Samuel nke Mbụ 5:1-12
5 Mgbe ndị Filistia buuru Igbe+ ezi Chineke, ha si n’Ebeniza buga ya n’Ashdọd.
2 Ndị Filistia bubatakwara Igbe ezi Chineke n’ụlọ* Degọn ma dọwa ya n’akụkụ Degọn.+
3 N’echi ya, mgbe ndị Ashdọd pụtara n’isi ụtụtụ, ha hụrụ na Degọn adaala kpuo ihu n’ala n’ihu Igbe Jehova.+ Ha wee bughachi Degọn ebe ọ na-adị.+
4 Mgbe ha biliri n’isi ụtụtụ echi ya, ha hụrụ na Degọn adaala kpuo ihu n’ala n’ihu Igbe Jehova. E gbupụkwala isi Degọn na ọbụ aka ya abụọ, ha atọgbọrọ n’ọnụ ụzọ ụlọ ahụ. Naanị ahụ́ ya* fọziri.
5 Ọ bụ ya mere na ruo taa, ndị nchụàjà Degọn na ndị niile na-abanye n’ụlọ Degọn anaghị azọ ụkwụ n’ọnụ ụzọ ụlọ Degọn nke dị n’Ashdọd.
6 Jehova wee tawa ndị Ashdọd ahụhụ, mesiekwa ha ike. O mere ka ọkpụ ikè nyewe ndị bi n’Ashdọd nakwa ndị bi n’obodo ndị dị ya nso nsogbu.+
7 Mgbe ndị Ashdọd hụrụ otú ihe si kwụrụ, ha sịrị: “Unu ekwela ka Igbe Chineke Izrel ka dịrị n’obodo anyị, n’ihi na ọ taala anyị na Degọn, bụ́ chi anyị, ezigbo ahụhụ.”
8 N’ihi ya, ha ziri ozi kpọkọta ndị isi ndị Filistia niile, jụọ ha, sị: “Gịnị ka anyị ga-eme Igbe Chineke Izrel?” Ha asị: “Ka e buru Igbe Chineke Izrel gaa Gat.”+ Ha wee buru Igbe Chineke Izrel gaa ebe ahụ.
9 Mgbe ha bugara ya ebe ahụ, Jehova tawara obodo ahụ ahụhụ, ezigbo ụjọ ejide ha. O mekwara ka ọkpụ ikè nyewe ndị obodo ahụ nsogbu, ma onye ukwu ma onye nta.+
10 N’ihi ya, ha bugara Igbe ezi Chineke n’Ekrọn.+ Ma, ozugbo ha butere Igbe ezi Chineke n’Ekrọn, ndị Ekrọn malitere iti mkpu, sị: “Ha ebuterela anyị Igbe ezi Chineke Izrel ka anyị niile nwụọ!”+
11 Ha wee zie ozi kpọkọta ndị isi ndị Filistia niile, sị ha: “Bupụnụ Igbe Chineke Izrel ebe a. Bughachinụ ya ebe o si ka anyị na ndị obodo anyị ghara ịnwụ.” Ụjọ ọnwụ nọkwa na-atụ ndị obodo ahụ niile. Ezi Chineke nọkwa na-ata ha ahụhụ.+
12 Ọkpụ ikè nyewekwara ndị nke na-anwụghị nsogbu. Ndị obodo ahụ niile nọkwa na-eti mkpu ka e nyere ha aka, nke na mkpu ha na-eti ruru eluigwe.
Ihe E Dere n'Ala Ala Peeji
^ Ma ọ bụ “n’ụlọ arụsị.”
^ Ma ọ bụ “ebe yiri azụ̀ n’ahụ́ ya.” Na Hibru, “Naanị Degọn.”
