2 Ihe E Mere 20:1-37
20 O wee ruo mgbe e mesịrị na ụmụ Moab+ na ụmụ Amọn,+ na ụfọdụ n’ime ụmụ Amọnim+ ha na ha so, bịara ibuso Jehọshafat agha.+
2 Ndị mmadụ wee bịa kọọrọ Jehọshafat, sị: “Nnukwu ìgwè mmadụ esiwo n’ógbè oké osimiri, n’Idọm,+ bịa ibuso gị agha; ha nọ na Hazazọn-tema, ya bụ, En-gidaị.”+
3 Egwu wee tụọ Jehọshafat,+ o wee kpebie ịchọ Jehova.+ O wee kwuo ka Juda dum buo ọnụ.+
4 E mesịa, a kpọkọtara ndị Juda ka ha jụọ Jehova ase.+ Ha si ọbụna n’obodo niile dị na Juda bịa ịjụ Jehova ase.+
5 Jehọshafat wee bilie n’etiti ndị Juda na Jeruselem zukọtaranụ n’ụlọ Jehova,+ n’ihu ogige ọhụrụ ahụ,+
6 o wee sị:+
“Jehova bụ́ Chineke nna nna anyị hà,+ ọ́ bụghị gị bụ Chineke nke bi n’eluigwe,+ ọ́ bụghị gị na-achị alaeze niile nke mba dị iche iche,+ ọ́ bụghị gị ka ike na ịdị ukwuu dị n’aka, nke na ọ dịghị onye ga-eguzogide gị?+
7 Chineke anyị,+ ọ́ bụghị gị chụpụrụ ndị bi n’ala a n’ihu ndị gị Izrel+ wee nye+ ya mkpụrụ Ebreham, bụ́ onye ị hụrụ n’anya,+ ka ọ bụrụ nke ya ruo mgbe a na-akaghị aka?
8 Ha wee biri na ya, ha wee wuoro gị ebe nsọ n’ime ya maka aha gị,+ wee sị,
9 ‘Ọ bụrụ na ọdachi,+ mma agha, amamikpe, ma ọ bụ ọrịa na-efe efe+ ma ọ bụ ụnwụ+ adakwasị anyị, anyị ga-eguzo n’ihu ụlọ a+ nakwa n’ihu gị (n’ihi na aha gị+ dị n’ụlọ a), ka anyị wee kpọkuo gị maka enyemaka mgbe anyị nọ n’ahụhụ, biko, nụrụ ma zọpụta anyị.’+
10 Ugbu a, lee, ụmụ Amọn+ na Moab+ na ndị si n’ógbè Sia bụ́ ugwu ugwu,+ bụ́ ndị ị na-ekweghị ka Izrel wakpo mgbe ha si n’ala Ijipt na-apụta, kama ha hapụrụ ha wee ghara ikpochapụ ha,+
11 ee, lee, ihe ha ji na-akwụ anyị ụgwọ+ bụ ịbịa ịchụpụ anyị n’ihe onwunwe gị nke i mere ka anyị nweta.+
12 Chineke anyị, ị́ gaghị eme ihe e kpere n’ikpe n’ahụ́ ha?+ N’ihi na anyị enweghị ike iguzo n’ihu nnukwu ìgwè mmadụ a na-abịa ibuso anyị agha;+ anyị amaghịkwa ihe anyị ga-eme,+ kama ọ bụ gị ka anyị lekwasịrị anya.”+
13 Ka nke a na-eme, ndị Juda niile guzo ọtọ n’ihu Jehova,+ ọbụna ụmụntakịrị ha,+ ndị nwunye ha na ụmụ ha ndị ikom.
14 Mmụọ+ Jehova wee dakwasị Jahazayel, nwa Zekaraya nwa Benaya nwa Jeayel nwa Matanaya onye Livaị nke si n’agbụrụ Esaf,+ n’etiti ndị ahụ zukọtara.
15 O wee sị: “Geenụ ntị, Juda dum na unu ndị bi na Jeruselem, tinyere Eze Jehọshafat! Nke a bụ ihe Jehova gwara unu, ‘Unu atụla egwu,+ unu amakwala jijiji n’ihi nnukwu ìgwè mmadụ a; n’ihi na agha a abụghị nke unu, kama ọ bụ nke Chineke.+
16 Gbadakwurunụ ha echi. Lee, ha ga-esi n’ụzọ e si abanye Ziz gbagote; unu ga-ahụ ha n’ebe ndagwurugwu nke dị n’ihu ala ịkpa Jeruel jedebere.
17 Unu agaghị alụ ọgụ+ na nke ugbu a. Nọrọnụ ebe unu kwesịrị ịnọ, guzoronụ otu ebe+ hụ otú Jehova ga-esi zọpụta unu.+ Juda na Jeruselem, unu atụla egwu, unu atụkwala ụjọ.+ Echi gakwurunụ ha, Jehova ga-anọnyekwara unu.’”+
18 Ozugbo ahụ, Jehọshafat hulatara, kpudo ihu n’ala.+ Juda dum na ndị niile bi na Jeruselem wee gbuo ikpere n’ala n’ihu Jehova, kpọọrọ Jehova isiala.+
19 Ndị Livaị+ ndị si n’agbụrụ Kohat+ na ndị si n’agbụrụ Kora+ wee bilie jiri oké olu too Jehova bụ́ Chineke Izrel.+
20 Ha wee bilie n’isi ụtụtụ gaa n’ala ịkpa+ Tekoa.+ Ka ha na-apụ, Jehọshafat biliri ọtọ, sị: “Juda na ndị bi na Jeruselem,+ geenụ m ntị! Nweenụ okwukwe+ n’ebe Jehova bụ́ Chineke unu nọ ka unu wee dịtee ndụ aka. Nweenụ okwukwe n’ebe ndị amụma ya nọ,+ ka ihe wee gaziere unu.”
21 Ya na ndị ya gbakwara izu,+ o wee mee ka e nwee ndị ga na-abụku Jehova abụ+ na ndị yi uwe mara mma nke dị nsọ+ wee na-enye otuto+ mgbe ha na-aga n’ihu ndị agha ahụ, na-asị: “Nyenụ Jehova otuto,+ n’ihi na obiọma* ya na-adịru mgbe ebighị ebi.”+
22 Mgbe ha malitere iti mkpu ọṅụ na inye otuto, Jehova mere ka ndị ikom gaa chechie+ ụmụ Amọn, Moab na ndị si n’ógbè Sia bụ́ ugwu ugwu, bụ́ ndị na-abata na Juda. Ha wee malite igburịta onwe ha.+
23 Ụmụ Amọn na Moab wee buso ndị bi n’ógbè Sia bụ́ ugwu ugwu+ agha wee bibie ha ma laa ha n’iyi; ozugbo ha lasịrị ndị bi na Sia n’iyi, ha gburịtara onwe ha.+
24 Ma Juda bịarutere n’ụlọ nche dị n’ala ịkpa ahụ.+ Mgbe ha chere ihu n’ebe ìgwè mmadụ ahụ nọ, lee, ozu ha tọgbọcha n’ala,+ ọ dịghị onye lanahụrụ.
25 Jehọshafat na ndị ya wee bịa ịkwakọrọ ngwongwo ha.+ Ha wee hụ ọtụtụ ngwongwo na ákwà na arịa ndị dị oké ọnụ ahịa; ha wee yipụtasịa ha ihe ha yi n’ahụ́ ruo mgbe ha na-enweghị ike iburukwu ihe ọzọ.+ Ha nọ na-akwakọrọ ngwongwo ahụ ruo ụbọchị atọ, n’ihi na ọ dị ọtụtụ.
26 N’ụbọchị nke anọ, ha gbakọrọ na ndagwurugwu Beraka, n’ihi na n’ebe ahụ ka ha gọziri Jehova.+ Ọ bụ ya mere ha ji na-akpọ+ ebe ahụ Ndagwurugwu Beraka—ruo taa.
27 Ndị ikom niile nke Juda na Jeruselem, tinyere Jehọshafat bụ́ onyeisi ha, wee jiri ọṅụ lọta Jeruselem, n’ihi na Jehova mere ka ha ṅụrịa ọṅụ n’ihi ihe mere ndị iro ha.+
28 Ha wee jiri ụbọ akwara+ na une+ na opi+ bata na Jeruselem, rute n’ụlọ Jehova.+
29 Alaeze niile nke ala dị iche iche wee tụwa Chineke ụjọ+ mgbe ha nụrụ na Jehova ebusowo ndị iro Izrel agha.+
30 N’ihi ya, ebe Jehọshafat na-achị enweghị nsogbu ọ bụla, Chineke ya wee na-enye ya ezumike gbaa gburugburu.+
31 Jehọshafat+ wee na-achị Juda. Ọ dị afọ iri atọ na ise mgbe ọ malitere ịchị, ọ chịrị afọ iri abụọ na ise na Jeruselem. Aha nne ya bụ Azuba,+ nwa Shilhaị.
32 O wee na-eje ije n’ụzọ nna ya Esa,+ ọ hapụghịkwa ya, site n’ime ihe ziri ezi n’anya Jehova.+
33 Ọ bụ naanị na e bibighị ebe ndị dị elu;+ ndị mmadụ edozibeghị obi ha maka Chineke ndị nna nna ha.+
34 Ma ihe ndị ọzọ metụtara Jehọshafat, ndị mbụ na ndị ikpeazụ, lee, e dere ha n’okwu Jihu+ nwa Hanenaị,+ bụ́ ndị e debara n’Akwụkwọ+ Ndị Eze Izrel.
35 Mgbe nke a gasịrị, Jehọshafat eze Juda na Ehazaya+ eze Izrel, onye mere ajọ omume, jikọrọ aka.+
36 Ehazaya wee mee ka ọ bụrụ onye òtù ya n’ịrụ ụgbọ mmiri ndị ga na-aga Tashish,+ ha rụkwara ụgbọ mmiri n’Iziọn-giba.+
37 Otú ọ dị, Elịiza nwa Dodavahu bụ́ onye Marisha buru amụma megide Jehọshafat, sị: “Ebe ọ bụ na gị na Ehazaya+ ejikọwo aka, Jehova ga-ala ihe ị rụrụ n’iyi.”+ Ụgbọ mmiri ndị ahụ wee kpuo,+ ha enweghịkwa ike ịga Tashish.+
Ihe E Dere n'Ala Ala Peeji
^ Ma ọ bụ, “ịhụnanya na-adịgide adịgide.”
