Aịzaya 45:1-25
45 E nwere ihe mụnwa bụ́ Jehova na-agwa Saịrọs, bụ́ onye m tere mmanụ.+
M seere ya n’aka nri ya,+Ka m jiri ya weda mba dị iche iche ala,+Jiri ya napụ ndị eze ihe ha ji akpa ike,*Jirikwa ya meghee ọnụ ụzọ nwere ibo abụọ,Ka a ghara imechi ọnụ ụzọ ámá ya emechi. M gwara ya, sị:
2 “M ga-aga n’ihu gị,+M ga-emekwa ka ugwu dị iche iche dị larịị.
M ga-akụri ibo ụzọ ndị e ji ọla kọpa rụọ.
M ga-agbajikwa ígwè e ji atụchi ha.+
3 M ga-enye gị akụ̀ ndị dị n’ọchịchịrị,Nyekwa gị akụ̀ ndị e zoro n’ebe dị iche iche zoro ezo.+
Ihe a ga-eme ka ị mara na m bụ Jehova,Bụ́ Chineke Izrel, onye na-akpọ gị aha gị.+
4 M na-akpọ gị ahaN’ihi ohu m Jekọb nakwa n’ihi Izrel bụ́ onye m họọrọ.
M ga-eme ka aha gị na-ede ude n’agbanyeghị na ị maghị m.
5 Abụ m Jehova. E nweghị onye ọzọ.
E wezụga m, e nweghị Chineke ọzọ dịnụ.+
M ga-enye gị ike* n’agbanyeghị na ị maghị m.
6 Ihe a ga-eme ka ndị mmadụ maraNa e nweghị onye ọzọ ma e wezụga m,+Malite n’ebe ọwụwa anyanwụ ruo n’ebe ọdịda ya.
Abụ m Jehova. E nweghịkwa onye ọzọ.+
7 M na-eke ìhè,+ na-ekekwa ọchịchịrị.+
M na-eme ka e nwee udo,+ na-emekwa ka e nwee ọdachi.+
Mụnwa, bụ́ Jehova, na-eme ihe a niile.
8 Eluigwe, mee ka mmiri zoo.+
Ka ezi omume si n’ígwé ojii zoo ka mmiri.
Ka ala meghee, mịakwa nzọpụta ka mkpụrụ,Ka o meekwa ka ezi omume pulite n’otu mgbe ahụ.+
Ọ bụ mụnwa bụ́ Jehova mere ka ọ dị otú ahụ.”
9 Onye na-esesa Onye kere* ya okwu ga-ata ahụhụ,Maka na ọ dị ka mpekere ite ụrọ wụsa n’alaOtú mpekere ite ụrọ ndị ọzọ wụsa.
Ụrọ ò kwesịrị ịsị Ọkpụite:* “Gịnị ka ị na-akpụ?”+
Ka ihe ị rụrụ ò kwesịrị ịsị na i nweghị aka?*
10 Onye na-asị nna ya: “Gịnị mere i ji mụọ m?” ga-ata ahụhụ.
Onye na-asịkwa nne ya: “Olee ụdị nwa ị mụrụ ihe a?”* ga-ata ahụhụ.
11 Jehova, bụ́ Onye Nsọ Izrel,+ Onye kpụrụ ya, kwuru, sị:
“Ọ̀ na-eme unu obi abụọ ma ihe m kwuru ọ̀ ga-eme?
Ùnu ga-enye m iwu gbasara ụmụ m+ na ọrụ aka m?
12 Ọ bụ m kere ụwa,+ keekwa ndị mmadụ bi na ya.+
Ọ bụ m ji aka m gbasaa eluigwe.+
M na-enyekwa kpakpando na ihe niile dị n’eluigwe iwu.”+
13 “Emeela m ka otu onye pụta maka na m na-eme ezi omume.+
M ga-emekwa ka ihe ọ bụla ghara ịnọchiri ya ụzọ.
Ọ bụ ya ga-arụ obodo m.+
Ọ ga-ahapụkwa ndị m a dọọrọ n’agha ka ha laa.+ Ọ gaghị asị ka a kwụọ ya ụgwọ. Ọ gaghịkwa anara aka azụ.”+ Ọ bụ Jehova nke ụsụụ ndị agha kwuru ihe a.
14 Jehova kwukwara, sị:
“Uru* ndị Ijipt na ngwá ahịa* ndị Etiopia nakwa ndị Siba, bụ́ ndị toro ogologo,Ga-abịakwute gị. Ha ga-aghọkwa ndị gị.
Ha ga-ebu ịga a tụrụ ha na-eso gị n’azụ.
Ha ga-abịa kpọọrọ gị isiala.+
Ha ga-agwa gị, sị, ‘N’eziokwu, Chineke nọnyeere gị.+
E nweghịkwa onye ọzọ. Chineke ọzọ adịghị.’”
15 Chineke Izrel, bụ́ Onye Nzọpụta,+N’eziokwu, ị bụ Chineke. Ọ bụghị mgbe niile ka ị na-eme ka a mara ihe ị na-eme.
16 Ihere ga-eme ndị na-apị arụsị. A ga-emenyekwa ha niile ihere.
Ha niile ga na-agagharị, ihere eju ha ihu.+
17 Ma, Jehova ga-azọpụta unu, bụ́ ndị Izrel, ruo mgbe ebighị ebi.*+
E nweghị mgbe ihere ga-eme unu. E nweghịkwa mgbe a ga-emenye unu ihere.+
18 Jehova, Onye kere eluigwe,+ Onye bụ́ ezi Chineke,Onye kere ụwa, kesie ya ike,+O keghị ya na nkịtị,*Kama o kere ya ka ndị mmadụ biri na ya.+
Ọ sịrị: “Abụ m Jehova, e nweghị onye ọzọ.
19 Anọghị m ebe zoro ezo kwuo okwu,+ ya bụ, ebe gbara ọchịchịrị.
Agwaghịkwa m ụmụ* Jekọb, sị,‘Chọọnụ m na nkịtị.’
Abụ m Jehova, onye na-ekwu ihe bụ́ ezi omume, na-emekwa ka a mara ihe ziri ezi.+
20 Ndị si ná mba dị iche iche gbapụ,Zukọtanụ bịa. Bịanụ nso.+
Ndị na-ebugharị arụsị a pịrị apịMa na-arịọ chi na-enweghị ike ịzọpụta ha arịrịọ amaghị ihe ọ bụla.+
21 Kwuwenụ ihe unu chọrọ ikwu. Zaranụ ọnụ unu.
Nweenụ otu olu n’izu unu gbara.
Ònye kwuru kemgbe ụwa na ihe a ga-eme?
Ònye kpọsara ya kemgbe oge ochie?
Ọ́ bụghị mụnwa, bụ́ Jehova?
E nweghị Chineke ọzọ dị ma e wepụ m.
E nweghị Chineke ọzọ bụ́ onye ezi omume na Onye Nzọpụta+ ma e wepụ m?+
22 Ndị niile nọ na nsọtụ ụwa, bịakwutenụ m ka m zọpụta unu,+N’ihi na abụ m Chineke. E nweghịkwa Chineke ọzọ dị.+
23 Ejirila m onwe m ṅụọ iyi,Okwu ahụ m ji ọnụ m kwuo bụ eziokwu.
E nweghịkwa ihe ga-eme ka ọ ghara imezu.+
Ikpere niile ga-egburu m n’ala.
Ire niile ga-aṅụkwa iyi na ha ga na-akwado m.+
24 Ha ga-asị, ‘N’eziokwu, Jehova na-eme ihe ziri ezi mgbe niile. Ọ dịkwa ike.
Ndị niile na-ewesa ya iwe ga-eji ihere bịa n’ihu ya.
25 Ụmụ* Izrel niile ga-ahụ na ọ dị mma na ha na-efe Jehova.+
Ha ga-ejikwa ihe ndị ọ na-emere ha na-eme ọnụ.’”
Ihe E Dere n'Ala Ala Peeji
^ Na Hibru, “tọpụ ndị eze ihe ha kere n’úkwù.”
^ Na Hibru, “M ga-eke gị ihe n’úkwù.”
^ Ma ọ bụ “Onye kpụrụ.”
^ Ma ọ bụ “Onye kpụrụ ya.”
^ O nwere ike ịbụ, “Ka ụrọ ò kwesịrị ịsị: ‘Ihe ị kpụrụ enweghị aka’?”
^ Ma ọ bụ “Ọ̀ bụ ime gịnị na-eme gị?”
^ O nwere ike ịbụ, “Ndị ọrụ.”
^ O nwere ike ịbụ, “ndị ahịa.”
^ Ma ọ bụ “malite mgbe ebighị ebi ruo mgbe ebighị ebi.”
^ O nwere ike ịbụ, “ka ọ tọgbọrọ nkịtị.”
^ Na Hibru, “mkpụrụ.”
^ Na Hibru, “Mkpụrụ.”
