ISI NKE 10
Olee Uru Ọmụmụ Ihe Ndịàmà Jehova Ga-abara Gị?
Ò nwetụla onye gwara gị ka ị bịa ọmụmụ ihe Ndịàmà Jehova? Ọ bụrụ na ị bịatụbeghị ọmụmụ ihe anyị, ịbịa ya nwere ike ịna-eme gị obi abụọ. I nwere ike ịna-eche: ‘Gịnị ka ha na-eme n’ọmụmụ ihe ha? È nwere uru ịga ya bara? Gịnị mere m ji kwesị ịga ya?’ N’isiokwu a, ị ga-achọpụta otú ịbịa ọmụmụ ihe Ndịàmà Jehova ga-esi nyere gị aka ịbịaru Chineke nso. Ị ga-achọpụtakwa otú ịbịa ya ga-esi baara gị uru.
1. Gịnị mere Ndịàmà Jehova ji ezukọ ebe ha na-amụ ihe?
Lee ihe otu n’ime ndị so dee Baịbụl kwuru gbasara ya na ndị ọzọ izukọ ebe a na-anọ efe Chineke. Ọ sịrị: “M ga-anọ n’ọgbakọ buru ibu too Jehova.” (Abụ Ọma 26:12) N’oge a kwa, obi na-abụ Ndịàmà Jehova sọ aṅụrị ma ha gaa ọmụmụ ihe. N’ebe niile n’ụwa, ha na-ezukọ ebe ha na-amụ ihe kwa izu ka ha too Chineke, bụọ abụ, ma kpee ekpere. N’afọ ọ bụla, ha na-agakwa mgbakọ dị iche iche ka ha fee Chineke.
2. Gịnị ka ị ga-amụta ma ị bịa ọmụmụ ihe anyị?
Ọ bụ Okwu Chineke ka anyị na-amụ n’ọmụmụ ihe anyị. Anyị “na-akọwa ya nke ọma, na-emekwa ka o doo anya.” (Gụọ Nehemaya 8:8.) Ọ bụrụ na ị na-abịa ọmụmụ ihe anyị, ị ga-amụta ọtụtụ ihe gbasara Jehova nakwa ọmarịcha àgwà ndị ọ na-akpa. Ka ị na-amụtakwu otú o si hụ gị n’anya, ị ga na-abịarukwu ya nso. Ị ga-amụtakwa otú ọ ga-esi enyere gị aka ịna-enwe obi ụtọ ná ndụ.—Aịzaya 48:17, 18.
3. Olee uru ị ga-erite n’aka ndị ị ga-ahụ ma ị bịa ọmụmụ ihe anyị?
Jehova gwara anyị ‘ka anyị na-echebara ibe anyị echiche n’ihi na ọ ga-eme ka anyị na-ahụrịta ibe anyị n’anya ma na-arụ ezigbo ọrụ. Ka anyị gharakwa ịhapụ nzukọ anyị.’ (Ndị Hibru 10:24, 25) Ọ bụrụ na ị bịa ọmụmụ ihe anyị, ị ga-ahụ ndị hụrụ ibe ha n’anya n’eziokwu. Ị ga-ahụkwa ndị chọrọ ịmụta ọtụtụ ihe gbasara Chineke, otú ahụ gịnwa chọrọ ịmụta. Ị ga-anụ ka ha si n’ihe Baịbụl kwuru na-agba mmadụ niile ume. (Gụọ Ndị Rom 1:11, 12.) Ị ga-amatakwa ọtụtụ ndị na-enwe obi ụtọ ná ndụ n’agbanyeghị na ha na nsogbu dị iche iche na-alụ, ma ndị lụrụ di ma ndị lụrụ nwunye ma ndị na-alụbeghị. Ihe ndị a bụ naanị ụfọdụ n’ime ihe ndị mere Jehova ji chọọ ka anyị na-aga ọmụmụ ihe mgbe niile.
MỤTAKWUO IHE
Chọpụta otú Ndịàmà Jehova si amụ ihe nakwa ihe mere na mbọ ọ bụla ị gbara gaa ọmụmụ ihe ha efughị ọhịa.
4. Ọmụmụ ihe Ndịàmà Jehova
N’oge ndịozi Jizọs nọ n’ụwa, Ndị Kraịst na-ezukọ mgbe niile ka ha fee Jehova. (Ndị Rom 16:3-5) Gụọnụ Ndị Kọlọsi 3:16. Unu gụchaa ya, unu eleba anya n’ajụjụ a:
-
Olee otú Ndị Kraịst si efe Jehova n’oge ndịozi Jizọs nọ n’ụwa?
N’oge a, Ndịàmà Jehova na-ezukọkwa mgbe niile n’ebe dị iche iche ha na-anọ efe Chineke. Unu chọọ ịhụ otú ọmụmụ ihe ha na-adị, kpọnyenụ VIDIO a. Leekwanụ foto na-egosi ebe Ndịàmà Jehova na-amụ ihe. Unu lechaa ya, unu eleba anya n’ajụjụ ndị a:
-
È nwere ihe ị hụrụ a na-eme n’Ụlọ Nzukọ Alaeze nke ị chọpụtara yiri ihe e dere ná Ndị Kọlọsi 3:16?
-
È nwere ihe ọzọ masịrị gị gbasara ọmụmụ ihe Ndịàmà Jehova na vidio a ma ọ bụ na foto a i lere?
Gụọnụ 2 Ndị Kọrịnt 9:7. Unu gụchaa ya, unu eleba anya n’ajụjụ a:
-
Gịnị mere Ndịàmà Jehova anaghị ana ndị bịara ọmụmụ ihe ha ego?
Gị na onye gị na ya na-amụ ihe leruo anya n’ihe ndị a ga-amụ n’ọmụmụ ihe anyị ọzọ.
-
Olee ihe anyị ga-amụ nke kacha masị gị ma ọ bụ nke i chere ga-akacha abara gị uru?
Ị̀ ma ihe a?
Ị gaa na jw.org, ị ga-ahụ ebe dị iche iche anyị na-anọ amụ ihe n’ụwa nakwa oge anyị ji amụ ha.
-
A. N’ọmụmụ ihe anyị, a na-ekwu okwu si na Baịbụl, gosi anyị otú anyị ga-esi na-ekwusa ozi ọma, anyị na-elekwa vidio. Anyị na-eji abụ na ekpere amalite ọmụmụ ihe anyị, na-ejikwa ha emechi ya
-
B. E nwere oge ụfọdụ ọ na-abụ o ruo, onye ọ bụla bịara ọmụmụ ihe nwere ike iweli aka, onye a kpọrọ ya azaa ajụjụ
-
CH. Anyị na-anabata mmadụ niile, ma ezinụlọ dị iche iche, ma ndị na-alụbeghị di ma ndị na-alụbeghị nwunye, ma ndị agadi, ma ụmụaka
-
D. Ndịàmà Jehova anaghị ana ego n’ọmụmụ ihe ha. Ha anaghị ana onye bịara ọmụmụ ihe ha ụtụ, ha anaghịkwa ebugharị efere ka ndị mmadụ tụnye ego
5. Mmadụ ga na-agba mbọ ka o nwee ike na-aga ọmụmụ ihe
Chee gbasara ihe ezinụlọ a mụrụ Jizọs na ya na-eme. N’afọ ọ bụla, ha na-eji ụkwụ esi Nazaret aga Jeruselem maka ememme ndị Juu na-eme. Ha na-aga ije ihe dị ka ụbọchị atọ tupu ha eruo. Okporo ụzọ ha na-esikwa aga bụ ugwu ugwu. Gụọnụ Luk 2:39-42. Unu gụchaa ya, unu eleba anya n’ajụjụ ndị a:
-
Ì chere na ndị ezinụlọ a mụrụ Jizọs na ya na-agba mbọ ka ha nwee ike ịna-aga Jeruselem?
-
Gịnị mere ị ga-eji na-agba mbọ ka ị na-aga ọmụmụ ihe?
-
Ì chere na mbọ ọ bụla ị gbara ka i nwee ike gaa ọmụmụ ihe furu ọhịa? Maka gịnị?
Baịbụl kwuru na anyị kwesịrị iji ịga ọmụmụ ihe kpọrọ nnọọ ihe. Gụọnụ Ndị Hibru 10:24, 25. Unu gụchaa ya, unu eleba anya n’ajụjụ a:
-
Gịnị mere anyị kwesịrị iji na-aga ọmụmụ ihe mgbe niile?
ỤFỌDỤ NA-ASỊ na o zuola ma ọ bụrụhaala na ị na-agụ Baịbụl n’ụlọ gị nakwa na ọ bụghị iwu na ị ga na-aga ọmụmụ ihe iji fee Chineke.
-
È nwere amaokwu Baịbụl ma ọ bụ akụkọ dị na Baịbụl ị ga-eji gosi ebe Jehova kwụ n’okwu a?
NCHỊKỌTA
Ịga ọmụmụ ihe ga-enyere gị aka ịmụta ọtụtụ ihe gbasara Jehova. Ọ ga-emekwa ka gị na ya dịkwuo ná mma, nyekwara gị aka iso ndị ọzọ na-efe ya.
Ajụjụ ndị e ji echeta ihe a mụrụ
-
Gịnị mere Jehova ji gwa anyị ka anyị na-aga ọmụmụ ihe?
-
Olee ihe ị ga-amụta n’ọmụmụ ihe Ndịàmà Jehova?
-
Olee uru ọzọ i chere ị ga-erite ma ị na-aga ọmụmụ ihe?
IHE Ị GA-ELEBAKWU ANYA
Olee ihe ị ga-eme ma ọ bụrụ na ịga ọmụmụ ihe na-eme gị obi abụọ? Chọpụta otú ọmụmụ ihe si mechaa tọwa otu nwoke ọ na-emebu obi abụọ ụtọ.
Chọpụta otú ọmụmụ ihe si na-atọ otu nwa okorobịa ụtọ nakwa ihe o mere ka o nwee ike ịna-aga ya mgbe niile.
Chọpụta otú ịga ọmụmụ ihe na-adị ndị ọzọ.
“Gịnị Mere I Ji Kwesị Ịna-aga Ọmụmụ Ihe n’Ụlọ Nzukọ Alaeze?” (Isiokwu gbara n’Ịntanet)
Chọpụta otú ndụ otu nwoke nọbu n’òtù ndị na-eme tigbuo zọgbuo si gbanwee mgbe ọ gachara ọmụmụ ihe Ndịàmà Jehova.
“M Na-eji Égbè M Aga Ebe Ọ Bụla M Na-aga” (Ụlọ Nche, Julaị 1, 2014)
Isiokwu A Nwekwara Ike Ịmasị Gị
AJỤJỤ NDỊ MMADỤ NA-AJỤKARỊ
Olee Otú Ndịàmà Jehova na Ndị Mmadụ Si Amụ Baịbụl?
Anyị na gị mụwa Baịbụl, i nwere ike iji nsụgharị Baịbụl ọ bụla na-amasị gị. I nwere ike ịkpọ ndị ezinụlọ unu niile ma ọ bụ ndị enyi gị ka ha soro na-amụ ya.
