwa anyị banyere nkwa Chineke kwere ịgbanwe ụwa ka ọ ghọọ ebe mara nnọọ mma ibi—paradaịs. Ọ na-agwa anyị ihe o mere n’oge gara aga, ihe ọ na-eme ugbu a, na ihe ọ ga-eme n’ọdịnihu maka ụmụ ya na-ekwesị ntụkwasị obi. Ọ na-enyekwara anyị aka ịgwọta nsogbu anyị na inweta obi ụtọ.—2 Timoti 3:16, 17.

 Ndịàmà Jehova bụ ndị enyi Chineke; ha ga-enyere gị aka ịghọta ihe Bible na-akụzi. Nanị gwa ha na ị chọrọ ịmụ Bible. Ha adịghị ana ego iji mee nke a. (Matiu 10:8) Tụkwasị na nke ahụ, ị pụrụ ịga nzukọ ndị Kraịst. A na-enwe ya n’ebe ndị a na-anọ efe ofufe a na-akpọ Ụlọ Nzukọ Alaeze. Ọ bụrụ na ị na-aga nzukọ ndị Kraịst, ihe ọmụma gị banyere Chineke ga-amụba ngwa ngwa.

Ị pụrụ ịmụta banyere Chineke site n’ihe ndị o mere. Dị ka ihe atụ, Bible na-ekwu, sị: “Chineke kere eluigwe na ụwa.” (Jenesis 1:1) Mgbe Jehova kere “eluigwe,” o kere anyanwụ. Ugbu a gịnị ka nke ahụ na-agwa anyị banyere Chineke? Ọ na-agwa anyị na Jehova nwere ike dị ukwuu. Ọ bụ nanị ya pụru ime ihe dị ike dị ka anyanwụ. Ọ na-agwakwa anyị na Jehova maara ihe, ebe ọ bụ na amamihe dị mkpa iji mee anyanwụ, bụ́ nke na-ewepụta okpomọkụ na ìhè ma bụrụ nke na-adịghị anyụ anyụ.

Ihe ndị Jehova kere na-egosi na ọ hụrụ anyị n’anya. Cheedị echiche banyere ụdị mkpụrụ osisi dị iche iche dị n’ụwa. Jehova pụrụ inyeworị anyị nanị otu ụdị mkpụrụ osisi—ma ọ bụ gharadị inye anyị nke ọ bụla. Kama nke ahụ, Jehova nyere anyị ọtụtụ ụdị mkpụrụ osisi ndị na-ahaghị nhata, ndị nwere ọdịdị, ụcha na ụdị ụtọ dịgasị iche. Nke a na-egosi na Jehova abụghị nanị Chineke na-ahụ n’anya kamakwa nke na-emesapụ aka nke ukwuu, onye na-echebara ndị ọzọ echiche ma nwee obiọma.—Abụ Ọma 104:24.