Ndị Eze nke Abụọ 13:1-25
13 N’afọ nke iri abụọ na atọ n’ọchịchị Jehoash+ nwa Ehazaya+ eze Juda, Jehoahaz nwa Jihu+ malitere ịchị Izrel. Ọ chịkwara afọ iri na asaa na Sameria.
2 Ọ nọ na-eme ihe jọrọ njọ n’anya Jehova, na-akpakwa àgwà ka Jeroboam nwa Nibat, onye mmehie ya mere ka ndị Izrel mehie.+ Ọ kwụsịghị ịkpa àgwà ka ya.
3 Jehova wee wesa ndị Izrel+ ezigbo iwe,+ nyefeekwa ha n’aka Hazel+ eze Siria na Ben-hedad+ nwa ya, ha ana-emesi ha ike oge niile.
4 Ka oge na-aga, Jehoahaz rịọrọ Jehova ka o meere ya amara, Jehova anụ arịrịọ ya, n’ihi na ọ hụrụ otú eze Siria si na-emesi ndị Izrel ike.+
5 N’ihi ya, Jehova mere ka e nwee onye zọpụtara ndị Izrel+ n’aka ndị Siria, ha ebirikwa n’ụlọ ha otú ha bibu.*
6 (Ma, ha akwụsịghị ime mmehie e ji mara ezinụlọ Jeroboam, onye mere ka ndị Izrel mehie.+ Ha nọ na-eme mmehie a, ha egbutughịkwa ogwe osisi arụsị*+ ndị dị na Sameria.)
7 Ihe fọọrọ Jehoahaz bụ mmadụ iri ise ndị na-agba ịnyịnya, ụgbọ ịnyịnya iri, na puku ndị agha iri (10,000) ji ụkwụ aga, n’ihi na eze Siria bibiri ndị ọzọ,+ zọpịakwa ha, ha adịrị ka uzuzu na-adị n’oge a na-azọcha ọka.+
8 Ma e dere akụkọ ndị ọzọ gbasara ndụ Jehoahaz, ihe niile o mere, na ike ọ kpara, n’akwụkwọ e dere ihe ndị mere n’oge ndị eze Izrel.
9 Jehoahaz mechara nwụọ otú nna nna ya hà nwụrụ, e lie ya na Sameria,+ Jehoash nwa ya anọchie ya, malite ịchị.
10 N’afọ nke iri atọ na asaa n’ọchịchị Jehoash eze Juda, Jehoash+ nwa Jehoahaz malitere ịchị Izrel. Ọ chịkwara afọ iri na isii na Sameria.
11 Ọ nọ na-eme ihe jọrọ njọ n’anya Jehova. Ọ kwụsịghị ime mmehie niile Jeroboam nwa Nibat mere, ndị mekwara ka ndị Izrel mehie.+ Ọ nọgidere na-eme ha.
12 Ma, e dere akụkọ ndị ọzọ gbasara ndụ Jehoash, ihe niile o mere, ike ọ kpara, na otú o si lụso Amazaya eze Juda agha,+ n’akwụkwọ e dere ihe ndị mere n’oge ndị eze Izrel.
13 Jehoash mechara nwụọ otú nna nna ya hà nwụrụ, Jeroboam*+ anọchie n’ocheeze ya. E likwara Jehoash na Sameria ebe e liri ndị eze Izrel ndị ọzọ.+
14 Mgbe Ịlaịsha+ dara ọrịa nke mechara gbuo ya, Jehoash eze Izrel gakwuuru ya, na-ebesara ya ákwá, sị: “Nna m, nna m! M na-ahụ ụgbọ ịnyịnya agha Izrel na ndị Izrel na-agba ịnyịnya!”+
15 Ịlaịsha asị ya: “Were ụta, chịrịkwa akụ́.” Ya ewere ụta, chịrịkwa akụ́.
16 Ịlaịsha asị eze Izrel: “Dọọ ụta ahụ.” Ya adọọ ya, Ịlaịsha atụkwasị aka ya n’aka eze,
17 sị: “Meghee windo chere ihu n’ebe ọwụwa anyanwụ.” Ya emeghee ya. Ịlaịsha asị: “Gbaa!” Ya agbaa. Ịlaịsha asịzie: “Akụ́ Jehova ji emeri,* akụ́ e ji emeri Siria! Ị ga na-egbu* ndị Siria n’Efek+ ruo mgbe i gbuchara ha.”
18 O kwukwara, sị: “Chịrị akụ́,” eze Izrel achịrị ha. Ịlaịsha asị ya: “Tie ha n’ala.” Ya etie ha n’ala ugboro atọ kwụsị.
19 Ihe a o mere kpasuru onye nke ezi Chineke ezigbo iwe, ya asị: “A sị na i tiri ha n’ala ugboro ise ma ọ bụ isii, ị gaara na-egbu ndị Siria ruo mgbe i gbuchara ha. Ma ugbu a, ugboro atọ ka ị ga-emeri ndị Siria.”+
20 Mgbe ihe a mechara, Ịlaịsha nwụrụ, e liekwa ya. Ma, e nwere ìgwè ọ lụọ ọ gbalaga+ na-esi Moab abata n’Izrel ná mmalite afọ ọ bụla.
21 Otu ụbọchị, ka ndị mmadụ na-eli otu nwoke, ha hụrụ ìgwè ọ lụọ ọ gbalaga ahụ. N’ihi ya, ha tụbara ozu nwoke ahụ ozugbo n’ebe e liri Ịlaịsha ma gbaa ọsọ. Mgbe ozu nwoke ahụ metụrụ ọkpụkpụ Ịlaịsha, nwoke ahụ si n’ọnwụ bilie+ ma guzoro n’ụkwụ ya.
22 Ma, Hazel+ eze Siria nọ na-emesi ndị Izrel ike+ n’oge niile Jehoahaz dị ndụ.
23 Ma, Jehova meere ha amara, meere ha ebere,+ gosikwa na ihe gbasara ha na-emetụ ya n’obi, n’ihi ndụ ya na Ebreham+ na Aịzik+ na Jekọb+ gbara. Ọ chọghị ibibi ha. Ọ chụpụghịkwa ha n’ihu ya ruo taa.
24 Mgbe Hazel eze Siria nwụrụ, Ben-hedad nwa ya nọchiri ya, malite ịchị.
25 Jehoash nwa Jehoahaz gakwara nata Ben-hedad nwa Hazel obodo ndị Hazel naara Jehoahaz nna ya n’agha. Jehoash meriri Ben-hedad ugboro atọ,+ natakwa ya obodo ndị Izrel nwe.
Ihe E Dere n'Ala Ala Peeji
^ Ya bụ, n’udo na n’obi iru ala.”
^ Gụọ Nkọwa Okwu.
^ Ya bụ, Jeroboam nke Abụọ.
^ Ma ọ bụ “azọpụta.”
^ Ma ọ bụ “na-emeri.”
