Samuel nke Mbụ 3:1-21
-
Jehova họpụtara Samuel ka ọ bụrụ onye amụma (1-21)
3 N’oge ahụ, nwata ahụ bụ́ Samuel nọ na-ejere Jehova ozi,+ na-enyekwara Ịlaị aka. Ma, ọ na-esi ike ịnụ okwu Jehova n’oge ahụ. A naghị ahụkarịkwa ọhụụ.+
2 Anya Ịlaị na-ahụzi inyoghi inyoghi. Ọ naghịkwa ahụ ụzọ nke ọma.+ Otu ụbọchị, o dina ebe ọ na-edinakarị.
3 E menyụbeghịkwa ọkụ* dị n’ụlọ Chineke.+ Samuel dinakwa n’ụlọ nsọ*+ Jehova, ebe Igbe Chineke dị.
4 Jehova wee kpọọ Samuel. Ya asị: “Lee m ebe a.”
5 Ya agbara gakwuru Ịlaị, sị: “Lekwa m! Ọ̀ kwa ị kpọrọ m?” Ya asị: “Akpọghị m gị. Gaa hiwe ụra ị na-ehi.” Ya agaghachi hiwe ụra.
6 Jehova kpọkwara ya ọzọ, sị: “Samuel!” Samuel ebilie gakwuru Ịlaị, sị: “Lekwa m! Ọ̀ kwa ị kpọrọ m?” Ya asị: “Akpọghị m gị, nwa m. Gaa hiwe ụra ị na-ehi.”
7 (N’oge a, Samuel amatachabeghị Jehova, Jehova ezitụbeghịkwa ya ozi ọ bụla.)+
8 Jehova kpọkwara ya nke ugboro atọ, sị: “Samuel!” Samuel ebilie gakwuru Ịlaị, sị: “Lekwa m! Ọ̀ kwa ị kpọrọ m?”
Ọ bụ mgbe ahụ ka Ịlaị matara na ọ bụ Jehova na-akpọ nwata ahụ.
9 N’ihi ya, Ịlaị sịrị Samuel: “Gaa dinara ala, ya kpọọ gị ọzọ, sị ya, ‘Jehova, biko kwuwe, ohu gị na-ege ntị.’” Samuel wee gaa dinara ala n’ebe ọ na-edina.
10 Jehova kpọkwara ya ọzọ, sị: “Samuel, Samuel!” Samuel asị: “Biko, kwuwe, ohu gị na-ege ntị.”
11 Jehova wee sị Samuel: “O nwere ihe m ga-eme n’Izrel. Ntị ọ bụla nụrụ ya ga-azụ wuruwuru.+
12 N’ụbọchị ahụ, m ga-eme ihe niile m kwuru gbasara Ịlaị na ezinụlọ ya, si n’isi ruo ná ngwụcha.+
13 Gwa ya na m ga-ata ezinụlọ ya ahụhụ ruo mgbe ebighị ebi maka mmehie ọ ma gbasara ya,+ n’ihi na ụmụ ya na-akparị mụnwa bụ́ Chineke,+ ma ọ baraghị ha mba.+
14 Ọ bụ ya mere m ji ṅụọ iyi na o nweghị àjà ma ọ bụ onyinye ga-eme ka a gbaghara ezinụlọ Ịlaị mmehie ha.”+
15 Samuel hiweziri ụra chi abọọ. Mgbe chi bọrọ, o meghere ụzọ ụlọ Jehova. Ụjọ nọkwa na-atụ Samuel ịkọrọ Ịlaị ọhụụ ahụ.
16 Ma Ịlaị kpọrọ Samuel, sị: “Samuel, nwa m!” Ya asị: “Lekwa m.”
17 Ya ajụọ ya, sị: “Gịnị ka ọ gwara gị? Biko, ezochirila m ya. Ka Chineke taa gị ahụhụ, ka ọ tasiekwa gị ahụhụ ike ma i zochiere m ihe ọ bụla n’ihe niile ọ gwara gị.”
18 Samuel wee gwa ya ihe niile. O nweghị ihe o zochiiri ya. Ịlaị asị: “Ọ bụ Jehova kwuru ya. Ya mee ihe ọ bụla dị mma n’anya ya.”
19 Samuel nọ na-eto. Jehova nọnyeere ya,+ meekwa ka ihe niile Samuel kwuru mezuo.
20 Ndị Izrel niile, malite na Dan ruo Bia-shiba, matara na Samuel abụrụla onye amụma Jehova.
21 Jehova nọkwa na-apụta na Shaịlo, n’ihi na ọ bụ ebe ahụ ka Jehova na-agwa Samuel ihe gbasara yanwa bụ́ Jehova.+
