Ihe E Mere n’Ụbọchị Ndị Eze nke Abụọ 16:1-14
16 N’afọ nke iri atọ na isii n’ọchịchị Esa, Beasha eze+ Izrel lụsoro Juda agha, malitekwa ịrụsi Rema ike+ ka onye nọ ebe Esa eze Juda nọ ghara isi ebe ahụ pụọ ma ọ bụ ka onye na-anọghị ebe Esa nọ ghara ịbanye ebe ọ nọ.*+
2 Esa wee si n’akụ̀ dị n’ụlọ Jehova nakwa n’ụlọ* eze wepụta ọlaọcha na ọlaedo+ bugara Ben-hedad eze Siria,+ onye bi na Damaskọs. Ọ gwakwara Ben-hedad, sị:
3 “Mụ na gị gbara ndụ. Nna m na nna gị gbakwara ndụ. M na-ebutere gị ọlaọcha na ọlaedo. Bịa mebie ọgbụgba ndụ gị na Beasha eze Izrel, ka o wee hapụ m.”
4 Ben-hedad gere Eze Esa ntị wee ziga ndị isi ndị agha ya, ha agaa lụso obodo ndị dị n’Izrel agha, bibie Aịjọn,+ Dan,+ Ebel-meyim, na ebe niile a na-akwasa ihe n’obodo ndị dị na Naftalaị.+
5 Ozugbo Beasha nụrụ ya, ọ kwụsịrị ịrụ Rema.
6 Eze Esa kpọọrọ ndị Juda niile, ha agaa buru nkume na osisi ndị Beasha ji na-arụsi Rema ike.+ O jikwa ha rụsie Giba na Mizpa ike.+
7 N’oge ahụ, Hanenaị+ onye ọhụ ụzọ bịakwutere Esa eze Juda, sị ya: “Ebe ọ bụ na ị tụkwasịrị eze Siria obi kama ịtụkwasị Jehova bụ́ Chineke gị obi, ị gaghịzi emerili ndị agha eze Siria.+
8 Ọ̀ kwa ndị Etiopia na ndị Libia nwere imirikitiimi ndị agha, nweekwa ọtụtụ ụgbọ ịnyịnya na ndị na-agba ịnyịnya? Ma Jehova nyefere ha n’aka gị maka na ị tụkwasịrị ya obi.+
9 N’eziokwu, anya Jehova na-ahụzu ụwa niile+ iji gosi ike ya maka* ndị ji obi ha niile* na-efe ya.+ I zuzuru nzuzu n’ihe a i mere. Si ugbu a gawa, a ga na-alụso gị agha.”+
10 Ma Esa wesara onye ọhụ ụzọ ahụ iwe, kpọchie ya n’ụlọ nga,* n’ihi na ezigbo iwe ji ya maka ihe ahụ o kwuru. N’oge ahụ, Esa malitekwara ichi ụfọdụ n’ime ndị obodo ya ọnụ n’ala.
11 Ma, e dere akụkọ gbasara ndụ Esa, malite ná mbido ruo ná ngwụcha, n’akwụkwọ e dere gbasara ndị eze Juda na Izrel.+
12 N’afọ nke iri atọ na itoolu n’ọchịchị Esa, ihe mere ya n’ụkwụ, ya emechaakwa rịasiwe ọrịa ike. Ma, ọ rịọghịdị Jehova ka o mee ka ọ gbakee n’ọrịa a, kama ọ gara chọwa ndị na-agwọ ọrịa.
13 N’ikpeazụ, Esa nwụrụ otú nna nna ya hà nwụrụ.+ Ọ nwụrụ n’afọ nke iri anọ na otu n’ọchịchị ya.
14 E liri ya ná nnukwu ili o gwuuru onwe ya n’Obodo Devid.+ E nyiwere ya n’àkwà* ihe juru na ya bụ mmanụ balsam na ụdị mmanụ otite dị iche iche a gwara n’ụdị pụrụ iche.+ Ha mụnyekwara ọtụtụ ihe na-esi ísì ọma ọkụ iji kwanyere ya ùgwù n’oge a na-eli ya.
Ihe E Dere n'Ala Ala Peeji
^ Ma ọ bụ “isi n’ebe Esa eze Juda na-achị pụọ ma ọ bụ ịbanye n’ebe ahụ.”
^ Ma ọ bụ “n’obí.”
^ Ma ọ bụ “iji kwado.”
^ Ma ọ bụ “ji obi zuru ezu.”
^ Na Hibru, “n’ụlọ ọtọsị.”
^ Ma ọ bụ “n’ihe ndina.”