Ọ bụrụ na ị chọrọ ịbụ enyi Chineke, ị ghaghị ịdị na-ekpe okpukpe nke Chineke kwadoro. Jisọs kwuru na “ndị na-akpọ isiala n’ezie” ga na-efe Chineke ofufe n’ụzọ kwekọrọ ‘n’eziokwu.’ (Jọn 4:23, 24) E nwere nanị otu ụzọ ziri ezi nke isi na-efe Chineke ofufe. (Ndị Efesọs 4:4-6) Ezi okpukpe na-eduga ná ndụ ebighị ebi, okpukpe ụgha na-edugakwa ná mbibi.—Matiu 7:13, 14.

Ị pụrụ ịmata ezi okpukpe site n’ikiri ndị na-ekpe ya. Ebe Jehova bụ ezi onye, ndị na-efe ya n’ezie aghaghị ịbụ ndị ezi mmadụ. Dị nnọọ ka ezigbo osisi oroma si amịpụta oroma dị mma, ezi okpukpe na-azụpụta ndị ọma.—Matiu 7:15-20.

Ndị enyi Jehova na-enwe nkwanye ùgwù dị omimi maka Bible. Ha maara na Bible sitere n’aka Chineke. Ha na-ekwe ka ihe ọ na-ekwu na-eduzi ndụ ha, dozie nsogbu ha ma nyere ha aka ịmụta banyere Chineke. (2 Timoti 3:16) Ha na-agbalị ime ihe ha na-akụzi.

 Ndị enyi Jehova na-egosirịta ibe ha ịhụnanya. Jisọs gosiri ndị mmadụ ịhụnanya site n’ịkụziri ha banyere Chineke, site n’ịgwọ ndị na-arịa ọrịa. Ndị na-ekpe ezi okpukpe na-egosikwa ndị ọzọ ịhụnanya. Dị ka Jisọs, ha adịghị eleda ndị dara ogbenye ma ọ bụ ndị si n’agbụrụ ọzọ anya. Jisọs kwuru na ndị mmadụ ga-amata ndị na-eso ụzọ ya site n’ịhụnanya ha na-egosirịta ibe ha.—Jọn 13:35.

Ndị enyi Chineke na-asọpụrụ aha Chineke, bụ́ Jehova. Ọ bụrụ na mmadụ ajụ ịkpọ gị aha gị, onye ahụ ọ̀ ga-abụ ezigbo enyi gị? Ee e! Mgbe anyị nwere enyi, anyị na-akpọ ya aha ya ma na-akọrọ ndị ọzọ ọtụtụ ihe ọma banyere enyi anyị ahụ. Ya mere ndị chọrọ ịbụ ndị enyi Chineke kwesịrị ịdị na-akpọ ya aha ya ma na-akọrọ ndị ọzọ banyere ya. Jehova chọrọ ka anyị na-eme nke ahụ.—Matiu 6:9; Ndị Rom 10:13, 14.

Dị ka Jisọs, ndị enyi Chineke na-akụziri ndị mmadụ banyere Alaeze Chineke. Alaeze Chineke bụ ọchịchị eluigwe nke ga-eme ka ụwa ghọọ paradaịs. Ndị enyi Chineke na-ekwusara ndị ọzọ ozi ọma banyere Alaeze Chineke.—Matiu 24:14.

Ndịàmà Jehova na-agbalị ịbụ ndị enyi Chineke. Ha na-akwanyere Bible ùgwù ma nwee ịhụnanya n’etiti onwe ha. Ha na-ejikwa aha Chineke eme ihe ma na-asọpụrụ ya, na-akụzikwara ndị ọzọ banyere Alaeze Chineke. Ndịàmà Jehova na-ekpe ezi okpukpe taa n’ụwa.