Samuel nke Mbụ 15:1-35
15 Samuel wee sị Sọl: “Jehova ziri m, mụ abịa tee gị mmanụ ka ị bụrụ eze ndị ya Izrel.+ Ugbu a, nụrụ ihe Jehova ga-agwa gị.+
2 Jehova nke ụsụụ ndị agha kwuru, sị: ‘M ga-eme ka ndị Amalek zaa ajụjụ maka agha ha lụsoro ndị Izrel n’ụzọ mgbe ha si Ijipt na-apụta.+
3 Gaa gbuo ndị Amalek,+ laakwa ha na ihe niile ha nwere n’iyi.+ Ahapụkwala ha ndụ.* Gbuo ha niile,+ ma nwoke ma nwaanyị, ma nwatakịrị ma nwa ọhụrụ, ma ehi ma atụrụ, ma kamel ma jakị.’”+
4 Sọl wee kpọkọta ndị agha ya ma gụọ ha ọnụ na Telem. Ọ gụtara puku ụmụ nwoke iri (10,000) si n’ebo Juda na narị puku ndị agha abụọ (200,000) ji ụkwụ aga si n’ebo ndị ọzọ n’Izrel.+
5 Sọl wee gaa n’otu obodo dị n’Amalek ma zoo chebiri ha n’akụkụ ndagwurugwu.
6 Sọl gwaziri ndị Kenaịt,+ sị: “Sinụ n’obodo ndị Amalek pụọ, ka m ghara ikpochapụ unu na ha.+ Unu gosiri ndị Izrel niile na unu hụrụ ha n’anya,*+ meekwara ha ebere mgbe ha si Ijipt na-apụta.” Ndị Kenaịt wee si n’obodo ndị Amalek pụọ.
7 Mgbe ha pụrụ, Sọl gburu ndị Amalek+ malite na Havila+ ruo na Shọọ+ nke dị nso n’Ijipt.
8 O jidere Egag,+ eze ndị Amalek ná ndụ. Ma, o ji mma agha gbuo ndị ọzọ niile.+
9 Ma, Sọl na ndị agha ya hapụrụ Egag ndụ,* ya na ewu na atụrụ na ehi ndị kacha mma, ndị gbakwara agba, nakwa ebule niile na ihe niile dị mma.+ Ha achọghịkwa ibibi ha. Ma, ha bibiri ihe niile na-abaghị uru na ihe ndị ha na-achọghị.
10 Jehova wee sị Samuel:
11 “Ọ na-ewute m na m mere Sọl eze, n’ihi na ọ kwụsịla iso m. O meghịkwa ihe m kwuru.”+ Ihe a nyekwara Samuel nsogbu n’obi, ya ana-ebesara Jehova ákwá abalị ahụ niile.+
12 Mgbe Samuel biliri n’isi ụtụtụ ka ọ gaa hụ Sọl, a gwara Samuel, sị: “Sọl gara Kamel,+ rụọ ihe a ga-eji na-echeta ya ebe ahụ,+ sikwa ebe ahụ gawa Gilgal.”
13 Mgbe Samuel mechara bịakwute Sọl, Sọl sịrị ya: “Ka Jehova gọzie gị. Emeela m ihe Jehova kwuru.”
14 Ma Samuel sịrị: “Ebeekwanụ ka ewu na atụrụ na ehi ndị a m na-anụ olu ha si?”+
15 Sọl wee sị: “Ndị agha m si n’ala ndị Amalek chịta ha, n’ihi na ha egbughị ewu na atụrụ na ehi ha ndị kacha mma, ka e jiri ha chụọrọ Jehova bụ́ Chineke gị àjà. Ma anyị bibiri ihe ndị ọzọ fọrọnụ.”
16 Samuel wee sị Sọl: “O zuola! Ka m gwa gị ihe Jehova gwara m n’abalị ụnyaahụ.”+ Ya asị ya: “Kwuwe.”
17 Samuel asị: “Mgbe e mere gị onyeisi ebo niile n’Izrel nakwa mgbe Jehova tere gị mmanụ ka ị bụrụ eze Izrel,+ ọ̀ kwa i weere na o nweghị ihe ị bụ?+
18 Jehova mechakwara dunye gị ozi, sị, ‘Gaa bibie ndị Amalek bụ́ ndị mmehie.+ Lụsokwa ha agha ruo mgbe i kpochapụrụ ha.’+
19 Gịnịzi mere na i meghị ihe Jehova kwuru? Kama ime ya, anyaukwu gị emee ka ị gbara ọsọ gaa na-amaburu ihe ndị unu kwatara,+ n’agbanyeghị na ọ dịghị Jehova mma.”
20 Ma, Sọl sịrị Samuel: “Emeela m ihe Jehova gwara m. Agara m ozi Jehova dunyere m, kpọrọ Egag eze Amalek lọta, ma bibie ndị Amalek.+
21 Ma, ndị agha m si n’ihe ndị ha kwatara kpụrụ atụrụ na ehi ndị kacha mma n’ime ihe ndị e kwesịrị ibibi ebibi, ka e jiri ha chụọrọ Jehova bụ́ Chineke gị àjà na Gilgal.”+
22 Samuel asị ya: “Àjà a na-esu ọkụ na àjà ndị ọzọ hà na-amasị Jehova+ karịa irubere Jehova isi? O doro anya na ọ ka mma irube isi karịa ịchụ àjà,+ ige ntị nke ọma dịkwa mma karịa abụba+ ebule.
23 N’ihi na nnupụisi+ dị njọ otú ịgba afa dị.+ Mmadụ ime ihe a na-enyeghị ya ikike ime na mmadụ ime anwansi* nakwa mmadụ ife arụsị bụ otu ihe. Ebe ọ bụ na ị jụrụ ime ihe Jehova kwuru,+ yanwa ajụkwala gị ka ị gharazie ịbụ eze.”+
24 Sọl wee sị Samuel: “Emehiela m, n’ihi na emeghị m ihe Jehova gwara m mee. Emeghịkwa m ihe i kwuru, maka na m tụrụ ụjọ ndị agha m wee mee ihe ha kwuru.
25 Biko, gbaghara m mmehie m, sorokwa m laghachi ka m kpọọrọ Jehova isiala.”+
26 Ma Samuel sịrị Sọl: “Agaghị m eso gị laghachi, n’ihi na ị jụrụ ime ihe Jehova kwuru. Jehova ajụkwala gị ka ị gharazie ịbụ eze Izrel.”+
27 Ka Samuel na-atụgharị ịla, Sọl jidere ya n’ala ala uwe ya na-enweghị aka, uwe ahụ adọkapụ.
28 Samuel asị ya: “Jehova anapụla gị ọchịchị Izrel taa otú a i si dọkapụ uwe a. Ọ ga-enyekwa ya onye ka gị mma.+
29 Onye Ukwu bụ́ Chineke Izrel+ agaghịkwa agha ụgha+ ma ọ bụ gbanwee obi ya,* n’ihi na ọ bụghị mmadụ nke na ọ ga-agbanwe obi ya.”*+
30 Sọl wee sị ya: “Emehiela m. Ma, biko, kwanyere m ùgwù n’ihu ndị okenye ndị m nakwa n’ihu ndị Izrel. Soro m laghachi. M ga-akpọkwara Jehova bụ́ Chineke gị isiala.”+
31 Samuel wee soro Sọl n’azụ laghachi, Sọl akpọọrọ Jehova isiala.
32 Samuel sịkwara: “Kpọtaranụ m Egag eze ndị Amalek.” Egag wee jiri ụjọ* gakwuru ya. Egag nọbu na-agwa onwe ya, sị: ‘Oge m gaara anwụ agafeela.’
33 Ma, Samuel sịrị: “Otú ahụ i si jiri mma agha gị mee ka ụmụ nwaanyị gbara aka ụmụ, ka nne gị ga-agbarakwa aka nwa.” Samuel wee nọrọ na Gilgal ebe ahụ gbukasịa Egag n’ihu Jehova.+
34 Samuel wee lawa Rema, ma Sọl lawara n’ụlọ ya dị na Gibia.
35 Samuel ahụghị Sọl anya ọzọ ruo ụbọchị ọ nwụrụ. Obi nọkwa na-ajọ Samuel njọ n’ihi ihe Sọl mere.+ O wutekwara Jehova na o mere Sọl eze Izrel.+
Ihe E Dere n'Ala Ala Peeji
^ Ma ọ bụ “Emetekwarala ha ebere.”
^ Ma ọ bụ “gosiri ndị Izrel niile ịhụnanya pụrụ iche.”
^ Ma ọ bụ “meteere Egag ebere.”
^ Ma ọ bụ “ime majik.”
^ Ma ọ bụ “kwaa ụta.”
^ Ma ọ bụ “ọ ga-akwa ụta.”
^ O nwere ike ịbụ, “kata obi.”
