2 Ndị Eze 18:1-37
18 O wee ruo n’afọ nke atọ nke ọchịchị Hoshia+ nwa Ila bụ́ eze Izrel na Hezekaya+ nwa Ehaz+ bụ́ eze Juda ghọrọ eze.
2 Ọ gbara afọ iri abụọ na ise mgbe ọ malitere ịchị, ọ chịkwara afọ iri abụọ na itoolu na Jeruselem. Aha nne ya bụ Ebaị, ada Zekaraya.+
3 O wee na-eme ihe ziri ezi n’anya Jehova,+ dị ka ihe niile Devid bụ́ nna nna ya mere si dị.+
4 Ọ bụ ya wepụrụ ebe ndị dị elu,+ kụrisịa ogidi nsọ+ ma gbutuo ogwe osisi dị nsọ,+ gwerisịakwa agwọ ọla kọpa ahụ+ Mozis mere;+ n’ihi na ruo n’oge ahụ, ụmụ Izrel nọ na-esurere ya ihe nsure ọkụ,+ a nọkwa na-akpọ ya arụsị agwọ ọla kọpa.+
5 Ọ bụ Jehova bụ́ Chineke Izrel ka ọ tụkwasịrị obi;+ mgbe ọ nwụsịrị, ọ dịghị onye dị ka ya n’ime ndị eze niile nke Juda,+ ọbụna ndị bu ya ụzọ.+
6 O wee rapara Jehova n’ahụ́.+ Ọ kwụsịghị iso ya, kama ọ nọ na-edebe ihe o nyere n’iwu, nke Jehova nyere Mozis n’iwu.+
7 Jehova wee nọnyere ya.+ N’ebe ọ bụla o jere, ọ na-eji akọ eme ihe;+ o wee nupụrụ eze Asiria isi, o jeghịkwara ya ozi.+
8 Ọ bụ ya meriri ndị Filistia+ ruo Geza, meriekwa ókèala ya niile, malite n’ụlọ nche+ nke ndị nche ruo n’obodo e wusiri ike.
9 O wee ruo n’afọ nke anọ nke ọchịchị Eze Hezekaya, ya bụ, n’afọ nke asaa nke ọchịchị Hoshia+ nwa Ila bụ́ eze Izrel, na Shalmaniza+ eze Asiria bịara ibuso Sameria agha, malite ịnọchibido ya.+
10 Ha wee weghara ya+ mgbe afọ atọ gwụchara; n’afọ nke isii nke ọchịchị Hezekaya, ya bụ, n’afọ nke itoolu nke ọchịchị Hoshia eze Izrel, e weghaara Sameria.+
11 E mesịa, eze Asiria+ dọọrọ Izrel n’agha+ laa Asiria, meekwa ka ha biri na Hela+ nakwa na Hebọ,+ nke dị n’akụkụ osimiri Gozan nakwa n’obodo dị iche iche nke ndị Midia,+
12 n’ihi na ha egeghị ntị+ n’olu Jehova bụ́ Chineke ha, kama ha nọ na-emebi ọgbụgba ndụ ya,+ ọbụna ihe niile Mozis+ bụ́ ohu Jehova nyere n’iwu.+ Ha egeghị ntị, ha edebeghịkwa ihe ndị ahụ.
13 N’afọ nke iri na anọ nke ọchịchị Eze Hezekaya, Senakerib+ eze Asiria+ gbagotere buso obodo niile e wusiri ike ndị dị na Juda agha, wee weghara ha.
14 Hezekaya eze Juda wee zigara eze Asiria ozi na Lekish, sị: “Emehiewo m. Laghachi, ebusola m agha. Ibu ọ bụla ị ga-ebo m, m ga-ebu ya.”+ Eze Asiria wee manye Hezekaya eze Juda ịkwụ narị talent+ ọlaọcha atọ na talent ọlaedo iri atọ.
15 Ya mere, Hezekaya nyere ya ọlaọcha niile dị n’ụlọ Jehova+ nakwa n’ebe a na-edebe akụ̀ n’ụlọ eze.+
16 N’oge ahụ, Hezekaya gbukapụrụ ibo ụzọ ndị dị n’ụlọ nsọ Jehova,+ tinyere awara ụzọ ndị Hezekaya eze Juda machiri ọla,+ o wee bunye ha eze Asiria.
17 Eze Asiria+ wee si na Lekish+ ziga Tatan+ na Rabsaris na Rabshake,+ ha na oké ìgwè ndị agha, ka ha gakwuru Eze Hezekaya na Jeruselem, ka ha wee gbagoo wee bịa na Jeruselem. Ha wee gbagoo wee bịa guzoro n’akụkụ okpo mmiri+ nke ọdọ mmiri+ mgbago, nke dị n’okporo ụzọ e si aga ebe ndị ọsụ ákwà na-anọ asụ ákwà.+
18 Ha wee malite ịkpọ eze, ma Elayakim+ nwa Hilkaya, bụ́ onye na-elekọta ezinụlọ eze, na Shebna+ bụ́ odeakwụkwọ nakwa Joa nwa Esaf, bụ́ onye na-edekọ ihe, pụkwuuru ha.
19 Rabshake+ wee sị ha: “Biko, gwanụ Hezekaya, sị, ‘Nke a bụ ihe eze ukwu,+ bụ́ eze Asiria, kwuru: “Gịnị ka ị tụkwasịrị obi nke na-enye gị obi ike?+
20 Ị sịwo, ‘Anyị nwere atụmatụ+ na ike anyị ga-eji buo agha.’ (Kama ọ bụ okwu ọnụ efu.) Ọ̀ bụ onye ka ị tụkwasịrị obi, nke mere i ji nupụrụ m isi?+
21 Leenụ! ị tụkwasịwo obi ná nkwado nke ahịhịa amị a a zọturu azọtu,+ bụ́ Ijipt,+ ga-enye gị, nke ga-adụ mmadụ n’ọbụ aka wee dụpuo ya ma ọ bụrụ na ọ dabere na ya. Otú ahụ ka Fero+ eze Ijipt dị n’ebe ndị niile na-atụkwasị ya obi nọ.
22 Ọ bụrụkwanụ na unu asị m, ‘Ọ bụ Jehova+ bụ́ Chineke anyị ka anyị tụkwasịrị obi,’+ ọ́ bụghị ya bụ onye Hezekaya+ wepụrụ ebe ndị dị elu ya+ nakwa ebe ịchụàjà ya, ma na-agwa Juda na Jeruselem, sị, ‘N’ihu ebe ịchụàjà a ka unu ga na-akpọ isiala na Jeruselem’?”’+
23 Biko, gị na onyenwe m bụ́ eze Asiria tie n’aka,+ ka m nye gị puku ịnyịnya abụọ lee ma ì nwere ike ime ka ndị na-agba ịnyịnya nọkwasị na ha.+
24 Oleezi otú ị pụrụ isi mee ka otu gọvanọ bụ́ otu n’ime ndị kasị nta na-ejere onyenwe m ozi+ tụgharịa laghachi azụ, mgbe gị onwe gị tụkwasịrị Ijipt obi inye gị ụgbọ ịnyịnya+ na ndị na-agba ịnyịnya?+
25 Ọ́ bụghị Jehova nyere m ikike ịbịa buso ebe a agha iji laa ya n’iyi? Ọ bụ Jehova sịrị m,+ ‘Gbagoo buso ala a agha, laakwa ya n’iyi.’”
26 Elayakim+ nwa Hilkaya na Shebna+ nakwa Joa+ wee sị Rabshake:+ “Biko, gwawa ndị ohu gị okwu n’asụsụ ndị Siria,+ n’ihi na anyị ga-aghọta ya; agwala anyị okwu n’asụsụ ndị Juu+ ná ntị ndị nọ n’elu mgbidi.”
27 Ma Rabshake sịrị ha: “Ọ̀ bụ onyenwe gị na gị onwe gị ka onyenwe m dunyere m ka m gwa okwu ndị a? Ọ́ bụghị ndị ikom a nọ ọdụ n’elu mgbidi, ka ha wee rie nsị+ ha ma ṅụọ mamịrị ha, unu eriekwa nsị unu, ṅụọ mamịrị unu?”+
28 Rabshake wee kwụrụ ma na-ekwu okwu n’oké olu n’asụsụ ndị Juu;+ o wee gaa n’ihu ịsị: “Nụrụnụ ihe eze ukwu,+ bụ́ eze Asiria, kwuru.
29 Nke a bụ ihe eze kwuru, ‘Unu ekwela ka Hezekaya duhie unu, n’ihi na ọ pụghị ịnapụta unu n’aka m.+
30 Unu ekwela ka Hezekaya mee ka unu tụkwasị Jehova obi,+ sị: “Jehova ga-anapụtarịrị+ anyị, a gaghịkwa enyefe obodo a n’aka eze Asiria.”+
31 Unu egela Hezekaya ntị; n’ihi na nke a bụ ihe eze Asiria kwuru: “Chịlierenụ m aka elu ma pụkwutenụ m, onye ọ bụla n’ime unu rie ihe si n’osisi vaịn ya na ihe si n’osisi fig ya,+ onye ọ bụla n’ime unu ṅụọkwa mmiri si n’olulu mmiri ya,+
32 ruo mgbe m ga-abịa kpọrọ unu laa n’ala nke dị ka ala unu,+ ala ọka* na mmanya ọhụrụ, ala achịcha+ na ubi vaịn,+ ala osisi oliv mmanụ+ na ala mmanụ aṅụ; unu ga-anọrọkwa ndụ wee ghara ịnwụ. Unu egekwala Hezekaya ntị, n’ihi na ọ na-arafu unu, na-asị, ‘Jehova ga-anapụta anyị.’+
33 Ò nwetụwo chi ọ bụla n’ime chi mba dị iche iche napụtara+ ala ya n’aka eze Asiria?+
34 Olee ebe chi niile nke Hemat+ na Apad+ nọ? Olee ebe chi niile nke Sefaveyim,+ Hina+ na Iva+ nọ? Hà napụtara Sameria n’aka m?+
35 Ole nke n’ime chi niile nke ala ndị a napụtara ala ha n’aka m,+ nke mere Jehova ga-eji napụta Jeruselem n’aka m?”’”+
36 Ha gbachiri nkịtị,+ ha azaghịkwa ya ihe ọ bụla,+ n’ihi na eze nyere iwu, sị: “Unu atụpụrụla ya ọnụ.”+
37 Ma Elayakim+ nwa Hilkaya onye na-elekọta ezinụlọ eze, na Shebna+ bụ́ odeakwụkwọ nakwa Joa+ nwa Esaf, bụ́ onye na-edekọ ihe, dọwara uwe+ ha bịakwute Hezekaya wee gwa ya ihe Rabshake kwuru.
Ihe E Dere n'Ala Ala Peeji
^ Ọka a na-ekwu okwu ya ebe a bụ ụdị dị ka ọka wit na ọka bali.
