Akwụkwọ Ozi Nke Abụọ E Degaara Ndị Kọrịnt 2:1-17
2 Ekpebiela m na mgbe ọzọ m ga-abịa ịhụ unu, agaghị m eme ihe ga-ewute unu ọzọ.
2 N’ihi na ọ bụrụ na mụ emee ihe ga-ewute ununwa na-eme m obi ụtọ, ònyezi ga-eme m obi ụtọ?
3 Ihe mere m ji dee ihe a bụ ka unu ghara ime ihe ga-ewute m mgbe m bịara, kama ka unu mee ihe ga-eme ka m ṅụrịa ọṅụ. N’ihi na obi siri m ike na ihe na-eme ka m nwee aṅụrị na-emekwa ka unu nwee aṅụrị.
4 N’ihi na eji m obi mgbawa na ezigbo anya mmiri na-ede akwụkwọ ozi a, obi adịghịkwa m mma. Anaghị m ekwu ihe a ka obi ghara ịdị unu mma,+ kama ka unu wee mara otú m hụruru unu n’anya.
5 O nwere onye mere ihe wutere unu.+ Ọ bụ unu ka ihe o mere wutere, ọ bụghị mụnwa. Ma, achọghị m ikwu ọtụtụ okwu gbasara ya.
6 Ahụhụ unu tara onye ahụ ezuola.
7 Ihe unu kwesịrị ime ugbu a bụ ịgbaghara ya ma kasie ya obi,+ ka otú ọnọdụ ya si ewute ya ghara ime ka ọ daa mbà.+
8 N’ihi ya, ana m agba unu ume ka unu gosi ya na unu hụrụ ya n’anya.+
9 Ihe ọzọ mere m ji na-edetara unu akwụkwọ ozi a bụ iji chọpụta ma ùnu na-erube isi n’ihe niile.
10 Agbagharala m onye ọ bụla unu gbaghaara. N’eziokwu, m gbaghara mmadụ, ọ bụ iji nyere unu aka. Kraịst bụkwa onye akaebe m.
11 Ịgbaghara mmadụ dị mkpa ka Setan wee ghara ịghọgbu anyị,+ n’ihi na anyị ma otú o si anwata ndị mmadụ.+
12 Mgbe m ruru Troas+ izisa ozi ọma banyere Kraịst, e mere ka m nwekwuo ohere ịrụ ọrụ Onyenwe anyị.
13 M nọ na-echegbu onwe m maka na ahụghị m Taịtọs+ nwanna m. N’ihi ya, m sịrị ụmụnna nọ ebe ahụ ka ọ dị n’oge ọzọ, gawazie Masedonia.+
14 Ma ekele dịrị Chineke, onye na-edu anyị ka anyị soro Kraịst na-enwe obi ụtọ otú ndị agha na-enwe ma ha merie n’agha. Ịmata ihe gbasara Chineke dị ka ịnụ ísì ọma. Chineke na-ejikwa ọrụ anyị na-arụ eme ka ndị mmadụ na-anụ ísì ọma a n’ebe niile.
15 N’anya Chineke, anyị, bụ́ ndị na-ezisa ozi ọma gbasara Kraịst, dị ka ihe na-esi ísì ọma. Ma ndị a ga-azọpụta ma ndị ga-ala n’iyi na-anụ ísì ọma a.
16 N’anya ndị na-ala n’iyi, ọ bụ ísì ọnwụ nke na-egbu mmadụ,+ ma n’anya ndị a ga-azọpụta, ọ bụ ísì ndụ nke na-eme ka mmadụ dịrị ndụ. Ònye ruru eru ije ozi a?
17 Anyị ruru eru n’ihi na anyị anaghị ere okwu Chineke ere+ otú ọtụtụ ndị na-eme. Ebe ọ bụkwa na n’anya Chineke, anyị na-eso ụzọ Kraịst, bụrụkwa ndị Chineke zipụrụ, anyị na-eji obi anyị niile ezi ozi ọma.
