Job 19:1-29
19 Job wee zaa, sị:
2 “Ruo ole mgbe ka unu ga na-akpasu mkpụrụ obi m iwe,+Jirikwa okwu na-egbu mmụọ m?+
3 Unu abaworo m mba ugboro iri ugbu a;Ihere adịghị eme unu na unu na-emeso m ihe n’obi ọjọọ otú a.+
4 Ọ bụrụgodị na m mehiere ihe,+Ọ bụ n’isi m ka ihe m mehiere ga-adị.
5 Ọ bụrụ n’ezie na unu na-ebuli onwe unu elu imegide m,+Na-egosikwa na nkọcha a na-akọcha m kwesịrị ekwesị,+
6 Marazienụ na ọ bụ Chineke duhiere m,O jiriwokwa ụgbụ ya gbaa m gburugburu.+
7 Lee! M na-eti, ‘Ihe ọjọọ!’ ma ọ dịghị onye na-aza m;+M na-eti mkpu enyemaka, ma ikpe ziri ezi adịghị.+
8 O jiriwo nkume rụchie mgbidi n’ụzọ m,+ enweghịkwa m ike ịgafe;Ọ na-emekwa ka ọchịchịrị gbaa n’okporo ụzọ m.+
9 Ọ napụwo m ebube m,+O kpupụwokwa okpueze m kpu n’isi.
10 Ọ na-adọda m n’akụkụ niile, m wee laa n’iyi;Ọ na-efopụkwa olileanya m dị ka osisi.
11 Ọ na-eweso m iwe dị ọkụ,+Ọ na-ewerekwa m ka onye iro ya.
12 Ndị agha ya agbakọwo aka bịa mee ka ụzọ ha dịrị elu imegide m,+Ha na-agbakwa ụlọikwuu m gburugburu.
13 O mewokwa ka ụmụnne m nọrọ m n’ebe dị anya,+Ndị maara m esiwo ọbụna n’ebe m nọ pụọ.
14 Ọ dịkwaghị ndị mụ na ha na-akpachi anya,+Ndị m maara echefuwokwa m,
15 Bụ́ ndị bi n’ụlọ m dị ka ndị ọbịa;+ ohu m ndị inyom na-ewerekwa m ka onye si esi bịa;Aghọwo m onye ala ọzọ n’anya ha.
16 M na-akpọ onye na-ejere m ozi òkù, ma ọ naghị aza m.Eji m ọnụ m na-arịọ ya ka o nweere m ọmịiko.
17 Ume m na-ekupụta aghọwo ihe nwunye m na-asọ oyi,+Aghọwokwara m ụmụ si n’afọ nne m ihe na-esi ísì ọjọọ.
18 Ụmụaka ajụwokwa m;+M bilie ọtọ, ha na-amalite ikwu okwu megide m.
19 Ndị niile mụ na ha na-akpachi anya na-asọ m oyi,+Ndị m hụrụ n’anya aghọwokwa ndị na-emegide m.+
20 Abụzi m ọkpụkpụ ọkpụkpụ,+Ejisiri m ike* lanahụ.
21 Ndị enyi m, metụrụnụ m amara, metụrụnụ m amara,+N’ihi na aka Chineke emetụwo m.+
22 Gịnị mere unu ji na-akpagbu m otú Chineke na-akpagbu m,+Ma ghara inwe afọ ojuju n’ahụ́ m?
23 A sị nnọọ na e dere okwu m ede!A sị nnọọ na e dere ya ede n’akwụkwọ!
24 A sị nnọọ na e ji mkpịsị ígwè+ na pensụl dee ya,Kanye ya n’oké nkume ruo mgbe ebighị ebi!
25 Amaara m nke ọma na onye mgbapụta+ m dị ndụ,Amakwa m na mgbe m nwụsịrị, ọ ga-ebili+ guzoro n’elu ala.
26 Mgbe ha gbasịrị m akpụkpọ, lezienụ otú m dị!N’agbanyeghị na anụ ahụ́ m alawo n’iyi, m ga-ahụ Chineke,
27 Bụ́ onye mụ onwe m ga-ahụ,+Onye anya mụ onwe m ga-ahụ, ọ bụghị onye ọzọ.Akụrụ m adawokwa mbà n’ime m.
28 N’ihi na unu na-asị, ‘Gịnị mere anyị ji na-akpagbu+ ya?’Mgbe ọ bụ mụ onwe m kpatara nsogbu ahụ.
29 Tụọnụ egwu n’ihi mma agha,+N’ihi na njehie na-eweta ọnụma mma agha,Ka unu wee mara na e nwere onyeikpe.”+
Ihe E Dere n'Ala Ala Peeji
^ Otú e si dee ya n’asụsụ Hibru bụ ‘eji m akpụkpọ ezé m lanahụ.’
