ISI NKE 28
Gosi na Obi Dị Gị Ụtọ Maka Ihe Jehova na Jizọs Meere Gị
Olee otú obi na-adị gị ma enyi gị nye gị onyinye mara mma? Ọ ga-abụrịrị na obi na-adị gị ezigbo ụtọ, ị na-achọkwa otú ị ga-esi kelee enyi gị maka onyinye ahụ. E nweghị onyinye a ga-eji tụnyere onyinye Jehova na Jizọs nyere anyị. Gịnị bụ onyinye ahụ ha nyere anyị? Oleekwa otú anyị ga-esi gosi na obi dị anyị ụtọ maka ya?
1. Olee otu n’ime ụzọ anyị ga-esi gosi na obi dị anyị ụtọ maka ihe Chineke na Kraịst meere anyị?
Baịbụl kwere anyị nkwa na “onye ọ bụla nwere okwukwe na [Jizọs]” ga-adị ndụ ebighị ebi. (Jọn 3:16) Gịnị ka inwe okwukwe pụtara? Inwe okwukwe abụghị naanị ikwere na Jizọs. Anyị na-esikwa n’ihe ndị anyị na-ekpebi na ihe ndị anyị na-eme egosi ma ànyị nwere okwukwe. (Jems 2:17) Ọ bụrụ na anyị esi n’ihe ndị anyị na-eme na ihe ndị anyị na-ekwu gosi na anyị nwere okwukwe, anyị na Jizọs na Nna ya, bụ́ Jehova, ga-adị n’ezigbo mma.—Gụọ Jọn 14:21.
2. Olee oge pụrụ iche anyị ga-eji gosi na obi dị anyị ụtọ maka ihe Jehova na Jizọs meere anyị?
N’abalị bọtara ụbọchị Jizọs nwụrụ, ọ gwara ndị na-eso ụzọ ya otú ọzọ ha ga-esi na-egosi na obi dị ha ụtọ maka àjà o ji ndụ ya chụọ. Ọ malitere otu ihe pụrụ iche ọ chọrọ ka ha na-eme. Baịbụl kpọrọ ya “Nri Anyasị nke Onyenwe Anyị.” A na-akpọkwa ya Ncheta Ọnwụ Jizọs. (1 Ndị Kọrịnt 11:20) Ihe mere Jizọs ji malite ihe a ọ chọrọ ka a na-eme bụ ka ọ na-echetara ndịozi ya nakwa ezigbo Ndị Kraịst niile na o nyere ndụ ya maka ha. Mgbe Jizọs na-ekwu gbasara ihe a, ọ sịrị: “Na-emenụ nke a iji na-echeta m.” (Luk 22:19) Oge ọ bụla ị gara Ncheta Ọnwụ Jizọs, ị na-egosi na obi dị gị ụtọ maka otú a na-enweghị atụ Jehova na Jizọs si gosi na ha hụrụ anyị n’anya.
MỤTAKWUO IHE
Chọpụtakwuo ụzọ ndị ị ga-esi gosi na obi dị gị ụtọ maka otú a na-enweghị atụ Jehova na Jizọs si gosi na ha hụrụ anyị n’anya. Chọpụtakwa ihe mere Ncheta Ọnwụ Jizọs ji dị ezigbo mkpa.
3. Ihe anyị ga-eme iji gosi na obi dị anyị ụtọ
Weregodị ya na o nwere onye napụtara gị mgbe mmiri na-achọ iri gị. Ị̀ ga-echefu ihe a onye ahụ meere gị? Ka ị̀ ga-achọ ụzọ ndị ị ga-esi gosi ya na obi dị gị ụtọ maka ihe o meere gị?
Ọ bụ Jehova mere ka anyị nwee olileanya ịdị ndụ ebighị ebi. Gụọnụ 1 Jọn 4:8-10. Unu gụchaa ya, unu eleba anya n’ajụjụ ndị a:
-
Gịnị mere àjà Jizọs ji ndụ ya chụọ ji bụrụ onyinye pụrụ iche?
-
Olee otú obi dị gị maka ihe a Jehova na Jizọs meere gị?
Olee otú anyị ga-esi gosi na obi dị anyị ụtọ maka ihe a Jehova na Jizọs meere anyị? Gụọnụ 2 Ndị Kọrịnt 5:15 na 1 Jọn 4:11; 5:3. Unu gụchaa amaokwu nke ọ bụla, unu eleba anya n’ajụjụ a:
-
Olee ihe amaokwu a kwuru anyị ga-eme iji gosi na obi dị anyị ụtọ?
4. Na-eme ka Jizọs
Otú ọzọ anyị ga-esi gosi na obi dị anyị ụtọ bụ ịna-eme ka Jizọs. Gụọnụ 1 Pita 2:21. Unu gụchaa ya, unu eleba anya n’ajụjụ a:
-
Olee ihe ụfọdụ ị ga na-eme iji gosi na ị na-esosi nzọụkwụ Jizọs ike?
5. Na-aga Ncheta Ọnwụ Kraịst
Unu chọọ ịhụ otú Nri Anyasị Onyenwe Anyị nke mbụ e mere si gaa, gụọnụ Luk 22:14, 19, 20. Unu gụchaa ya, unu eleba anya n’ajụjụ ndị a:
-
Olee ihe ndị e mere ná Nri Anyasị Onyenwe Anyị nke mbụ e mere?
-
Gịnị ka achịcha na mmanya e ji mee ya nọchiri anya ha?—Leruonụ anya n’amaokwu nke 19 na nke 20.
Jizọs chọrọ ka ndị na-eso ụzọ ya na-eme Ncheta Ọnwụ ya otu ugboro n’afọ n’ụbọchị dabara n’ụbọchị ọ nwụrụ. N’ihi ya, Ndịàmà Jehova na-ezukọ n’afọ ọ bụla ka ha cheta ọnwụ Kraịst, otú ahụ o kwuru ka a na-eme. Unu chọọ ịmata ihe ụfọdụ gbasara Ncheta Ọnwụ Jizọs, kpọnyenụ VIDIO a. Unu lechaa ya, unu eleba anya n’ajụjụ a:
-
Gịnị na gịnị ka a na-eme ná Ncheta Ọnwụ Jizọs?
Achịcha na mmanya e ji eme Ncheta Ọnwụ Jizọs nwere ihe ha nọchiri anya ha. Achịcha nọchiri anya ahụ́ Jizọs zuru okè o ji chụọ àjà maka anyị. Mmanya nọchiri anya ọbara ya
ỤFỌDỤ NA-ASỊ na ị nabatahaala Jizọs ka onyenwe gị na onye nzọpụta gị, a zọpụtala gị.
-
Olee otú ị ga-esi eji Jọn 3:16 na Jems 2:17 gosi na e nwere ihe ọzọ mmadụ kwesịrị ime?
NCHỊKỌTA
Otú anyị ga-esi egosi na obi dị anyị ụtọ maka ihe Jizọs meere anyị bụ inwe okwukwe na ya nakwa ịna-aga Ncheta Ọnwụ ya.
Ajụjụ ndị e ji echeta ihe a mụrụ
-
Gịnị ka inwe okwukwe na Jizọs pụtara?
-
Olee otú ị ga-achọ isi egosi na obi dị gị ụtọ maka ihe Jehova na Jizọs meere gị?
-
Gịnị mere ịga Ncheta Ọnwụ Kraịst ji dị ezigbo mkpa?
IHE Ị GA-ELEBAKWU ANYA
Olee ihe ọnwụ Jizọs kwesịrị ime ka anyị na-eme?
Mụtakwuo gbasara okwukwe na otú anyị nwere ike isi nwee ya.
“Nwee Okwukwe ná Nkwa Ndị Jehova Kwere” (Ụlọ Nche, Ọktoba 2016)
Gụọ isiokwu bụ́ “Adịla M Ọcha, Obi M Anaghịzi Ama M Ikpe,” ka ị hụ otú ndụ otu nwaanyị si gbanwee mgbe ọ mụtara uru àjà Jizọs ji ndụ ya chụọ baara ya.
Chọpụta ihe mere mmadụ ole na ole ji ata achịcha ma na-anụ mmanya e ji eme Ncheta Ọnwụ Jizọs.