IHE a na-akọkarị na tiivi, redio, na n’akwụkwọ akụkọ bụ gbasara ime mpụ, ịlụ agha, na imekpọ ndị mmadụ ọnụ. O nwekwara ike ịbụ na o nwere ọrịa gị na ya na-alụ ma ọ bụkwanụ na mmadụ nwụnahụrụ gị.

I nwere ike ịna-ajụ onwe gị, sị:

• Ọ̀ bụ otú a ka Chineke chọrọ ka ihe dịrị mụ na ndị ezinụlọ m?

• Gịnị ga-enyere m aka imeri nsogbu m?

• Ò nwere mgbe udo ga-adị n’ụwa a?

Baịbụl zara ajụjụ a niile. Ọ zakwara ha otú ha ga-edo gị anya.

• Ụmụ mmadụ agaghịzi na-aka nká ma ọ bụ na-anwụ anwụ. A gaghịzi enwe ihe mgbu.—Mkpughe 21:4

• “Onye ngwọrọ ga-awụli elu dị ka oké ele.”—Aịzaya 35:6

• “A ga-emeghe anya ndị ìsì.”—Aịzaya 35:5

•  A ga-akpọlite ndị nwụrụ anwụ.—Jọn 5:28, 29

• O nweghịzi onye ga na-arịa ọrịa.—Aịzaya 33:24

• Onye ọ bụla ga na-eriju afọ.—Abụ Ọma 72:16

Ụfọdụ ndị nwere ike ịna-eche na ihe ndị ahụ e kwuru na peeji nke anọ na nke ise n’akwụkwọ a enweghị ike ime eme. Ma, Chineke kwuru na ya ga-eme ha n’oge na-adịghị anya. Baịbụl kwukwara otú ọ ga-esi eme ha.

Ma, ọ bụghị naanị ihe ndị ahụ Chineke ga-emere anyị ka Baịbụl kwuru. O kwukwara ihe anyị ga-eme ka anyị nwee ike ịna-enwe ezigbo obi ụtọ ugbu a. Chegodị gbasara ihe ndị na-echu gị ụra. O nwere ike ịbụ ụkọ ego, nsogbu ezinụlọ, ọrịa, ma ọ bụkwanụ na mmadụ nwụnahụrụ gị. Baịbụl nwere ike inyere gị aka imeri nsogbu ndị ahụ. Ihe ị ga-amụta na ya ga-akasikwa gị obi n’ihi na ọ ga-enyere gị aka ịmata azịza ajụjụ ndị a:

• Gịnị mere anyị ji ata ahụhụ?

• Olee otú m ga-esi merie nsogbu ndị bịaara m?

• Olee otú anyị ga-esi na-enwe obi ụtọ n’ezinụlọ anyị?

• Gịnị na-eme mmadụ ma ọ nwụọ?

• Ò nwere mgbe anyị ga-ahụ ndị nke anyị nwụrụ anwụ ọzọ?

• Olee ihe mere obi ga-eji sie anyị ike na Chineke ga-emere anyị ihe niile o kwere anyị ná nkwa?

 Ọgụgụ ị na-agụ akwụkwọ a gosiri na ị chọrọ ịmata ihe Baịbụl na-akụzi. Akwụkwọ a ga-enyere gị aka. Paragraf ndị dị na ya nwere ajụjụ ndị e ji amụ ha. Ajụjụ ndị ahụ ga-enyere gị aka ịghọta Baịbụl nke ọma. Ọtụtụ ndị na-enwe mmasị ka ha na Ndịàmà Jehova na-amụ Baịbụl. Obi sikwara anyị ike na gịnwa ga-enwe mmasị ka anyị na gị mụwa Baịbụl. Ekpere anyị bụ ka Chineke nyere gị aka ịghọta ihe Baịbụl na-akụzi.