Ndị Hibru 7:1-28
7 N’ihi na Melkizedek nke a, eze Selem, bụ́ onye nchụàjà nke Chineke Onye Kasị Elu,+ onye zutere Ebreham ka o si n’igbu ndị eze na-alọta wee gọzie ya,+
2 onye Ebreham kenyekwara otu ụzọ n’ụzọ iri nke ihe niile.+ Onye a bu ụzọ bụrụ “Eze nke Ezi Omume,” ma a sụgharịa ya, bụrụkwa eze Selem,+ ya bụ, “Eze Udo.”
3 Ebe ọ bụ onye na-enweghị nna, onye na-enweghị nne, onye na-enweghị usoro ọmụmụ, bụrụkwa onye na-enweghị ụbọchị ọ malitere+ ma ọ bụ oge ndụ ya gwụrụ, ma ebe e mere ka ọ dị ka Ọkpara Chineke,+ ọ bụ onye nchụàjà mgbe niile.+
4 Lezienụ otú nwoke a si dị ukwuu, onye Ebreham, bụ́ onyeisi ezinụlọ, nyere otu ụzọ n’ụzọ iri n’ihe ndị kasị mma a kwatara n’agha.+
5 N’eziokwu, e nyere ụmụ nwoke ndị bụ́ ụmụ Livaị,+ ndị na-anata ọrụ ịbụ ndị nchụàjà iwu ka ha na-anata ndị Izrel,+ ya bụ, ụmụnne ha, otu ụzọ n’ụzọ iri+ dị ka Iwu ahụ si dị, ọ bụrụgodị na ndị a sitere n’úkwù Ebreham;+
6 ma nwoke ahụ nke na-esiteghị n’usoro ọmụmụ+ ha naara Ebreham otu ụzọ n’ụzọ iri+ ma gọzie onye ahụ e kwere ihe ndị ahụ ná nkwa.+
7 Ma ihe ịrụ ụka ọ bụla adịghị ya na onye ka ukwuu+ gọziri onye nke nta.
8 N’otu aka, ọ bụ ụmụ mmadụ ndị na-anwụ anwụ na-anata otu ụzọ n’ụzọ iri,+ ma n’aka nke ọzọ, ọ bụ onye a na-agba àmà na ọ dị ndụ.+
9 Ọ bụrụ na m pụrụ iji okwu a mee ihe, ọbụna Livaị bụ́ onye na-anata otu ụzọ n’ụzọ iri si n’aka Ebreham kwụọ otu ụzọ n’ụzọ iri,
10 n’ihi na ọ ka nọ n’úkwù+ nna nna ya mgbe Melkizedek zutere ya.+
11 Ọ bụrụ n’ezie na izu okè+ sitere n’ọrụ nchụàjà+ nke ụmụ Livaị na-arụ, (n’ihi na o so n’Iwu+ ahụ e nyere ndị Izrel) ọ̀ ka ga-adị mkpa+ ka onye nchụàjà ọzọ bilite, bụ́ onye e kwuru na ọ dị ka Melkizedek,+ ọ bụghị dị ka Erọn?
12 N’ihi na ebe a na-agbanwe ọrụ nchụàjà,+ ọ dị mkpa na a ga-agbanwekwa iwu ahụ.+
13 N’ihi na nwoke ahụ a na-ekwu ihe ndị a banyere ya si n’ebo ọzọ,+ bụ́ ebe onye ọ bụla na-esibeghị jee ozi n’ebe ịchụàjà.+
14 N’ihi na ọ pụtara nnọọ ìhè na Onyenwe anyị sitere na Juda,+ bụ́ ebo nke Mozis na-ekwughị ihe ọ bụla banyere ya n’ihe metụtara ndị nchụàjà.
15 Ọ ka dokwara anya nke ọma karị na n’ụzọ yiri Melkizedek,+ e nwere onye nchụàjà ọzọ nke na-ebilite,+
16 bụ́ onye ghọworo nke ahụ, ọ bụghị dị ka ihe e nyere n’iwu nke dabeere n’anụ ahụ́+ si dị, kama dị ka ike nke ndụ a na-apụghị ibibi ebibi+ si dị,
17 n’ihi na a gbara àmà banyere ya, sị: “Ị bụ onye nchụàjà dị ka Melkizedek+ ruo mgbe ebighị ebi.”
18 Ya mere, a na-akagbu iwu ahụ nke bu ụzọ n’ihi adịghị ike ya+ nakwa adịghị irè ya.+
19 N’ihi na Iwu ahụ emeghị ka ihe ọ bụla zuo okè,+ kama mwebata e webatakwuru olileanya ka mma+ mere ka ihe zuo okè, bụ́ nke anyị si na ya na-abịaru Chineke nso.+
20 Otú ahụ a na-emeghị ya n’aṅụghị iyi,
21 (n’ihi na e nwere ndị a na-ejighị ịṅụ iyi mee ka ha ghọọ ndị nchụàjà, ma e nwere otu onye nke e ji ịṅụ iyi mee ka ọ ghọọ onye nchụàjà site n’aka Onye ahụ nke kwuru banyere ya, sị: “Jehova aṅụwo iyi+ (ọ gaghịkwa akwa ụta), ‘Ị bụ onye nchụàjà ruo mgbe ebighị ebi,’”)+
22 otú ahụkwa, Jizọs aghọwo onye e nyere dị ka ihe ibé maka ọgbụgba ndụ ka mma.+
23 Ọtụtụ ndị ghọkwara ndị nchụàjà, onye pụọ ibe ya anọchie,+ n’ihi na ọnwụ gbochiri ha+ ịnọgide na-abụ ya,
24 ma ebe ọ bụ na ọ na-adị ndụ ruo mgbe ebighị ebi,+ ọ na-abụ onye nchụàjà n’enweghị ndị na-anọchi ya.
25 N’ihi ya, o nwekwara ike ịzọpụta ndị ahụ n’ụzọ zuru ezu bụ́ ndị na-abịaru Chineke nso site na ya, n’ihi na ọ na-adị ndụ mgbe niile ịrịọrọ ha arịrịọ.+
26 N’ihi na ụdị nnukwu onye nchụàjà a kwesịrị anyị,+ onye na-eguzosi ike n’ihe,+ onye na-adịghị aghụghọ,+ onye a na-emerụghị emerụ,+ onye e kewapụrụ n’ebe ndị mmehie nọ,+ o wee dị elu karịa eluigwe.+
27 Ọ dịghị ya mkpa, dị ka ọ dị nnukwu ndị nchụàjà ahụ, ịdị na-achụ àjà kwa ụbọchị,+ nke mbụ maka mmehie nke ya,+ mgbe ahụzi maka mmehie nke ndị ya:+ (n’ihi na nke a ka o mere naanị otu ugboro+ mgbe ọ chụrụ onwe ya n’àjà;)+
28 n’ihi na Iwu ahụ na-ahọpụta ndị ikom nwere adịghị ike+ ka ha bụrụ nnukwu ndị nchụàjà,+ ma ihe ahụ e ji ịṅụ iyi kwuo+ mgbe Iwu ahụ gasịrị họpụtara otu Ọkpara, bụ́ onye a na-eme ka o zuo okè+ ruo mgbe ebighị ebi.
